"எம்.எல்.ஏ-க்கள் காரில் தேசியக் கொடியைப் பறக்கவிட அனுமதி உள்ளதா" - தேசியக் கொடி விதிகள் சொல்வது என்ன?

இந்தியாவின் இறையாண்மை, ஒற்றுமை மற்றும் பெருமையின் அடையாளமாகத் திகழும் தேசியக் கொடியை வாகனங்களில் பறக்கவிடுவதற்கு எனச் சில பிரத்யேக நெறிமுறைகள் உள்ளன. குறிப்பாக, சட்டப்பேரவை உறுப்பினர்கள் தங்களது கார்களில் தேசியக் கொடியைப் பயன்படுத்தலாமா என்ற கேள்விக்கு, 2002-ஆம் ஆண்டின் இந்திய தேசியக் கொடி விதிகள் மற்றும் மத்திய உள்துறை அமைச்சகத்தின் வழிகாட்டுதல்கள் தெளிவான விளக்கத்தை அளிக்கின்றன.

மோட்டார் வாகனங்களில் கொடியைப் பறக்கவிடும் உரிமை யாருக்கு?

மத்திய உள்துறை அமைச்சகத்தின் விதிகளின்படி மோட்டார் கார்களில் தேசியக் கொடியைப் பறக்கவிடும் சிறப்பு உரிமை (Privilege) ஒரு சில உயர் பதவிகளில் இருப்பவர்களுக்கு மட்டுமே வழங்கப்பட்டுள்ளது.

அவர்கள்:

குடியரசுத் தலைவர் மற்றும் துணைத் தலைவர்.

மாநில ஆளுநர்கள் மற்றும் துணைநிலை ஆளுநர்கள்.

பிரதமர், முதலமைச்சர்கள் மற்றும் மத்திய, மாநில அமைச்சர்கள்.

மக்களவை மற்றும் மாநில சட்டப்பேரவை சபாநாயகர்கள், துணை சபாநாயகர்கள்.

வெளிநாடுகளில் உள்ள இந்திய தூதரகத் தலைவர்கள்.

எம்.எல்.ஏ மற்றும் அமைச்சர்:என்ன வித்தியாசம்?

வெறும் எம்.எல்.ஏ தகுதியை மட்டும் வைத்துக்கொண்டு காரில் தேசியக் கொடியைப் பறக்கவிட அனுமதி இல்லை.

அமைச்சர் அல்லது சபாநாயகர்:

 ஒரு எம்.எல்.ஏ, மாநில அமைச்சராகவோ அல்லது சபாநாயகர்/துணை சபாநாயகராகவோ பதவியில் இருந்தால், அந்தப் பதவியின் அடிப்படையில் அவர் தனது வாகனத்தில் தேசியக் கொடியைப் பயன்படுத்தலாம்.

பொதுமக்களுக்கான அனுமதியும் வாகன விதிகளும்:

2022-ஆம் ஆண்டு விதிகளில் செய்யப்பட்ட திருத்தத்தின்படி, பொதுமக்கள் தங்கள் வீடுகளிலோ அல்லது திறந்தவெளிகளிலோ தேசியக் கொடியை இரவும் பகலும் கண்ணியத்துடன் பறக்கவிட அனுமதி உண்டு. ஆனால், இந்த அனுமதியைக் கொண்டு வாகனங்களிலும் கொடியைப் பறக்கவிடலாம் என நேரடியாக முடிவு செய்யக் கூடாது. வாகனங்களைப் பொறுத்தவரை, விதிவிலக்கு அளிக்கப்பட்ட முக்கியப் பிரமுகர்களைத்  தவிர, வேறு எவரும் கொடியைப் பயன்படுத்தக் கூடாது என்பது உறுதியான விதியாகும்.

தேசியக் கொடியின் மாண்பும் பொறுப்பும்:

ஒரு காரில் கொடி இருப்பதைப் பார்த்தவுடன் அவர்கள் சட்டத்தை மீறிவிட்டார்கள் என உடனடியாக முடிவெடுக்கக் கூடாது; மாறாக அவர்களின் முழுமையான பதவியையும், சூழலையும் ஆராய வேண்டும். தேசியக் கொடியைப் பயன்படுத்துவது வெறும் சம்பிரதாயம் மட்டுமல்ல. இது 1971-ஆம் ஆண்டின் தேசிய மாண்புக்கு இழுக்கு ஏற்படுத்துவதைத் தடுக்கும் சட்டத்துடன் தொடர்புடையது. "எனக்கு உரிமை இருக்கிறது" என்பதை விட, "சட்டம் என்ன சொல்கிறது" என்பதை உணர்ந்து, கொடியின் மாண்பைக் காப்பது ஒவ்வொரு மக்கள் பிரதிநிதியின் கடமையாகும்.