அந்த கேரக்டருக்கு நீங்க தான் கரெக்டா இருப்பீங்க.. லோகேஷ் கனகராஜ் பெயரில் பண மோசடி..!

கோவையை சேர்ந்த இளம் இயக்குநர் லோகேஷ் கனகராஜ் மாநகரம் படம் மூலம் சினிமாவில் அறிமுகமானார். தொடர்ந்து கைதி படத்தை இயக்கை பெரிய கவனத்தை பெற்றார். இதன் பின்னர் விஜய்யுடன் சேர்ந்து மாஸ்டர் படத்தை இயக்கினார். படம் மாஸ் ஹிட் ஆனது. தமிழ் சினிமாவின் முன்னணி இயக்குநராக மாறினார்.

அந்த வெற்றியை தொடர்ந்து கமல்ஹாசனை வைத்து விக்ரம் படத்தை இயக்கினார். படம் மெகா ஹிட் அடித்து வசூல் சாதனை குவித்தது. இதையடுத்து மீண்டும் விஜய்யுடன் இணைந்து லியோ படத்தை இயக்கி வருகிறார். இத்திரைப்படத்தில் திரிஷா, கெளதம் வாசுதேவ் மேனன், அர்ஜுன், மிஷ்கின், சஞ்சய் தத் உட்பட பலர் நடிக்கின்றனர்.

அனிருத் இசையமைத்துள்ள இப்படத்திற்கு விஜய் ரசிகர்கள் மிகப்பெரிய ஆர்வத்துடன் காத்திருக்கின்றனர். காரணம் லோகேஷ் இயக்கத்தில் வெளிவரும் வரும் வித்தியாசமான, மரண மாஸாக கொண்டாடப்படும் படமாக இருக்கும் என்பதால் தான்.’

இந்த நிலையில் லோகேஷ் கனகராஜ் பெயரில் இளம் நடிகர்-நடிகைகளிடம் பணம் மோசடி நடப்பதாக பிரபல தெலுங்கு நடிகர் பிரம்மாஜி குற்றம் சாட்டி உள்ளார். இயக்குனர் லோகேஷ் கனகராஜ் மேனேஜர் எனச் சொல்லிக் கொண்டு ஒருவர் இளம் நடிகர் நடிகைகளிடம் பேசி இருக்கிறார்.

லோகேஷ் கனகராஜ் அடுத்த படத்திற்கு உங்களை நடிக்க வைக்கிறோம் என்றும், பணம் அனுப்பினால் ஆடிஷனுக்கு வரும்போது அணிய தேவையான ஆடைகளை வாடகைக்கு தருகிறோம் என்று பேசி பணம் வசூல் செய்து வருகிறாராம். சினிமா துறைக்கு வர வேண்டும் என்ற கனவில் இருக்கும் இளம் நடிகர் நடிகைகளிடம் இந்த மோசடி நடந்துள்ளதாகவும், இதுபோன்ற நபர்களிடம் எச்சரிக்கையாக இருக்க வேண்டும் என பிரபல தெலுங்கு நடிகர் பிரம்மாஜி கூறியுள்ளார்.