என்.ஆர்.காங்கிரஸ் கட்சி தனித்து போட்டியிட ரங்கசாமியிடம் நிர்வாகிகள் வலியுறுத்தல்

3 March 2021, 2:36 pm
Quick Share

புதுச்சேரி: புதுச்சேரியில் பாஜக கூட்டணியில் இருந்து விலகி என்.ஆர்.காங்கிரஸ் கட்சி தனித்து போட்டியிட அக்கட்சியின் தலைவர் ரங்கசாமியிடம் நிர்வாகிகள் வலியுறுத்தியுள்ளனர்.

புதுச்சேரியில் சட்டமன்ற தேர்தல் வரும் ஏப்ரல் 6 தேதி நடைபெற உள்ள நிலையில் முக்கிய கட்சிகளான காங்கிரஸ் மற்றும் திமுக கூட்டணியை உறுதி செய்து தொகுதி பங்கீடு பேச்சுவார்த்தையை தொடங்கி உள்ளன. இந்நிலையில் பிரதான எதிர்க்கட்சியான என். ஆர். காங்கிரஸ், பாஜக மற்றும் அதிமுக வுடன் கூட்டணி அமைத்து தேர்தலை சந்திக்கும் என எதிர்பார்க்கப்பட்டது. இதனிடையே கடந்த இரண்டு தினங்களுக்கு முன் காரைக்கால் வந்த மத்திய உள்துறை அமைச்சர் அமித்ஷா புதுச்சேரியில் பாஜக தலைமையில் தான் ஆட்சி அமையும் என தெரிவித்திருந்தார்.

மேலும் முதலமைச்சராக ரங்கசாமியை அறிவிக்க பாஜக முன்வராத காரணத்தால் கூட்டணியில் விரிசல் ஏற்பட்டது. மேலும் கூட்டணியில் நீடிப்பதா வேண்டாமா என அக்கட்சியின் தலைவர் ரங்கசாமி குழப்பத்தில் இருந்தார். இந்நிலையில் பாஜகவுடனான கூட்டணி தொடர்வதா, வேண்டாமா என்பது குறித்து இறுதி முடிவு எடுக்க என். ஆர் காங்கிரஸ் கட்சியின் நிர்வாகிகள் கூட்டம் நடைபெற்றது. சாரம் பகுதியில் உள்ள தனியார் விடுதியில் நடைபெற்ற இந்த கூட்டத்தில் என். ஆர் காங்கிரஸ் சட்டமன்ற உறுப்பினர்கள், முன்னாள் அமைச்சர்கள் மற்றும் நிர்வாகிகள் கலந்து கொண்டனர்.

சுமார் இரண்டு மணி நேரம் நடைபெற்ற இந்த கூட்டத்தில் என். ஆர் காங்கிரஸ் தனித்துப் போட்டியிட நிர்வாகிகள் பெரும்பாலானவர்கள் வலியுறுத்தி, கூட்டணி குறித்து இறுதி முடிவு எடுக்கும் அதிகாரத்தை கட்சியின் தலைவர் ரங்கசாமியிடம் ஒப்படைத்ததாக கூறப்படுகிறது. மேலும் நாளைய தினம் கூட்டணியில் தொடர்வதா அல்லது விலகுவதாக என்பது குறித்து முடிவை ரங்கசாமி அறிவிப்பார் என எதிர்பார்க்கப்படுகிறது.

Views: - 11

0

0