“கரப்பான் பூச்சியைத் தொடர்ந்து களமிறங்கும் 'ஈ' இளைஞர்களுக்காக ஆன்லைனில் உருவானது புதிய அரசியல் இயக்கம் மக்கி ஜனதா கட்சி!

புதுடெல்லி:

டெல்லி ஜந்தர் மந்தரில் தடையை மீறிப் போராடிய 'கரப்பான் பூச்சி ஜனதா கட்சி'  தலைவர்கள் கைது செய்யப்பட்ட பரபரப்பு அடங்குவதற்குள், அதே பாணியில் ஈயின் எமோஜியை குறியீடாகக் கொண்டு 'மக்கி ஜனதா கட்சி' என்ற புதிய அரசியல் இயக்கம் ஆன்லைனில் தொடங்கப்பட்டுள்ளது சமூக வலைத்தளங்களில் பேசுபொருளாகியுள்ளது.

'ஈ' எமோஜியும் இளைஞர் அரசியலும்:

 சமீபகாலமாக இந்திய அரசியல் களத்தில், குறிப்பாக இணையவெளியில், இளைஞர்கள் தங்களின் எதிர்ப்பை மிகவும் வித்தியாசமான மற்றும் நையாண்டி கலந்த வழிகளில் பதிவு செய்து வருகின்றனர். அதன் புதிய வடிவமாக தற்போது 'மக்கி ஜனதா கட்சி'  உதயமாகியுள்ளது.

இந்த இயக்கம் தங்களது அதிகாரப்பூர்வ அடையாளமாக 'ஈ' எமோஜியைப் பயன்படுத்துகிறது. தங்களின் சமூக வலைத்தளப் பக்கங்களில், "இது இளைஞர்களால், இளைஞர்களுக்காக உருவாக்கப்பட்டு இயங்கும் ஒரு புதிய அரசியல் இயக்கம்" என்று தங்களை அதிகாரப்பூர்வமாக அறிமுகப்படுத்திக் கொண்டுள்ளனர்.

CJP-யின் தொடர்ச்சியா MJP?

சமீபத்தில், தேர்தல் ஆணையத்திற்கு எதிராகவும், வாக்காளர் பட்டியலில் இருந்து 13 கோடி பெயர்கள் நீக்கப்பட்டதைக் கண்டித்தும் 'கரப்பான் பூச்சி ஜனதா கட்சி' என்ற அமைப்பு டெல்லியில் மாபெரும் போராட்டங்களை முன்னெடுத்தது. ஜந்தர் மந்தரில் தடையை மீறி நுழைந்த அதன் தலைவர்கள் சவுரவ் தாஸ், அஷுதோஷ் ரங்கா உள்ளிட்டோர் அதிரடியாகக் கைது செய்யப்பட்டனர்.

இந்தச் சம்பவம் தேசிய அளவில் இளைஞர்கள் மத்தியில் பெரும் தாக்கத்தை ஏற்படுத்திய நிலையில், அதன் தொடர்ச்சியாகவே இந்த 'மக்கி ஜனதா கட்சி'யும் ஆன்லைனில் முளைத்துள்ளது. அரசு நிர்வாகங்களுக்கு எதிரான தங்களது அதிருப்தியைப் பதிவு செய்ய, இளைஞர்கள் தற்போது இதுபோன்று தொடர்ச்சியாகப் புதிய டிஜிட்டல் இயக்கங்களை உருவாக்கி வருகின்றனர்.

வித்தியாசமான பெயர்களின் பின்னணி என்ன?

வழக்கமான அரசியல் கட்சிகள் போன்ற பெயர்களைத் தவிர்த்துவிட்டு, 'கரப்பான் பூச்சி', 'ஈ' (மக்கி) போன்ற பூச்சிகளின் பெயர்களை இளைஞர்கள் ஏன் தேர்ந்தெடுக்கிறார்கள் என்ற கேள்வி பலருக்கும் எழலாம்.

இதற்கு அரசியல் விமர்சகர்கள் கூறும் விளக்கம் "ஆட்சியாளர்களும், அதிகார வர்க்கத்தினரும் சாமானிய மக்களையும், இளைஞர்களின் கோரிக்கைகளையும் ஒரு பொருட்டாக மதிக்காமல் 'கரப்பான் பூச்சிகளைப் போலவும்', 'ஈக்களைப் போலவும்' அற்பமாக நினைத்து நசுக்கப் பார்க்கிறார்கள் என்பதை உணர்த்தவே, அதையே தங்களது கட்சியின் பெயராகவும் ஆயுதமாகவும் இளைஞர்கள் கையில் எடுத்துள்ளனர்" என்கின்றனர்.

டிஜிட்டல் போராட்டம் வீதிக்கு வருமா?

தற்போது முழுமையாக ஆன்லைனில் மட்டுமே செயல்படத் தொடங்கியுள்ள இந்த 'மக்கி ஜனதா கட்சி', இளைஞர்களின் வேலைவாய்ப்பின்மை, ஜனநாயக உரிமைகள், மற்றும் ஊழலுக்கு எதிரான விழிப்புணர்வுப் பதிவுகளை மீம்கள் மற்றும் ட்ரெண்டிங் ஹேஷ்டேக்குகள் மூலமாகத் தீவிரமாகப் பரப்பி வருகிறது.

'கரப்பான் பூச்சி ஜனதா கட்சி' ஆன்லைனில் தொடங்கி பின்னர் டெல்லி வீதிகளில் இறங்கிப் போராடியதைப் போல, இந்த 'மக்கி ஜனதா கட்சி'யும் விரைவில் களமிறங்கிப் போராடுமா என்ற எதிர்பார்ப்பு இளைய சமுதாயத்தினரிடையே எழுந்துள்ளது. வழக்கமான அரசியலைத் தாண்டி, இந்த 'பூச்சி' அரசியல் இணையத்தில் புதிய புரட்சியை ஏற்படுத்தி வருகிறது.