ஜப்பான் மக்கள் ஸ்லிம்மா இருக்கிறதுக்கு பின்னாடி இப்படி ஒரு ரகசியம் ஒளிஞ்சிருக்குதா…???

ஜப்பானிய மக்கள் என்றாலே நம்முடைய ஞாபகத்துக்கு முதலில் வருவது அவர்களுடைய கட்டுக்கோப்பான உடலும், அழகான தோலும் தான். இதற்கு முக்கிய காரணம் அவர்கள் பின்பற்றி வரும் வாழ்க்கை முறை பழக்க வழக்கங்கள். அன்றாட வாழ்க்கையை அவர்கள் முழுமையான மற்றும் ஒழுக்கம் நிறைந்த அணுகுமுறையோடு அணுகுவது இந்த ஃபிட்னஸ் கிடைப்பதற்கு காரணமாக அமைகிறது. ஜப்பானியர்களுக்கு உடல் எடை அதிகரிப்பு என்பது அரிதான ஒரு விஷயம். அவர்களுடைய இந்த கவர்ச்சியூட்டும் வெளிப்புற தோற்றம் அவர்களது மரபணுக்களால் மட்டும் ஏற்பட்டவை அல்ல. இதற்கு முக்கிய காரணம் வேலை, ஓய்வு மற்றும் விளையாட்டுக்கு அவர்கள் கொடுக்கும் சமநிலை.

இதன் விளைவாக அவர்கள் நல்ல கட்டுக்கோப்பான உடலோடு ஆரோக்கியமாக இருக்கின்றனர். இதனால் அவர்களுடைய வாழ்க்கையானது உலகம் முழுவதும் உள்ள பலருக்கு ஊக்கமாக அமைகிறது. அந்த வகையில் ஜப்பானியர்களின் ஃபிட்னஸ்க்கு காரணமாக இருக்கும் ரகசியங்கள் சிலவற்றை பற்றி இந்த பதிவில் பார்க்கலாம்.

உணவு அளவு கட்டுப்பாடு

உணவு அளவு என்பது ஜப்பானிய கலாச்சாரத்தில் மிகவும் முக்கியமான ஒரு பழக்கமாக அமைகிறது. இதன் காரணமாகவே அவர்கள் ஆரோக்கியமான உடல் எடையை கொண்டு இருக்கின்றனர். கார்போஹைட்ரேட், புரோட்டின் மற்றும் காய்கறிகள் ஆகியவற்றை சரியான அளவு சாப்பிடுவதும் அளவுக்கு அதிகமான உணவு சாப்பிடுவதையும் அவர்கள் தவிர்த்து விடுகின்றனர்.

பொறுமையாக சாப்பிடுவது 

ஜப்பானில் பொறுமையாக சாப்பிடுவது என்பது அவர்களுடைய கலாச்சாரத்தில் வேரூன்று இருக்கக்கூடிய ஒன்று. ஒவ்வொரு கடியையும் ரசித்து ருசித்து மென்று கூழாக்கி விழுங்குவதால் உணவு நன்கு ஜீரணமாகி, உடல் எடை அதிகரிப்பது குறைந்து, மேலும் பல்வேறு உடல் நலப் பிரச்சினைகள் ஏற்படுவது தடுக்கப்படுகிறது.

இதையும் படிக்கலாமே: மைதாவிற்கு பதிலா இந்த மாதிரி ஹெல்தி ஆப்ஷன் கூட இருக்கு… தெரிஞ்சுக்கோங்க!!!

ஆரோக்கியமான பானங்கள் 

தினமும் கிரீன் டீ குடிப்பதை ஜப்பானியர்கள் பழக்கமாக கொண்டுள்ளனர். நாள் முழுவதும் கிரீன் டீ பருகுவதால் அவர்களுக்கு தேவையான ஆன்டி-ஆக்ஸிடன்ட்கள் கிடைத்து மெட்டபாலிசம் ஊக்குவிக்கப்பட்டு, கொழுப்பு எரிக்கும் செயல்முறை அதிகமாகிறது. இதனால் உடலில் வீக்கம் ஏற்படாமல் இதயம் ஆரோக்கியமாக இருக்கும்.

ஃபிரஷான மற்றும் பதப்படுத்தப்படாத உணவுகள் 

ஜப்பானிய மக்கள் எப்பொழுதும் ஃபிரெஷான மற்றும் பதப்படுத்தப்படாத உணவுகளை சாப்பிடுவதற்கு முன்னுரிமை கொடுப்பார்கள். காய்கறிகள், பழங்கள், மெலிந்த புரோட்டீன்கள் மற்றும் முழு தானியங்கள் அவர்களுடைய உணவில் கட்டாயமாக இருக்கும். இவற்றில் உள்ள அத்தியாவசிய ஊட்டச்சத்துக்களும், நார்ச்சத்தும், உடல் எடையை சீராக பராமரிப்பதற்கு உதவுகிறது.

உடல் செயல்பாடு 

ஜப்பானில் உடல் செயல்பாடு என்பது அன்றாட வாழ்க்கையின் ஒரு பகுதியாக உள்ளது. நடப்பது, சைக்கிள் ஓட்டுவது மற்றும் பொது போக்குவரத்தை பயன்படுத்துவது ஆகியவை ஆரோக்கியமான வாழ்க்கை முறையை ஊக்குவிக்கிறது.

கவனத்திற்கு: எங்கள் இணையபக்கத்தில் பதிவிடப்படும் மருத்துவ குறிப்புகள், அழகு குறிப்புகள் மற்றும் உடல்நலம் சார்ந்த விஷயங்களை மருத்துவரின் ஆலோசனைக்கு பிறகே செய்து பார்க்க வேண்டும் என அறிவுறுத்துகிறோம்.