வலதுசாரி அரசியல் நாடகம்.. சீமான் பாஜகவின் கொ.ப.செ? – திருமாவளவன் கேள்வி!

தமிழகத்தில் ஒரு தலித் முதலமைச்சராக வேண்டும் என ஆளுநர் பேசியது, தலித்துகளை அபகரிக்கும் சூழ்ச்சி என திருமாவளவன் கூறியுள்ளார்.

சென்னை: சென்னை கோடம்பாக்கத்தில் உள்ள அம்பேத்கர் சமூக நலக் கூடத்தில், தோழர் எஸ்.நடராஜன் படத் திறப்பு விழா இன்று (ஜன.28) நடைபெற்றது. இதில், விடுதலைச் சிறுத்தைகள் கட்சியின் தலைவரும், எம்பியுமான திருமாவளவன் பங்கேற்று, எஸ்.நடராஜனின் உருவப்படத்தை திறந்து வைத்தார்.

இதனையடுத்து, செய்தியாளர்களைச் சந்தித்த திருமாவளவன், “ஆளுநர் ஆர்.என்.ரவி மீண்டும் மீண்டும், த்ன்னை ஒரு அரசியல்வாதியாகவே அடையாளப்படுத்திக் கொள்கிறார். ஆளுநர் என்ற தன்னுடைய பொறுப்பை மறந்து பேசுவதும், செயல்படுவதும் நீடிக்கிறது.

தமிழகத்தில் ஒரு தலித் முதலமைச்சராக வேண்டும் என ஆளுநர் பேசியது, தலித்துகளை அபகரிக்கும் சூழ்ச்சி. தலித்துகளைப் பற்றி கரிசனமாக பேசுவது, தலித்துகள் முதல்வராக வேண்டும் என்பது வலதுசாரி அரசியல் நாடகம்.

பாஜகவின் கொள்கைப் பரப்புச் செயலாளராக சீமான் செயல்படுகிறாரோ? என்ற சந்தேகம் ஏற்படுகிறது, தமிழ்த் தேசியம் பேசும் சீமான், தமிழர்களுக்கு எதிராக செயல்படுகிறார். ஈரோடு கிழக்குத் தேர்தலில் பாஜகவின் ஆதரவாளர்கள் வாக்கைப் பெறுவதற்காக, சீமான் அவதூறுகளைப் பரப்பி வருகிறார்.

இதையும் படிங்க: ’என்ன அண்ணாமலை.. உன்னையும் சேர்த்துதான்..’ நீ கூட களத்துக்கு போறதில்ல.. அன்புமணி பரபரப்பு பேச்சு!

சீமான் செய்யும் அரசியல் அதிர்ச்சியளிக்கிறது. தமிழ்நாட்டில் இப்போது பெரியாரை எதிர்க்க வேண்டிய, விமர்சிக்க வேண்டிய அவசியம் என்ன? என்று புரியவில்லை. பாஜக ஆதரவாளர்கள் வாக்குகளைப் பெறவே இந்த யுக்தியைக் கையாளுகிறாரா? என்று ஐயம் எழுகிறது.

தமிழ்த் தேசியம் என்ற பெயரால் தமிழர்களுக்கு எதிரான அரசியலை சீமான் ஏன் செய்கிறார்? என்ற கேள்வி எழுகிறது. இது அவருடைய எதிர்காலத்திற்கும் நல்லதல்ல என்பதை, நான் ஏற்கனவே சுட்டிக்காட்டியது போல், மீண்டும் ஒருமுறை சுட்டிக் காட்டுகிறேன்” எனத் தெரிவித்துள்ளார்.