தருமபுரியில் தம்பதியினரை கொலை செய்த வழக்கு : மூன்று இளைஞர்கள் கைது: மூன்று பேர் தலைமறைவு

16 July 2021, 11:59 pm
Quick Share

தருமபுரி: தருமபுரி அருகே கடந்த 12 ந் தேதி தம்பதியினரை கொலை செய்த வழக்கில் மூன்று இளைஞர்கள் கைது செய்யப்பட்டுள்ளனர். மேலும் தலைமறைவாக உள்ள அதிமுக தகவல் தொழிற்நுட்ப பிரிவை சேர்ந்த ஒருவர் உட்பட 3 பேரை காவல் துறையினர் தேடிவருகின்றனர்.

தருமபுரி மாவட்டம் பாப்பிரெட்டிப்பட்டி அடுத்த பொம்மிடி அருகே உள்ள பில்பருத்தி கிராமத்தில் வயதான தம்பதியினர் கிருஷ்ண அய்யர் அவரது மனைவி ஓய்வு பெற்ற ஆசிரியை சுலோச்சனா ஆகிய இருவரும் தங்களுக்கு சொந்தமான தோட்டத்தில் விவசாயம் செய்து அங்கே உள்ள வீட்டில் வசித்து வந்தனர். அவர்களுக்கு ஒரு மகனும், இரண்டு மகள்கள்களும் உள்ள நிலையில் அவர்கள் திருமணமாகி வெளியூரில் வசித்து வருகின்றனர். இந்நிலையில் கடந்த 12 ந் தேதி கிருஷ்ணய்யர் மற்றும் அலரது மனைவி சுலோச்சனா ஆகிய இருவரும் வீட்டின் அருகே மர்மமான முறையில் கொலை செய்யபட்டு கிடந்தனர்.

தகவலறிந்த சேலம் சரக காவல் துறை துணை தலைவர் மகேஸ்வரி மற்றும் தருமபுரி காவல் துறை கண்காணிப்பாளர் கலைச்செல்வன் ஆகியோர் சம்பவ இடத்திற்கு நேரில் சென்று பார்வையிட்டு, தம்பதியினரை கொலை செய்த மர்ம நபர்களை பிடிக்க 2 துணை கண்காணிப்பாளர்கள் தலைமையில் 5 தனிப்படை அமைத்து விசாரணை மேற்கொண்டு வந்தனர்.தொடர்ந்து விசாரணையில் ஈடுபட்ட காவல் துறையினர் சந்தேகத்தின் பேரில் அதே கிராமத்தை சேர்ந்த பிரகாஷ்ராஜ், முகேஷ், ஹரிஷ், ஆகிய 3 இளைஞர்களை விசாரணை செய்ததில், கடந்த சில மாதங்களாக கொரோனா ஊரடங்கால் வேலை இன்றி இருப்பதால் அன்றாட செலவிற்கு பணமில்லாமல் தவித்த வருவதால் ஏதாவது வீட்டில் புகுந்து கொள்ளை அடிக்கலாம் என்று முடிவு செய்து தங்களது கிராமத்தில் தனியாக வசிக்கும் வயதான தம்பதிகளான கிருஷ்ண அய்யர் மற்றும் சுலோச்சனா வீட்டில் கொள்ளை அடிக்க முடிவு செய்து,

கடந்த 12ம் தேதி இரவு 10 மணிக்கு உள்ளே சென்று உறங்கிக் கொண்டிருந்த வயதான இருவரையும் வாயில் துணியை வைத்து அடைத்து, இருவரையும் வீட்டின் பின்பக்கம் தூக்கி சென்று கத்தியால் கழுத்தில் குத்தி கொலை செய்ததாகவும், மேலும் சுலோசனாவின் கழுத்தில் அணிந்திருந்த தங்கத் தாலிக்கொடி மற்றும் கம்மல் என ஏழரை சவரன் தங்க நகை, ஏடிஎம் கார்டுகள் மற்றும் செல்போன்கள் ஆகியவற்றை கொள்ளையடித்து சென்றுள்ளது தெரிய வந்தது. மேலும் தொடர்ந்து அவர்களிடம் விசாரணை செய்ததில் இவர்களோடு அதிமுக தகவல் தொழில் நுட்ப அணியை சேர்ந்த வேலவன் அவர்களது நண்பர்கள் சந்துரு மற்றும் எழிலரசன் ஆகிய 3 பேரும் தம்பதியனரின் கொலைக்கு உடந்தையாக இருந்தது தெரிய வந்தது.

இதனையடுத்து இக்கொலையில் ஈடுபட்ட பிரகாஷ்ராஜ், முகேஷ், ஹரிஷ் ஆகிய 3 இளைஞர்களையும் கைது செய்து அவர்களிடமிருந்து கொலைக்கு பயன்படுத்திய கத்தி, தங்க நகைகள், செல்போன்கள், ஏடிஎம் கார்டுகள் மற்றும் ரொக்கம் 18 ஆயிரம் ரூபாய் உள்ளிட்டவற்றை பறிமுதல் செய்தனர். மேலும் தலைமறைவாக உள்ள அதிமுக தகவல் தொழில் நுட்ப அணியை சேர்ந்த வேலவன் உள்ளிட்ட 3 பேரை காவல் துறையினர் தேடி வருகின்றனர்.

Views: - 188

0

0