“சொன்ன வாக்கை காப்பாற்றிய என் தேனிக்கார நண்பர்”- குணமடைந்த பாரதிராஜாவிற்கு கமல்ஹாசன் வாழ்த்து..!

இயக்குநர் பாரதிராஜா மருத்துவமனையில் இருந்து வீடு திரும்பிய தகவலை தன்னுடன் பகிர்ந்து கொண்டதாக நடிகர் கமல்ஹாசன் தெரிவித்துள்ளார்.

உடல்நலக்குறைவால் பாதிக்கப்பட்டிருந்த இயக்குநர் பாரதிராஜா கடந்த சில நாட்களுக்கு முன்புதான் அமைந்தகரையில் உள்ள தனியார் மருத்துவமனையில் சிகிச்சை பெற்று வீடு திரும்பினார். இந்நிலையில் அவருக்கு மீண்டும் உடல்நலக்குறைவு ஏற்பட்டு கடந்த வாரம் மருத்துவமனையில் அனுமதிக்கப்பட்டார்.

அவருக்கு சிறுநீராக பாதையில் அடைப்பு ஏற்பட்டதால் அதற்கான சிகிச்சை அளிக்கப்பட்டது. இயக்குநர் பாரதிராஜாவுக்கு அடிக்கடி உடல் நலக்குறைவு ஏற்படுவது அவரது ரசிகர்கள் மட்டுமின்றி திரைத்துறையினருக்கும் கவலை ஏற்படுத்தி வருகிறது.

இந்நிலையில் பாரதிராஜா நேற்று மருத்துவமனையில் இருந்து வீடு திரும்பியுள்ளார். வீடு திரும்பிய கையோடு நடிகர் கமல்ஹாசனை போனில் தொடர்பு கொண்டு தான் வீடு திரும்பிய தகவலை தெரிவித்துள்ளார். இதனை கமல்ஹாசன் தனது டிவிட்டர் பக்கத்தில் தெரிவித்துள்ளார்.

அதில் “நலம் பெற்று வீடு திரும்பிய திரு. பாரதிராஜா, அம்மகிழ்ச்சியான செய்தியை இன்று என்னுடன் தொலைபேசியில் பகிர்ந்து கொண்டார். மருத்துவமனையில் நலம் விசாரிக்கச் சென்றபோது, ஆஸ்பத்திரியில் உங்களைப் பார்க்க எனக்குப் பிடிக்கவில்லை.. சீக்கிரம் வீடு திரும்புங்கள், நான் புறப்படுகிறேன் என்று சொன்னேன். Ok see you later for sure, Bye என்று ஆங்கிலத்தில் சொல்லி வழியனுப்பினார். சொன்ன வாக்கைக் காப்பாற்றிய என் தேனிக்கார நண்பருக்கு இந்தப் பரமக்குடியானின் வாழ்த்துக்கள்”… இவ்வாறு நடிகர் கமல்ஹாசன் தனது டிவிட்டர் பக்கத்தில் குறிப்பிட்டுள்ளார்.