பாபநாசம் அணையின் நீர்மட்டம் உயர்வு…விவசாயிகள் மகிழ்ச்சி…!!

18 October 2020, 4:33 pm
Quick Share

திருநெல்வேலி: பாபநாசம் அணையின் நீர்மட்டம் 108 அடியாக அதிகரித்துள்ளதால் விவசாயிகள் மகிழ்ச்சி அடைந்துள்ளனர்.

நெல்லை, தென்காசி, தூத்துக்குடி ஆகிய 3 மாவட்டங்களில் விவசாயம் மற்றும் குடிநீர் தேவையை பாபநாசம் அணை பூர்த்தி செய்வது வருகிறது. பாபநாசம் அணையின் மூலம் நெல்லை, தென்காசி மாவட்டங்களில் மொத்தம் 86 ஆயிரத்து 107 ஏக்கர் விவசாய நிலங்கள் பயன்பெறுகின்றன.

பாபநாசம் அணைக்கு வடகிழக்கு பருவமழை காலத்தில்தான் நீர்வரத்து அதிகமாக இருக்கும். இதனால் நவம்பர், டிசம்பர் மாதங்களில் பாபநாசம் அணை முழு கொள்ளளவை எட்டும். இந்த ஆண்டு வடகிழக்கு பருவமழை இன்னும் துவங்தாத நிலையில் மேற்குத் தொடர்ச்சி மலையின் நீர்ப்பிடிப்புப் பகுதிகளில் பெய்து வரும் கனமழையால் கடந்த 2 நாட்களாக பாபநாசம் அணைக்கு நீர்வரத்து அதிகரித்து உள்ளது.

இன்றைய நிலவரப்படி பாபநாசம் அணையின் நீர்மட்டம் 2 அடி உயர்ந்து 108 அடியாக அதிகரித்துள்ளது. விநாடிக்கு 1,901 கன அடி நீர்வரத்து உள்ளது. அணையில் இருந்து விநாடிக்கு 304 கன அடி நீர் திறக்கப்படுகிறது.