சிகந்தர் படமும் இப்படிதான் இருந்தது, ஆனா? வெளியான மதராஸி பட வீடியோவால் எழுந்த கேள்வி!

படுதோல்வியடைந்த சிகந்தர்!

ஏ ஆர் முருகதாஸ் இயக்கத்தில் சல்மான் கான் நடிப்பில் பாலிவுட்டில் வெளிவந்த “சிகந்தர்” திரைப்படம் படுதோல்வியடைந்த திரைப்படமாக அமைந்தது. இத்திரைப்படம் ரூ.200 கோடி பட்ஜெட்டில் உருவாகியிருந்த நிலையில் ரூ.177 கோடியே வசூலாகி இருந்தது. இது அத்திரைப்படத்தை தயாரித்த சஜித் நடியட்வாலாவுக்கு மிகப்பெரிய நஷ்டத்தை கொடுத்தது. 

இத்திரைப்படத்தை ஏ ஆர் முருகதாஸ் இயக்கிக்கொண்டிருந்த அதே சமயத்தில்தான் தமிழில் சிவகார்த்திகேயனை வைத்து “மதராஸி” திரைப்படத்தையும் இயக்கிக்கொண்டிருந்தார். “மதராஸி” திரைப்படத்தில் சிவகார்த்திகேயனுக்கு ஜோடியாக ருக்மிணி வசந்த் நடித்துள்ளார். அனிருத் இத்திரைப்படத்திற்கு இசையமைத்துள்ளார். 

மேலும் இத்திரைப்படத்தில் வித்யுத் ஜம்வால், பிஜு மேனன் உள்ளிட்ட பலரும் நடித்துள்ளனர். இந்த நிலையில் இத்திரைப்படத்தின் மேக்கிங் வீடியோ ஒன்று இணையத்தில் வைரல் ஆகி வருகிறது. 

அதிரிபுதிரியான ஆக்சன்!

இந்த மேக்கிங் வீடியோவின் மூலம் இத்திரைப்படம் ஒரு அதிரிபுதிரியான ஆக்சன் திரைப்படமாக உருவாகியுள்ளதாக தெரிய வருகிறது. படம் முழுவதும் ரணகளமான சண்டைக் காட்சிகள் நிறைந்திருக்க வாய்ப்புள்ளதாக தெரிய வருகிறது. இந்த நிலையில்தான் ரசிகர்கள் ஒரு கேள்வியை எழுப்பி வருகின்றனர். 

அதாவது “சிகந்தர்” திரைப்படமும் இது போன்ற ஒரு ஆக்சன் திரைப்படமாகத்தான் அமைந்திருந்தது, ஆனால் அத்திரைப்படம் படுதோல்வியடைந்தது. அந்த வகையில் “மதராஸி” படமாவது பந்தயம் அடிக்குமா என கேள்வி எழுப்பி வருகின்றனர். 

சிவகார்த்திகேயனின் “மதராஸி” திரைப்படம் வருகிற செப்டம்பர் மாதம் 5 ஆம் தேதி திரையரங்குகளில் வெளியாகவுள்ளது. இத்திரைப்படம் தமிழ், தெலுங்கு, மலையாளம், ஹிந்தி, கன்னடம் ஆகிய 5 மொழிகளில் வெளியாகவுள்ளது குறிப்பிடத்தக்கது.