குற்றவாளிகளிடம் மக்களை வழிநடத்தும் பொறுப்பா..? – “என்னதான் நடக்கிறது” அரசியல் கட்சிகளுக்கு உயர்நீதிமன்றம் கேள்வி..!

13 August 2020, 6:08 pm
Quick Share

அரசியலுக்குள் நுழைவதன் மூலம் குற்றவாளிகள், மக்களை வழிநடத்தும் கொள்கைகளை உருவாக்குபவர்களாக மாறுவது துரதிஷ்டவசமானது என சென்னை உயர் நீதிமன்றம் வேதனை தெரிவித்துள்ளது.

புதுச்சேரியை சேர்ந்த ஜனா என்பவரை குண்டர் தடுப்புச் சட்டத்தின் கீழ் போலீசார்சிறையில் அடைத்துள்ளனர். இதனை எதிர்த்து அவரது மனைவி ஜமுனா சென்னை உயர் நீதிமன்றத்தில் ஆட்கொணர்வு மனு தாக்கல் செய்தார்.

இந்த மனு இன்று தலைமை நீதிபதி அமர்வு முன்பு விசாரணைக்கு வந்தது. அப்போது, புதுச்சேரியில் ஏராளமான குற்றவாளிகள் அரசியல் பின்புலத்துடன் உலா வருவதாக நீதிபதி குற்றம் சாட்டினார்.

குற்றவாளிகள் அரசியலுக்குள் நுழைந்து, எம்.பி மற்றும் எம்.எல்.ஏ.க்கள் ஆகி, அமைச்சராகவும் பதவி ஏற்பது, மக்களுக்கு தவறான தகவலை கொண்டு சேர்க்கும் என தெரிவித்த நீதிபதிகள், குற்றவாளிகள், அரசின் கொள்கை முடிவுகளை எடுப்பவர்களாக இருக்கக் கூடாது எனவும் குறிப்பிட்டார்.

தொடர்ந்து பேசிய நீதிபதிகள் குற்றவாளிகளுக்கு கட்சியில் இடமளிப்பது, தேர்தலில் போட்டியிட அனுமதிப்பது போன்றவற்றை, கட்சிகளின் தலைவர்கள் தவிர்த்தால் மட்டுமே, அரசியலை தூய்மைப்படுத்த முடியும் எனவும் நீதிபதிகள் அறிவுறுத்தினர்.
தொடர்ந்து, இதுபோன்ற சம்பவங்களை தவிற்க மத்திய அரசு சட்டம் கொண்டுவர வேண்டும் எனவும் நீதிபதி முன்மொழிந்துள்ளார்.

மேலும், புதுச்சேரியில் எத்தனை ரவுடிக் கும்பல்கள் உள்ளன? குற்ற பின்னணியுடன் அரசியல் கட்சிகளில் உள்ளவர்கள் எத்தனை பேர்? ரவுடிக் கும்பல்கள் மீதான வழக்குகள் எத்தனை? அந்த வழக்குகளின் நிலை என்ன?

சாட்சிகள் பிறழ் சாட்சியம் அளிக்க வற்புறுத்தப்படுகிறார்களா? கடந்த 10 ஆண்டுகளில் எத்தனை பேர் குண்டர் சட்டத்தில் சிறையில் அடைக்கப்பட்டுள்ளனர்?

நாட்டு வெடிகுண்டுகளை போல, சட்டவிரோத ஆயுதங்கள் ஏதேனும் புதுச்சேரியில் பயன்படுத்தப்படுகின்றனவா? மகாராஷ்டிரா போல புதுச்சேரியில் ரவுடி கும்பலை ஒழிக்க தனிச்சட்டம் கொண்டு வரக் கூடாதா என்பன உள்ளிட்ட கேள்விகளை எழுப்பிய நீதிபதிகள், அவற்றுக்கு இரண்டு வாரங்களில் பதிலளிக்க புதுச்சேரி அரசுக்கு உத்தரவிட்டு விசாரணையை தள்ளிவைத்தனர்.

Views: - 7

0

0