விழுப்புரத்தில் ஜெ., பெயரிலான பல்கலை.,த்தை தொடர்ந்து இயக்க வேண்டும் : தமிழக அரசுக்கு ஓபிஎஸ் வலியுறுத்தல்

3 July 2021, 4:49 pm
Quick Share

சென்னை : ஏழை, எளிய மக்கள் உயர்கல்வி பெற ஏதுவாக விழுப்புரத்தை தலைமையிடமாக கொண்ட அம்மா அவர்களின் பெயரிலான பல்கலைக் கழகத்தை தொடர்ந்து நடத்திட நடவடிக்கை எடுக்க வேண்டுமென தமிழக அரசுக்கு அதிமுக ஒருங்கிணைப்பாளர் ஓ.பன்னீர்செல்வம் வலியுறுத்தியுள்ளார்.

இது தொடர்பாக அவர் வெளியிட்டுள்ள அறிக்கையில் கூறியிருப்பதாவது :- ஒவ்வொரு ஆண்டும்‌ புதிதாக மருத்துவக்‌ கல்லூரிகள்‌, பொறியியல்‌ கல்லூரிகள்‌, சட்டக்‌ கல்லூரிகள்‌, கலை மற்றும்‌ அறிவியல்‌ கல்லூரிகள்‌ ஆங்காங்கே உருவாக்கப்படுவதும்‌, புதிதாக மாவட்டங்கள்‌, கோட்டங்கள்‌ வட்டங்கள்‌ பிரிக்கப்படுவதும்‌ ஏழையெளிய கிராமப்புற மாணவ, மாணவியர்‌ உயர்‌ கல்வி பெற வேண்டும்‌ என்பதற்காகவும்‌, ஏழையெளிய மக்கள்‌ அரசு நலத்‌ திட்டங்களை விரைந்து பெறவேண்டும்‌ என்பதற்காகவும்‌ தான்‌.

இதன்‌ அடிப்படையில்‌, மாண்புமிகு அம்மா அவர்களின்‌ ஆட்சிக்‌ காலத்தில்‌ பல்வேறு கல்லூரிகள்‌ தொடங்கப்பட்டன. இதனைத்‌ தொடர்ந்து, ஒரே ஆண்டில்‌ 11 மருத்துவக்‌ கல்லூரிகள்‌, மதுரையில்‌ எய்ம்ஸ்‌ மருத்துவமனை என்ற வரிசையில்‌, விழுப்புரம்‌ மாவட்ட மக்களின்‌ நீண்டநாள்‌ கோரிக்கையினை ஏற்று, திருவள்ளுவர்‌ பல்கலைக்கழகத்தை இரண்டாகப்‌ பிரித்து, விழுப்புரத்தை தலைமையிடமாகக்‌ கொண்டு புதிய பல்கலைக்கழகம்‌ உருவாக்கப்படும்‌ என்று மாண்புமிகு அம்மா அவர்களின்‌ வழியில்‌ நடைபெற்ற அனைத்திந்திய அண்ணா திராவிட முன்னேற்றக்‌ கழக ஆட்சியில்‌ அறிவிக்கப்பட்டது.

அதன்‌ அடிப்படையில்‌, விழுப்புரத்தை தலைமையிடமாகக் கொண்டு மாண்புமிரு அம்மா அவர்களின்‌ பெயரில்‌ புதிய பல்கலைக்கழகத்தை உருவாக்க 5-02-2021 அன்று தமிழ்நாடு சட்டமன்றப் பேரவையில்‌ சட்டமுன்வடிவு கொண்டு வரப்பட்டுள்ளதாக நிறைவேற்றப்பட்டு, பின்னர்‌ சட்டமாக்கப்பட்டது. இதனைத்‌ தொடர்ந்து அரசாணையும்‌ வெளியிடப்பட்டது. அதில்‌, 2021-22 ஆம்‌ கல்வியாண்டு முதல்‌ கடலூர்‌, விழுப்புரம்‌, கள்ளக்குறிச்சி மாவட்டங்களில்‌ உள்ள கல்லூரிகள்‌ இந்தப்‌ பல்கலைக்கழகத்தில்தான்‌ இணைப்பு பெற வேண்டும்‌ என்றும்‌ குறிப்பிடப்பட்டுள்ளது.

இந்தச்‌ சூழ்நிலையில்‌, பொதுத்‌ தேர்தல்‌ முடிந்து ஆட்சி மாற்றம்‌ ஏற்பட்டதையடுத்து, கல்லூரிகளுக்கான அறிவிப்பு திருவள்ளுவர்‌ பல்கலைக்கழகத்தின்‌ சார்பில்‌ வெளியிடப்பட்டுள்ளதாகவும்‌, அதில்‌ ஏற்கெனவே திருவள்ளுவர்‌ பல்கலைக்கழகத்தின்‌ இணைப்பு அந்தஸ்து பெற்றுள்ள விழுப்புரம்‌, கடலூர்‌, கள்ளக்குறிச்சி மாவட்டங்களில்‌ உள்ள கலை, அறிவியல்‌ கல்லூரிகள்‌ நடப்புக்‌ கல்வி ஆண்டிற்கான மாணவர்‌ சேர்க்கை மற்றும்‌ இணைப்பு பெற விண்ணப்பிக்க வேண்டும்‌ என்றும்‌, புதிதாக துவக்கப்பட்ட மாண்புமிகு அம்மா அவர்களின்‌ பெயரிலான பல்கலைக்கழகத்தின்‌ சார்பில்‌ எந்த அறிவிப்பும்‌ வெளியிடப்படவில்லை என்றும்‌ பத்திரிகைகளில்‌ செய்திகள்‌ வந்துள்ளன.

ஆசிரியர்‌ தேர்வு வாரியம்‌ கலைப்பு, ஒமந்தூரார்‌ அரசு மருத்துவமனை மாற்றம்‌ என்ற வரிசையில்‌ தற்போது மாண்புமிகு அம்மா அவர்களின்‌ பெயரிலான பல்கலைக்கழகத்தை மூடும்‌ முயற்சியில்‌ தி.மு.க. அரசு இறங்கியிருப்பது கண்டிக்கத்தக்கது. அனைத்திந்திய அண்ணா திராவிட முன்னேற்றக்‌ கழக ஆட்சியில்‌ உருவாக்கியவற்றையெல்லாம்‌ கலைப்பது என்பது ஏற்றுக்கொள்ளக்‌ கூடியதல்ல, ஒருவேளை மாண்புமிகு அம்மா அவர்களின்‌ பெயரில்‌ பல்கலைக்கழகம்‌ இருக்கக்கூடாது என்ற அரசியல்‌ காழ்ப்புணர்ச்சி காரணமாக இதுபோன்ற வேலைகளில்‌ தி.மு.க. ஈடுபடுகிறதோ என்ற சந்தேகம்‌ மக்களிடையே ஏற்பட்டுள்ளது, என தெரிவித்துள்ளது.

Views: - 198

0

0