ரேஷன் ஊழியர்களுக்கு ஊதிய உயர்வு: தமிழக அரசு அரசாணை வெளியீடு..!!

23 February 2021, 9:23 am
ration shop - updatenews360
Quick Share

சென்னை: தமிழக ரேஷன் கடை ஊழியர்களுக்கு தொகுப்பூதியத்தை உயர்த்தி தமிழக அரசு அரசாணை வெளியிட்டுள்ளது.

தமிழகத்தில் செயல்பட்டு வரும் ரேஷன் கடைகளில் பணியாற்றி வரும் ஊழியர்கள் தங்களது சம்பளத்தை உயர்த்த வேண்டும் என்று நீண்ட காலமாக கோரிக்கை விடுத்து வருகின்றனர். ஆனால், அவர்களது கோரிக்கைகள் அரசால் கண்டுகொள்ளப்படாமல் இருந்தது.

இதனிடையே, பொங்கல் பரிசுத் தொகுப்பு அறிவிக்கப்பட்ட போது, அதனை வழங்காமல் புறக்கணிப்போம் என்று கூறி ரேஷன் ஊழியர்கள் தங்களது எதிர்ப்பை காட்டினார். தமிழகத்தில் உள்ள 33 ஆயிரம் ரேஷன் கடைகளில் பணியாற்றி வரும் 21 ஆயிரத்து 600 விற்பனையாளர்கள், 3 ஆயிரத்து 800 எடையாளர்கள் ஆகியோரின் நலன் காக்கும் வகையில் தமிழக அரசு ஆலோசனை நடத்தியது.

அதில், ரேஷன் கடை ஊழியர்களின் சம்பள உயர்வு பற்றி விவாதிக்கப்பட்டதாக தெரிகிறது. இந்நிலையில், தமிழக ரேஷன் கடை பணியாளர்களுக்கு தொகுப்பூதியம் உயர்த்தி தமிழக அரசு அரசாணை வெளியிட்டுள்ளது. அதன்படி, விற்பனையாளர்களுக்கான தொகுப்பூதியம் ரூ.5000 லிருந்து ரூ.6,250 ஆக உயர்த்தப்படுகிறது. ஓராண்டு பணி நிறைவு செய்த விற்பனையாளர்களுக்கு காலமுறை ஊதியமாக ரூ.8,600 – ரூ.29,000 வரை வழங்கப்படும். மேலும், கட்டுனர்களுக்கான தொகுப்பூதியம் ரூ.4,250 லிருந்து ரூ.5,500 ஆக உயர்த்தப்பட்டுள்ளது.

ஓராண்டு பணி முடித்த கட்டுனர்களுக்கு காலமுறை ஊதியமாக ரூ.7,800 – ரூ.26,000 வழங்கப்படும் என்று அரசாணையில் தெரிவிக்கப்பட்டுள்ளது. தமிழகத்தில் விரைவில் சட்டமன்ற தேர்தல் நடைபெறவுள்ள நிலையில், பல்வேறு சலுகைகளை அரசு அறிவித்து வருகிறது. அந்த வகையில், ரேஷன் கடை ஊழியர்களின் சம்பளம் உயர்த்தப்பட்டுள்ளது. இதனால், ரேசன் கடை ஊழியர்கள் மகிழ்ச்சியடைந்துள்ளனர்.

Views: - 11

0

0