"பழம்பெரும் நடிகை சௌகார் ஜானகிக்கு திடீர் உடல்நலக்குறைவு" - தீவிர சிகிச்சை பிரிவில் அனுமதி

சென்னை:

94 வயதான பழம்பெரும் நடிகையும், பத்மஸ்ரீ விருது பெற்றவருமான சௌகார் ஜானகி, வயது மூப்பு மற்றும் திடீர் உடல்நலக்குறைவு காரணமாக சென்னையில் உள்ள தனியார் மருத்துவமனை ஒன்றில் தீவிர சிகிச்சை பிரிவில் அனுமதிக்கப்பட்டுள்ளார்.

மருத்துவமனையில் அனுமதி:

சென்னை ஆழ்வார்பேட்டையில் வசித்து வரும் மூத்த நடிகை சௌகார் ஜானகிக்கு நேற்று இரவு திடீரென உடல்நலக்குறைவு ஏற்பட்டதைத் தொடர்ந்து, குடும்பத்தினர் அவரை மருத்துவமனையில் அனுமதித்துள்ளனர். தற்போது அவருக்கு மருத்துவர்கள் குழு தீவிர சிகிச்சை அளித்து வருவதாகவும், அவரது உடல்நிலை தொடர்ந்து கண்காணிக்கப்பட்டு வருவதாகவும் தெரிவிக்கப்பட்டுள்ளது.

7 தசாப்த கால கலைப்பயணம்:

1931-ஆம் ஆண்டு டிசம்பர் 12-ம் தேதி ஒருங்கிணைந்த மெட்ராஸ் மாகாணத்தில் பிறந்த இவர், 1950-ல் தனது திரைப்பயணத்தைத் தொடங்கினார்.

தமிழ், தெலுங்கு, மலையாளம், கன்னடம், ஹிந்தி எனப் பல மொழிகளில் சுமார் 400-க்கும் மேற்பட்ட திரைப்படங்களில் நடித்து முத்திரை பதித்துள்ளார்.

தமிழில் 1952-ஆம் ஆண்டு வெளியான 'வளையாபதி' இவரின் முதல் திரைப்படமாகும்.

தொடர்ந்து புதிய பறவை, நீர்க்குமிழி, எதிர் நீச்சல், இரு கோடுகள், உயர்ந்த மனிதன், தில்லு முல்லு, வெற்றிவிழா, ஹேராம் மற்றும் சமீபத்தில் சந்தானத்துடன் 'பிஸ்கோத்' உள்ளிட்ட பல படங்களில் தனது சிறப்பான நடிப்பை வெளிப்படுத்தியுள்ளார்.

பான் இந்தியா நாயகி:

1959-ஆம் ஆண்டு கன்னட மொழியில் வெளியான முதல் 'பான் இந்தியா' திரைப்படமான 'மகிஷாசுர மர்தினி' திரைப்படத்தில் பிரபல நடிகர் டாக்டர் ராஜ்குமாருடன் இணைந்து நடித்த பெருமையும் இவரைச் சாரும்.

விருதுகள் மற்றும் சிறப்புகள்:

இந்தியத் திரையுலகிற்கு இவர் ஆற்றிய நீண்ட நெடிய பங்களிப்பைப் பாராட்டி, இந்திய அரசு 2022-ஆம் ஆண்டு இவருக்குப் 'பத்மஸ்ரீ' விருது வழங்கி கௌரவித்தது. மேலும், பிலிம்பேர் விருதுகளையும், பல்வேறு மாநில அரசுகளின் விருதுகளையும் இவர் வென்றுள்ளார்.

மூத்த நடிகை சௌகார் ஜானகி விரைவில் குணமடைந்து வீடு திரும்ப வேண்டும் எனத் திரையுலகினரும், ரசிகர்களும் பிரார்த்தனை செய்து வருகின்றனர்.