விவசாய சீர்திருத்தங்களுக்கு எதிர்ப்பு..! ஹரியானா பாஜக தலைவர் ராஜினாமா..!

அண்மையில் மத்திய அரசால் கொண்டுவரப்பட்ட விவசாயச் சட்டங்களுக்கு எதிர்ப்பு தெரிவிக்கும் விதமாக ஹரியானா பாஜக தலைவர் ஷியாம் சிங் ராணா இன்று கட்சியில் இருந்து விலகினார். யமுனாநகர் மாவட்டம் ராடௌரைச் சேர்ந்த முன்னாள் எம்.எல்.ஏ தனது ராஜினாமாவை மாநில பாஜக தலைவர் ஓம் பிரகாஷ் தங்கருக்கு சமர்ப்பித்தார்.

மனோகர் லால் கட்டார் தலைமையிலான பாஜக அரசாங்கத்தின் முதல் ஆட்சிக் காலத்தில் தலைமை சட்டசபை செயலாளராக இருந்த ராணா, விவசாயிகள் பிரச்சினையை மனதில் வைத்து கட்சியை விட்டு விலகுவதாக தெரிவித்தார்.

விவசாயிகள் எதிர்கொள்ளும் பிரச்சினைகளை கருத்தில் கொண்டு, “நான் அவர்களை எதிர்க்கிறேன். இதனால் நான் வகிக்கும் அனைத்து பதவிகளிலிருந்தும் ராஜினாமா செய்கிறேன். கட்சியிலிருந்தும் ராஜினாமா செய்கிறேன்” என்று தங்கருக்கு எழுதிய ராஜினாமா கடிதத்தில் ராணா கூறினார்.

பின்னர் யமுனாநகரில் செய்தியாளர்களிடம் பேசிய அவர், விவசாயிகள் பிரச்சினை தீர்க்கப்படவில்லை என்றும் விவசாய சட்டங்களுக்கு எதிராக ஆயிரக்கணக்கான விவசாயிகள் எதிர்ப்பு தெரிவித்து வருவதாகவும் கூறினார். புதிய விவசாய சட்டங்கள் தொடர்பான விவசாயிகளின் அச்சங்கள் ஆதாரமற்றவை அல்ல என்றும் ராணா கூறினார்.

“தற்போதுள்ள முறையை மேம்படுத்துவதன் மூலம் விவசாயிகளுக்கு அரசாங்கம் வழிவகைகளை உருவாக்கியிருக்க வேண்டும். விவசாயிகளின் கவலைகள் உண்மையானவை. அரசாங்கம் இவற்றை நிவர்த்தி செய்திருக்க வேண்டும்.” என்றார்.

கடந்த சில நாட்களாக மாநிலத்தில் ஏராளமான விவசாயிகள் பயிர் கொள்முதல் செய்வதில் சிரமங்களை சந்தித்து வருவதாகவும், ஆனால் அரசாங்கம் இந்த விஷயத்தில் போதுமான கவனம் செலுத்தவில்லை என்றும் அவர் கூறினார்.

வேறு எந்த அமைப்பிலும் சேருவீர்களா என்று கேட்டதற்கு, அடுத்த நடவடிக்கை எடுப்பதற்கு முன் தனது ஆதரவாளர்களிடம் விவாதிக்க உள்ளதாக ராணா கூறினார்.

Updatenews Sekar

See author's posts

Views: - 0 View

0

0