வரலட்சுமிக்கு உயிர் சினிமாதான்!.. நான் காதல் மட்டும் தான்; நிக்கோலய் ஓபன் டாக்

நடிகை வரலட்சுமி,நிகோலாய் சச்தேவ் திருமணம் தாய்லாந்தில் விமர்சையாக நடந்து முடிந்தது. அதன் பின் சென்னையில் வரவேற்பு நிகழ்ச்சி நடந்தது. இதில் சினிமா பிரபலங்கள் பலரும் பங்கேற்று மணமக்களை வாழ்த்தினர்.

இவர்களின் திருமணம் முடிந்து சென்னையில் செய்தியாளர்களை சரத்குமார் மற்றும் கணவர் நிக்கோலய் உடன் சந்தித்தார் வரலட்சுமி.

இந்த சந்திப்பில் நிக்கோலய் பேசியதாவது, “இப்போதுதான் தமிழ் கற்றுக் கொண்டு வருகிறேன்.பொண்டாட்டி என்ற வார்த்தை மட்டும்தான் இப்போதைக்கு தமிழில் தெரியும். மும்பை இனிமேல் என் வீடு கிடையாது. சென்னை தான் என் வீடு. என்னை நான் அறிமுகம் செய்து கொள்ள விரும்புகிறேன். என் பெயர் நிக்கோலய் சச்தேவ். நான் வரலட்சுமி என்ற அழகான பெண்ணைத் திருமணம் செய்திருக்கிறேன்.

திருமணத்திற்குப் பிறகு வரலட்சுமி அவரது பெயரை வரலட்சுமி சரத்குமார் சச்தேவ் என நிச்சயம் மாற்ற மாட்டார். அவரது பெயர் வரலட்சுமி சரத்குமார் என்று இருப்பதையே நானும் விரும்புகிறேன். ஆனால், நான் அவரது பெயரை எடுத்துக் கொள்கிறேன். நிக்கோலய் வரலட்சுமி சரத்குமார் சச்தேவ் என்பதுதான் இனி என் பெயர்.

வரலட்சுமி என்னைத் திருமணம் செய்திருந்தாலும் நான் அவருடைய முதல் காதல் இல்லை. அவருடைய முதல் காதல் எப்போதும் சினிமா தான்.சொல்லப்போனால் சினிமா அவருடைய உயிர்.திருமணத்திற்கு பிறகும் அவர் தொடர்ந்து நடிப்பார். உங்கள் அன்பும், ஆதரவும் நிச்சயம் அவருக்கு வேண்டும்” என்றார்.

வெட்கத்தில் சிரித்தார் வரலட்சுமி. அவர் பேசும் போது நீங்கள் எல்லோரும் இங்கு வந்ததற்கு நன்றி. நிக்கோலய் சொன்னதுபோல என்னுடைய காதல் அவர். ஆனால், என்னுடைய உயிர் சினிமாதான். அதனால், திருமணத்திற்குப் பிறகும் கண்டிப்பாக சினிமாவில் நடிப்பேன். வந்து வாழ்த்திய எல்லோருக்கும் நன்றி” என்று தெரிவித்தார்.