13 வயது சிறுமி கூட்டு பாலியல் பலாத்காரம்..! பாஜக நிர்வாகி, இன்ஸ்பெக்டர் உள்பட 11 பேர் கைது..!

24 November 2020, 10:57 am
Chennai_POCSO_UpdateNews360
Quick Share

சென்னையின் வண்ணாரப்பேட்டை பகுதியில், கணவனை இழந்த பெண் ஒருவர், தனது 13 வயது மகளுடன் தனியாக வசித்து வருகிறார். கடந்த இரண்டு மாதங்களுக்கு முன், வியாசர்பாடியில் உள்ள சிறுமியின் தாயின் அக்கா மகளான ஷாகிதா பானு, தனக்கு உடல்நலம் சரியில்லை என்பதால், தன்னை கவனித்துக் கொள்ள சிறுமியை அனுப்பும்படி கேட்டுள்ளார்.

ஷாகிதா பானுவும் கணவரை இழந்த நிலையில், மதன் குமார் என்பவரை மறு திருமணம் செய்து வியாசர்பாடியில் வசித்து வருகிறார். இந்நிலையில் ஷாகிதா பானுவின் வீட்டிற்கு வந்த சிறுமியை, அவரது கணவர் மதன் குமார் பாலியல் பலாத்காரம் செய்ததாகக் கூறப்படுகிறது.

மேலும் ஷாகிதா பானு, அவரது கணவர் மதன் குமார் மற்றும் மதன் குமாரின் தங்கையும் பாலியல் தொழில் செய்பவருமான சந்தியா ஆகியோர் சிறுமியை மிரட்டி பாலியல் தொழிலில் ஈடுபடுத்தியுள்ளனர். மதன் குமாரின் நண்பர்கள் மற்றும் சந்தியாவின் நண்பர்கள் என பலர் மாறி மாறி சிறுமியை நாசம் செய்துள்ளனர். இதன் மூலம் ஷாகிதா பானு குடும்பம் பணம் சம்பாதித்து வந்துள்ளது.

இதற்கிடையே சந்தியாவின் ரெகுலர் கஸ்டமரான, காசிமேடு பகுதியைச் சேர்ந்த பாஜக நிர்வாகி ராஜேந்திரனிடம் அதிக பணத்திற்கு ஆசைப்பட்டு அனுப்பியுள்ளனர். ராஜேந்திரனும், எண்ணூர் காவல்நிலைய இன்ஸ்பெக்டராக உள்ள அவரது நண்பர் புகழேந்தியும் குடிபோதையில் சிறுமியை கூட்டு பாலியல் பலாத்காரம் செய்துள்ளனர்.

இந்த சம்பவம் தொடர்ந்த நிலையில், தனது மகள் 2 மாதங்களாகியும் வீடு திரும்பாததால், ஷாகிதா பானுவின் வீட்டிற்கே நேரடியாகச் சென்றுள்ளார். அங்கு மகள் இல்லாததால், ஷாகிதா பானுவிடம் சண்டை போட்டுள்ளார்.

இதையடுத்து சந்தியாவிடமிருந்த சிறுமி அழைத்துவரப்பட்டு தாயிடம் ஒப்படைக்கப்பட்டார். இந்நிலையில் வீடு திரும்பிய பிறகு சிறுமி, தனது தாயிடம் நடந்த அனைத்தையும் கூறியதை அடுத்து, அவர் கடந்த 10’ஆம் தேதி, வண்ணாரப்பேட்டை அனைத்து மகளிர் காவல்நிலையத்தில் புகார் அளித்தார்.

புகாரின் பேரில் விசாரணை செய்த காவல்துறை, இன்ஸ்பெக்டர் புகழேந்தி, பாஜக நிர்வாகி ராஜேந்திரன் உள்ளிட்ட 11 பேர் மீது போக்சோ சட்டத்தின் கீழ் வழக்கு பதிவு செய்து, அவர்களை கைது செய்துள்ளது. மேலும் இந்த வழக்கில் வேறு யாரேனும் சம்பந்தப்பட்டுளார்களா என்பது குறித்து தீவிர விசாரணை நடந்து வருகிறது.

Views: - 3

0

0