அமெரிக்க பெடரல் நீதிமன்றத்திற்கு தேர்வு செய்யப்பட்ட முதல் இந்திய வம்சாவளி பெண் நீதிபதி..! ஜோ பிடென் அறிவிப்பு..!

Author: Sekar
31 March 2021, 1:57 pm
Joe_Biden_UpdateNews360
Quick Share

அமெரிக்க ஜனாதிபதி ஜோ பிடன், இந்திய அமெரிக்கரான ரூபா ரங்கா புட்டகுந்தாவை கூட்டாட்சி நீதிமன்றத்தின் நீதிபதியாக நியமிப்பதற்கான அறிவிப்பை வெளியிட்டுள்ளார். ஆப்பிரிக்க-அமெரிக்க மற்றும் முஸ்லீம் அமெரிக்க வேட்பாளர்களை உள்ளடக்கிய உயர் நீதித்துறை பதவிகளுக்கான 10 வேறுபட்ட தேர்வுகளில் இவரின் தேர்வும் அடங்கியுள்ளது.

ஜனாதிபதி தேர்ந்தெடுத்துள்ள வேட்பாளர்களில், 10 பேர் பெடரல் சர்க்யூட் மற்றும் மாவட்ட நீதிமன்ற நீதிபதி பதவிகளுக்கும், ஒருவர் கொலம்பியா மாவட்டத்திற்கான உயர் நீதிமன்ற நீதிபதி பதவிக்கும் பரிந்துரைக்கப்பட்டுள்ளார்.

அமெரிக்க செனட்டால் உறுதி செய்யப்பட்டால், நீதிபதி புட்டகுந்தா, வாஷிங்டன் டி.சி மாவட்டத்திற்காக அமெரிக்க மாவட்ட நீதிமன்றத்தில் பணியாற்றும் முதல் ஆசிய அமெரிக்க பெண்ணாக இருப்பார் என்று வெள்ளை மாளிகை தெரிவித்துள்ளது.

நீதிபதி புட்டகுந்தா தற்போது டி.சி. வாடகை வீட்டுவசதி ஆணையத்தின் நிர்வாக நீதிபதியாக பணியாற்றுகிறார். 2019’ஆம் ஆண்டில் ஆணைக்குழுவில் சேருவதற்கு முன்பு, நீதிபதி புட்டகுந்தா 2013 முதல் 2019 வரை வழக்கறிஞராக பணியாற்றி வந்துள்ளார்.

நீதிபதி புட்டகுந்தா 2008 முதல் 2010 வரை டி.சி. உயர் நீதிமன்றத்தின் நீதிபதி வில்லியம் எம். ஜாக்சனுக்கும், 2010 முதல் 2011 வரை டி.சி. மேல்முறையீட்டு நீதிமன்றத்தின் மூத்த நீதிபதிகளுக்கும் சட்ட எழுத்தராக தனது சட்ட வாழ்க்கையைத் தொடங்கினார்.

நீதிபதி புட்டகுந்தா 2007’ஆம் ஆண்டில் ஓஹியோ மாநில மோரிட்ஸ் சட்டக் கல்லூரியில் தனது ஜூரிஸ் டாக்டர் பட்டம் பெற்றார்.

மேலும் தற்போது பிடெனால் தேர்வு செய்யப்பட்டவர்களில் மூன்று ஆப்பிரிக்க அமெரிக்க பெண்கள் மற்றும் ஒரு முஸ்லீம் அமெரிக்கரும் அடங்குவர். செனட் உறுதிப்படுத்தினால், நீதிபதி ஜாஹித் என் குரைஷி அமெரிக்க வரலாற்றில் முதல் முஸ்லீம் அமெரிக்க கூட்டாட்சி நீதிபதியாக இருப்பார்.

பாகிஸ்தானிய வம்சாவளியைச் சேர்ந்த நீதிபதி குரைஷி, நியூஜெர்சி மாவட்டத்திற்கான யு.எஸ். மாவட்ட நீதிமன்றத்திற்கான அமெரிக்காவின் மாஜிஸ்திரேட் நீதிபதியாக உள்ளார். அவர் 2019’இல் இந்த பதவிக்கு நியமிக்கப்பட்டார்.

Views: - 84

0

0