மும்பையில் நடுரோட்டில் வைத்து தாக்கப்பட்ட செய்தியாளர்..! வேடிக்கை பார்த்த மும்பை போலீஸ்..! வைரல் வீடியோ..!

24 September 2020, 3:55 pm
pradeep_bhandari_slapped_updatenews360
Quick Share

மும்பை போதைப்பொருள் கட்டுப்பாட்டு அலுவலகம் அமைந்துள்ள கேட்வே ஆஃப் இந்தியாவில் இன்று காலை இரண்டு செய்தி சேனல்களின் பத்திரிகையாளர்களிடையே சண்டை ஏற்பட்டது பரபரப்பை ஏற்படுத்தியுள்ளது.

ரிபப்ளிக் செய்தி சேனலில் பணியாற்றும் பிரதீப் பண்டாரி, ஏபிபி மற்றும் என்டிடிவி செய்தி சேனல்களைச் சேர்ந்த ஒரு பத்திரிகையாளரால் தாக்கப்பட்டதாக குற்றம் சாட்டினார்.

ட்விட்டரில் வைரலாகிவிட்ட இந்த சம்பவத்தின் வீடியோவில், பண்டாரி ஒரு நபரால் தள்ளப்படுவதைக் காணலாம். தள்ளிவிடும் நபரும் பண்டாரியை அறைய முயற்சிப்பது தெளிவாக தெரிகிறது. இந்த மோதல் நடக்கும் இடத்தில் இருந்த மும்பை போலீஸ் குழு தாக்குதலை நிறுத்த முயற்சி செய்யாமல் சம்பவத்தை வேடிக்கை மட்டுமே பார்த்தது. 

மோதலுக்கான காரணம் என்ன என்பது தெளிவாகத் தெரியவில்லை.

ஆனால் பின்னர் பண்டாரி வெளியிட்ட டிவீட்டில் இரண்டு தொலைக்காட்சி சேனல்களுடன் தொடர்பு இருப்பதாகக் கூறும் குண்டர்கள், என்சிபியால் தொடரப்பட்ட போதைப்பொருள் வழக்கில் தான் உண்மையை அம்பலப்படுத்தப்பட்டதால் அவர்கள் விரக்தியடைந்தனர் என்று தெரிவித்தார்.

எனினும் இந்த சமத்துவம் குறித்து இதுவரை போலீஸ் புகார் எதுவும் பதிவு செய்யப்படவில்லை. தாக்குதல் நடத்தியதாகக் கூறப்படும் செய்தியாளர்கள் பணிபுரியும் செய்தி சேனல்களிலிருந்து இதுவரை எந்த அறிக்கையும் வெளியிடப்படவில்லை.