காட்டு மன்னார் கோவில் வெடிவிபத்தில் உயிரிழந்த 7 பேரின் குடும்பங்களுக்கு தலா ரூ. 2 லட்சம் நிவாரணம் : முதலமைச்சர் பழனிசாமி அறிவிப்பு

4 September 2020, 3:55 pm
Quick Share

கடலூர் மாவட்டம் காட்டுமன்னார் கோவில் அருகே ஏற்பட்ட வெடிவிபத்தில் உயிரிந்த 7 பெண்களின் குடும்பங்களுக்கு தலா ரூ.2 லட்சம் நிவாரணம் வழங்கப்படும் என முதலமைச்சர் எடப்பாடி பழனிசாமி அறிவித்துள்ளார்.

இது தொடர்பாக அவர் வெளியிட்டுள்ள அறிவிப்பில் கூறியிருப்பதாவது :- கடலூர்‌ மாவட்டம்‌, காட்டுமன்னார்கோவில்‌ வட்டம்‌, குருங்குடி கிராமத்தில்‌ இயங்கி வந்த பட்டாசுத்‌ தொழிற்சாலையில்‌ இன்று ஏற்பட்ட வெடி விபத்தில்‌, பட்டாசு தயாரிக்கும்‌ பணியில்‌ ஈடுபட்டிருந்த சின்னதுரை என்பவரின்‌ மனைவி காந்திமதி, பெருமாள்‌ என்பவரின்‌ மனைவி மலாகொடி, நம்பியார்‌ என்பவரின்‌ மனைவி லதா, மாதவன்‌ என்பவரின்‌ மனைவி ராசாத்தி, உத்திராபதி என்பவரின்‌ மனைவி சித்ரா, ராஜேந்திரன்‌ என்பவரின்‌ மனைவி ருக்மணி மற்றும்‌ ரங்கநாதன்‌ என்பவரின்‌ மனைவி ரத்தினம்மாள்‌ ஆகிய ஏழு நபர்கள்‌ உயிரிழந்தனர்‌ என்ற செய்தியை அறிந்து நான்‌ மிகுந்த வேதனை அடைந்தேன்‌.

இந்த துயர சம்பவத்தில்‌ அகால மரணமடைந்த ஏழு நபர்களின்‌ குடும்பத்தினருக்கு எனது ஆழ்ந்த இரங்கலையும்‌, அனுதாபத்தையும்‌ தெரிவித்துக்‌ கொள்கிறேன்‌. இந்த துயரச்‌ செய்தி குறித்து அறிந்தவுடன்‌, மீட்புப்‌ பணிகளை உடனடியாக மேற்கொள்ளவும்‌, காயமடைந்தவர்களுக்கு உயரிய சிகிச்சை அளிப்பதை உறுதி செய்யவும்‌, இறந்தவர்களின்‌ குடும்பத்தினரை நேரில்‌ சந்தித்து ஆறுதல்‌ கூறவும்‌ அவர்களுக்குத்‌ தேவையான அனைத்து உதவிகளை செய்யவும்‌ மாண்புமிகு தொழில்‌துறை அமைச்சர்‌ அவர்களுக்கும்‌, கடலூர்‌ மாவட்ட ஆட்சித்தலைவர்‌ அவர்களுக்கும்‌ நான்‌ உத்தரவிட்டுள்ளேன்‌.

இந்த துயரச்‌ சம்பவத்தில்‌ உயிரிழந்தவாகளின்‌ குடும்பங்களின்‌ குடும்ப நிலையினை கருத்தில்‌ கொண்டு அவர்களின்‌ குடும்பத்தினருக்கு தலா இரண்டு லட்சம்‌ ரூபாய்‌ முதலமைச்சரின்‌ பொது நிவாரண நிதியிலிருந்து வழங்க உத்தரவிட்டுள்ளேன்‌, எனக் குறிப்பிட்டுள்ளார்.

இதேபோல, ஈரோடு மாவட்டத்தில் அரசு பேருந்து மோதி உயிரிழந்த ஒரே குடும்பத்தைச் சேர்ந்த 4 பேருக்கும் தலா ரூ.1 லட்சம் இழப்பீடு வழங்கவும் முதலமைச்சர் எடப்பாடி பழனிசாமி ஆணையிட்டுள்ளார்.

Views: - 10

0

0