வருமான வரி கணக்குத் தாக்கல் செய்யாத விவகாரம்: 6 வழக்குகளில் இருந்து விடுவிக்கக் கோரிய மனுவை வாபஸ் பெற்றார் எஸ்.ஜே.சூர்யா!

சென்னை:

வருமான வரி கணக்கைத் தாக்கல் செய்யாதது தொடர்பாகத் தன் மீது தொடரப்பட்ட 6 வழக்குகளில் இருந்து தன்னை விடுவிக்கக் கோரி சென்னை உயர் நீதிமன்றத்தில் தாக்கல் செய்திருந்த மனுவை, நடிகர் மற்றும் இயக்குநர் எஸ்.ஜே.சூர்யா இன்று (செப். 18) திடீரென வாபஸ் பெற்றுள்ளார்.

வழக்கின் பின்னணி :

பிரபல நடிகரும் இயக்குநருமான எஸ்.ஜே.சூர்யா, கடந்த 2002-03 முதல் 2009-10 வரையிலான காலகட்டத்தில் மொத்தம் 6 மதிப்பீட்டு ஆண்டுகளுக்கு முறையாக வருமான வரி கணக்கைத் தாக்கல் செய்யவில்லை என வருமான வரித்துறை குற்றஞ்சாட்டியது. இதனையடுத்து, அவர் மீது வருமான வரித்துறை சார்பில் சென்னை எழும்பூரில் உள்ள பொருளாதாரக் குற்றவியல் நீதிமன்றத்தில் 6 வழக்குகள் தொடரப்பட்டன.

விடுவிக்கக் கோரிய மனுக்கள் தள்ளுபடி:

இந்த வழக்குகளை முழுமையாக ரத்து செய்யக் கோரி அவர் முன்பு தாக்கல் செய்திருந்த மனுக்களை, கடந்த 2022-ஆம் ஆண்டிலேயே சென்னை உயர் நீதிமன்றமும், அதனைத் தொடர்ந்து உச்ச நீதிமன்றமும் திட்டவட்டமாகத் தள்ளுபடி செய்திருந்தன.

இதனைத் தொடர்ந்து, எழும்பூர் நீதிமன்றத்தில் நடைபெற்று வரும் வழக்கில் இருந்து தன்னை விடுவிக்கக் கோரி எஸ்.ஜே.சூர்யா தரப்பில் "டிஸ்சார்ஜ்"  மனுத் தாக்கல் செய்யப்பட்டது. குற்றச்சாட்டுகளுக்கு முகாந்திரம் இருப்பதாகக் கருதிய எழும்பூர் நீதிமன்றம், அந்த மனுவையும் கடந்த ஜூலை மாதம் தள்ளுபடி செய்து உத்தரவிட்டது.

உயர் நீதிமன்றத்தில் மேல்முறையீடும், மனு வாபஸும்:

எழும்பூர் நீதிமன்றத்தின் இந்த உத்தரவை எதிர்த்து, சென்னை உயர் நீதிமன்றத்தில் எஸ்.ஜே.சூர்யா தரப்பில் சீராய்வு மனுக்கள் தாக்கல் செய்யப்பட்டன.

இந்த மனுக்கள் இன்று சென்னை உயர் நீதிமன்றத்தில் விசாரணைக்கு வந்தன. அப்போது, இந்த வழக்கில் இருந்து அவரை விடுவிப்பதற்கான முகாந்திரம் இல்லை எனவும், இதுபோன்ற மனுக்களைத் தொடர்ந்து விசாரிக்கத் தாங்கள் விரும்பவில்லை எனவும் நீதிபதிகள் அதிருப்தி தெரிவித்தனர். வழக்கை அவர் சட்டரீதியாகச் சந்தித்துதான் ஆக வேண்டும் என்பதை உயர் நீதிமன்றம் உணர்த்தியதைத் தொடர்ந்து, எஸ்.ஜே.சூர்யா தரப்பு வழக்கறிஞர் தங்களது மனுக்களை வாபஸ் பெற்றுக் கொள்வதாக நீதிமன்றத்தில் தெரிவித்தார். இதற்கு அனுமதி அளித்த உயர் நீதிமன்றம், மனு வாபஸ் பெறப்பட்டதாகப் பதிவு செய்து வழக்கை முடித்து வைத்தது.

விசாரணையை எதிர்கொள்ளும் சூழல்:

தன்னை விடுவிக்கக் கோரிய மனுவை எஸ்.ஜே.சூர்யா திரும்பப் பெற்றுள்ளதால், வருமான வரித்துறை தொடர்ந்த இந்த 6 வழக்குகளுக்கான சாட்சி விசாரணையை எழும்பூர் பொருளாதாரக் குற்றவியல் நீதிமன்றத்தில் அவர் நேரடியாக எதிர்கொண்டே தீர வேண்டிய சூழல் தற்போது உருவாகியுள்ளது.