கட்டிடம் இல்லாமல் கட்டாந்தரையில் கல்லூரி செயல்பட முடியாது: எய்ம்ஸ் சேர்க்கை நிராகரித்தமைக்கு அமைச்சர் விளக்கம்

Author: Udhayakumar Raman
12 September 2021, 2:55 pm
Quick Share

நெல்லை: எய்ம்ஸ் மருத்துவக்கல்லூரியில் மாணவர் சேர்க்கைக்கு ஒன்றிய அரசு அனுமதி அளித்துள்ள நிலையில் கட்டிடம் இல்லாமல் கட்டாந்தரையில் கல்லூரி செயல்பட முடியாது என நெல்லையில் மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் தெரிவித்துள்ளார்.

தமிழகத்தில் கொரோனா 3- வது அலையில் இருந்து பொதுமக்களை பாதுகாத்துக்கொள்ளும் வகையில் கொரோனா தடுப்பூசி தமிழகம் முழுதும் போடப்பட்டு வருகிறது. தடுப்பூசி போடுவதை அதிகப்படுத்தும் வகையில் தமிழகம் முழுவதும் மெகா தடுப்பூசி முகாம் இன்று நடைபெறுகிறது அந்தவகையில் நெல்லை மாவட்டத்தில் சுமார் ஒரு லட்சம் நபர்களுக்கு தடுப்பூசி போடும் இலக்கு நிர்ணயிக்கப்பட்டு மாவட்டம் முழுவதும் 952 முகாம்கள் அமைக்கப்பட்டு தடுப்பூசி போடும் பணிகள் காலை 7 மணி முதல் தொடங்கியுள்ளது. நெல்லை பாளையங்கோட்டை மனக்காவலம்பிள்ளை ஆரம்ப சுகாதார நிலையத்தில் நடந்த முகாமை மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் தொடங்கி வைத்து ஆய்வு செய்தார்.

இதனைத் தொடர்ந்து அவர் செய்தியாளர்களுக்கு அளித்த பேட்டியில், பொதுமக்கள் அனைவருக்கு தடுப்பூசி போடும் வகையில் இன்று தமிழகத்தில் மெகா தடுப்பூசி முகாமா 40 ஆயிரம் மையங்களில் 20 லட்சம் பேருக்கு தடுப்பூசி போட இலக்காக நிர்ணயிக்கப்பட்டு தடுப்பூசி போடப்பட்டு வருகிறது. ஒரே நாளில் தமிழகத்தில் அதிக பட்சமாக 6 லட்சத்து 12 ஆயிரம் பேருக்கு தடுப்பூசி போடப்பட்டுள்ளது. இதுவரை தமிழகத்தில் 3 கோடியே 74 லட்சத்து 8,989 பேர் தடுப்பூசி போட்டுக்கொண்டுள்ளனர் . தற்போது நடக்கும் சிறப்பு முகாமின் காரணமாக இன்று மாலைக்குள் ஊசி போட்டுக்கொண்டவர்களின் எண்ணிக்கை 4 கோடியை எட்டும் .நெல்லை மாவட்டத்தை பொறுத்தவரை 952 மையங்களில் தடுப்பூசி முகாம் நடக்கிறது. மாவட்டத்தில் 58,608 பேருக்கு ஊசி போட இலக்கு நிர்ணயிக்கப்பட்டு 62,650 மருந்துகள் அனுப்பப்பட்டுள்ளது.. கேரளமாநிலத்தின் எல்லையை ஒட்டிய தென்காசி , கன்னியாகுமரி, கோவை உள்ளிட்ட 9 மாவட்டங்களில் 100 சதவீதம் ஊசி தடுப்பூசி செலுத்த வேண்டும் என முதல்வர் உத்தரவிட்டுள்ளார்.

இந்தியாவில் மரபு அணு ஆய்வகம் 23 உள்ளது. கொரோனாவில் இருந்து மாறுபட்ட வைரசை கண்டறிய இந்த ஆய்வகம் தேவைப்படுகிறது. தமிழகத்தில் டெல்டா பிளஸ் வைரஸ் 10 பேருக்கு கண்டறியப்பட்டு அதில் ஒருவர் இறந்துவிட்டார் .9 பேர் நலமாக உள்ளனர். இதுபோன்ற வைரஸை கண்டறிய பெங்களுர் அனுப்பி 3 மாதகாலம் வரை காத்திருக்க வேண்டியுள்ளது. ஒரு பரிசோதனைக்கு 4 ஆயிரம் ரூபாய் வரை செலவாகிறது. எனவே இந்த ஆய்வகத்தை முதல்வர் மு.க.ஸ்டாலின் தமிழகத்தில் அமைக்க வேண்டும் என்று உத்தரவிட்டு பட்ஜெட்டிலும் அறிவிக்கப்பட்டது. இந்தியாவிலேயே முதன் முறையாக மாநில அரசின் நிர்வாகத்தில் செயல்படும் மர அணு ஆய்வகம் சென்னையில் 4 கோடி ரூபாய் மதிப்பில் அமைக்கப்பட்டுள்ளது. இதனை நாளை மறுநாள் முதல்வர் திறந்து வைக்கிறார். மாணவ-மாணவிகள் தங்களை உயிரை மாய்த்துக் கொள்வது சரியான முடிவாக இருக்காது தமிழக அரசு சிறப்பு தீர்மானம் சட்டமன்றத்தில் நாளை நிறைவேற்றுகிறது.

தொடர்ந்து நீட்டில் இருந்து விலக்கு பெறுவதற்கான அனைத்து முயற்சிகளையும் தமிழக அரசு செய்து வருகிறது. மதுரை எய்ம்ஸ் மருத்துவமனை பணிகள் ஏதும் துவங்காத நிலையில் 150 மாணவர்களை சேர்த்துக் கொள்ள மத்திய அரசு அனுமதி அளித்துள்ளது. ஆனால் வெறும் காம்பவுண்டு சுவரை மட்டும் வைத்துக்கொண்டு கட்டாந்தரையில் கல்லூரி துவங்க இயலாது. மதுரை மருத்துவக் கல்லூரி மருத்துவமனையில் அந்த மாணவர்களை படிக்க வைக்க வாய்ப்பு இல்லை .ஏற்கனவே அங்கு 250 மாணவர்கள் உள்ள நிலையில், மேலும் 150 பேர் சேர்க்க இயலாது கலைக் கல்லூரிகளில் மருத்துவ மாணவர்களை படிக்க வைப்பது என்பது சரியானதாக இருக்காது. தனியார் மருத்துவக் கல்லூரிகளில் எய்ம்ஸ் மாணவர் சேர்க்கை நடத்துவதும் ஜிப்மர் மருத்துவக் கல்லூரியில் சேர்ப்பது சரியான முடிவாக இருக்காது என மத்திய அரசுக்கு தமிழக அரசின் சார்பில் பதில் அனுப்பப்பட்டுள்ளது.

மேலும் அருகில் உள்ள மற்ற மருத்துவ கல்லூரிகளில் பிரித்து மாணவர் சேர்க்கை நடத்த அனுமதி கேட்கப்பட்டுள்ளது. அதற்கான அனுமதி கிடைத்தால் தமிழக அரசு மாணவர் சேர்க்கைக்கு தயாராக உள்ளது என தெரிவித்தார். இதனைத் தொடர்ந்து அமைச்சர் நெல்லை மாவட்ட ஆட்சியர் அலுவலகத்தில் செயல்பட்டுவரும் கொரோனா கட்டுப்பாட்டு மையத்தை பார்வையிட்டார். தொடர்ந்து சீதப்பற்பநல்லூர் கொரோனா தடுப்பூசி முகாமினைத் தொடங்கி வைத்தார்.இந்த நிகழ்ச்சியில் மாவட்ட ஆட்சியர் விஷ்ணு, நெல்லை பாராளுமன்ற உறுப்பினர் ஞானதிரவியம், சட்டமன்ற உறுப்பினர் அப்துல்வகாப், முன்னாள் சட்டப்பேரவைத் தலைவர் ஆவுடையப்பன், முன்னாள் சட்டமன்ற உறுப்பினர் ஏ.எல்.எஸ்.லட்சுமணன், தென்காசி வடக்கு மாவட்ட செயலாளர் செல்லத்துரை, உள்ளிட்டவர்கள் கலந்து கொண்டனர்.

Views: - 110

0

0