கோவில்களின் சொத்துக்கள் பாதுகாக்கப்பட வேண்டும் என்பதே அரசின் நோக்கம்: அமைச்சர் சேகர்பாபு பேட்டி

7 July 2021, 3:54 pm
Quick Share

நெல்லை: தமிழக கோவில்களின் சொத்துக்கள் பாதுகாக்கப்பட வேண்டும் என்பதே தமிழக அரசின் நோக்கம் என்றும் இந்து சமய அறநிலையத்துறையில் எந்தபணிகளும் கடந்த ஆட்சியில் நடக்காமல் அறுவைச்சிகிச்சை செய்யும் நிலையில் உள்ளது. எனவே அனைத்து பணிகளும் குறிப்பிட்ட காலத்திற்குள் முடிக்க நடவடிக்கை எடுக்கப்படும் என இந்து சமய அறநிலையத்துறை அமைச்சர் சேகர்பாபு தெரிவித்துள்ளார்.

தமிழகத்தில் இந்து சமய அறநிலையத்துறையின் கட்டுப்பாட்டில் உள்ள தொன்மையான கோவில்களை அறநிலையத்துறை அமைச்சர் சேகர் பாபு தொடர்ந்து ஆய்வு செய்து வருகிறார் . இதன் தொடர்ச்சியாக இன்று நெல்லை வந்த அவர் தென் தமிழகத்தில் மிகவும் பிரசித்தி பெற்ற சிவாலயமான நெல்லையப்பர் காந்திமதியம்மன் திருக்கோவிலில் ஆய்வு மேற்கொண்டார் , சுவாமி சன்னதி , அம்பாள் சன்னதி , வசந்த மண்டபம் , கோவில் உட்பிரகாரம் , தெப்பக்குளம் ஆகியவற்றை பார்வையிட்டார் பின்னர் அவர் செய்தியாளர்களுக்கு அளித்த பேட்டியில்,தமிழகம் முழுவதும் உள்ள மிக தொன்மையான கோவில்களை துறை ரீதியாக ஆய்வு செய்து வருகிறேன்.இதுவரை 50 கோவில்களில் ஆய்வு செய்யப்பட்டுள்ளது.

நெல்லையப்பர் கோவிலில் பல்வேறு திருப்பணிகள் குறித்து ஆய்வு செய்யப்பட்டுள்ளது. நெல்லையப்பர் கோவிலில் சிதலமடைந்து திருப்பணிகள் நடக்க இருக்கும் மண்டபத்திற்கு பணிகள் மேற்கொள்ள தொல்லியல் துறை அனுமதி கோரப்பட்டுள்ளது. இங்குள்ள கருமாரி தெப்பம் முழுமையாக சீர் செய்ய நடவடிக்கை எடுக்கப்படும் .அதுபோன்று நவக்கிரஹ சந்திரன் சிலை சிதலமடைந்துள்ளது அதனை செப்பனிட நடவடிக்கை எடுக்கப்படுள்ளது. கோவிலுக்கு வரும் பக்தர்கள் அனைவருக்கும் அடிப்படை வசதிகள் செய்து கொடுக்கப்படும் . நெல்லையப்பர் கோவிலில் உள்ள வெள்ளி தேர் புனரமைக்கப்பட்டு 2 ஆண்டு காலத்தில் தேரோட்டம் நடத்த நடவடிக்கை எடுக்கப்படும் கோவில் யானை காந்திமதிக்கு 30 நாட்களுக்கு ஒருமுறை மருத்துவ பரிசோதனை நடத்தப்படுகிறது.

இது இனி 15 நாட்களுக்கு ஒருமுறை நடத்தப்படும். சுவாமி நெல்லையப்பருக்கு நடைபெற்றுவந்த மூலிகைத் தைல காப்பு நிகழ்ச்சி கடந்த சில ஆண்டுகளாக நடத்தப்படவில்லை என கூறப்படுகிறது. இந்த நிகழ்ச்சியை உடனடியாக நடத்த அறநிலையத்துறைக்கு அறிவுறுத்தப்பட்டுள்ளது தமிழகம் முழுவதும் இந்த ஆண்டு அதிகமான கோவில்களில் திருப்பணிகள் செய்யப்பட்டு கும்பாபிஷேகம் செய்யப்படும், தமிழக கோவில்களின் சொத்துக்கள் பாதுகாக்கப்பட வேண்டும் என்பதே தமிழக அரசின் நோக்கம். அறநிலையத்துறையில் கடந்த ஆட்சியில் எந்தப் பணிகளும் மேற்கொள்ளாமல் அறுவைச்சிகிச்சை செய்யும் நிலையில் உள்ளது. எனவே இனி குறிப்பிட்ட காலத்திற்குள் அனைத்துப்பணிகளும் மேற்கொள்ளப்படும் என தெரிவித்தார்.

இந்த நிகழ்ச்சியில் இந்துசமய அறநிலையத்துறை ஆணையர் குமரகுபரன், மாவட்ட ஆட்சியர் விஷ்ணு, பாளையங்கோட்டை சட்டமன்ற உறுப்பினர் அப்துல்வகாப், முன்னாள் சட்டப்பேரவைத் தலைவர் ஆவுடையப்பன், முன்னாள் சட்டமன்ற உறுப்பினர்கள் டி.பி.எம்.மைதீன்கான், ஏ.எல்.எஸ்.லட்சுமணன் உள்ளிட்டவர்கள் கலந்து கொண்டனர் .

Views: - 123

0

0