தந்தை, சித்தியை கொடூரமாக கொலை செய்த மகன்.. கை, கால்களை வெட்டி சாக்கு மூட்டையில் பார்சல்..!!

சேலம் மாவட்டம், இடங்கணசாலை நகராட்சிக்கு உட்பட்ட கோனேரிப்பட்டி, பூசாரிக்காடு பகுதியைச் சேர்ந்தவர் பழனிசாமி (47), கூலித் தொழிலாளி. இவரது மனைவி ஜெயந்தி. குடும்பத் தகராறு காரணமாக ஜெயந்தி தனது தாய் வீட்டிற்குச் சென்றுவிட்டார்.

இதனைத் தொடர்ந்து, கடந்த நான்கு ஆண்டுகளாக பழனிசாமி, ஜெயலட்சுமி (35) என்பவருடன் குடும்பம் நடத்தி வந்தார். இவர்களுடன், ஜெயலட்சுமியின் மகள் கனகவல்லி (18) மற்றும் பழனிசாமியின் மகன் ஆகாஷ் (23) ஆகியோர் ஒரே வீட்டில் வசித்து வந்தனர்.

கடந்த 16-ம் தேதி இரவு, பழனிசாமி, கனகவல்லியிடம் பாலியல் துன்புறுத்தலில் ஈடுபட்டதாகவும், இதற்கு ஜெயலட்சுமி உடந்தையாக இருந்ததாகவும், இந்த தகவலை ஆகாஷிடம் கூறி அழுதுள்ளார் கனகவல்லி.

இதனால் ஆத்திரமடைந்த ஆகாஷ், கோபத்தின் உச்சத்தில், பழனிசாமி மற்றும் ஜெயலட்சுமியை கட்டையால் தாக்கி கொலை செய்தார். பின்னர், கத்தியால் இருவரது உடல்களையும் துண்டித்து, தலை, கை, கால்களை தனித்தனியாக வெட்டினார்.

ஆகாஷ், வெட்டப்பட்ட உடல் பாகங்களை சாக்கு மூட்டைகளில் கட்டி, ஏகாபுரம் ஏரியில் தலை மற்றும் கைகளையும், மகுடஞ்சாவடி அருகே உள்ள அ.தாழையூர் ஏரியில் உடலின் மற்ற பாகங்களையும் வீசினார்.

இதுகுறித்து ஊர்மக்கள் அளித்த புகாரின் பேரில், சேலம் மாவட்ட காவல் கண்காணிப்பாளர் கவுதம் கோயல் சம்பவ இடத்திற்கு நேரில் சென்று விசாரணை மேற்கொண்டார். விசாரணையைத் தொடர்ந்து, ஆகாஷ் மற்றும் கனகவல்லி ஆகியோரை காவல்துறையினர் கைது செய்தனர்.

விசாரணையில் கனகவல்லியை, ஆகாஷ் காதலித்து வந்ததாகவும், இருவரும் தனிமையில் இருந்ததை பார்த்த ஜெயலட்சுமி கண்டித்து பழனிசாமியிடம் கூறியுள்ளார்.

அவள் உனக்கு தங்கை முறை என பழனிசாமி கூறியுள்ளார். இதனால் காதலர்கள் இருவரும்,தாய் தந்தையை கொலை செய்ய திட்டமிட்டு, இந்த முடிவை எடுத்ததாகவும் கூறப்படுகிறது.

உடல் பாகங்கள் மீட்கப்பட்டு, பிரேத பரிசோதனைக்காக சேலம் அரசு மருத்துவமனைக்கு அனுப்பி வைக்கப்பட்டன. இந்த கொடூர சம்பவம், சேலம் மாவட்டத்தில் பெரும் அதிர்ச்சியையும் பரபரப்பையும் ஏற்படுத்தியுள்ளது.