“எம்.எல்.ஏ-க்களுக்கு கார் மற்றும் மாதம் ரூ.1 லட்சம்” - தமிழக அரசின் அறிவிப்புக்கு சீமான் கடும் எதிர்ப்பு!

தமிழ்நாடு சட்டப்பேரவையில் 110-வது விதியின் கீழ், அனைத்து சட்டமன்ற உறுப்பினர்களுக்கும் அரசு சார்பில் கார் மற்றும் உதவித்தொகை வழங்கப்படும் என முதலமைச்சர் சி. ஜோசப் விஜய் அறிவித்தார். இந்த அறிவிப்புக்கு நாம் தமிழர் கட்சியின் தலைமை ஒருங்கிணைப்பாளர் சீமான் கடும் அதிருப்தியையும் எதிர்ப்பையும் பதிவு செய்துள்ளார்.

சீமானின் முக்கியக் கேள்விகள் மற்றும் விமர்சனங்கள்:

இந்தத் திட்டம் குறித்து அறிக்கை வெளியிட்டுள்ள சீமான், அரசின் பொருளாதார நிலை மற்றும் உறுப்பினர்களின் உண்மையான தேவை குறித்துப் பல்வேறு கேள்விகளை முன்வைத்துள்ளார்:

190 எம்.எல்.ஏ-க்களிடம் ஏற்கனவே கார் உள்ளது:

தற்போதுள்ள சட்டமன்ற உறுப்பினர்களில் சுமார் 190 பேர் தங்களது தேர்தல் பிரமாணப் பத்திரத்தில், தங்களுக்குச் சொந்தமாக மகிழுந்து (கார்) இருப்பதாக ஏற்கெனவே குறிப்பிட்டுள்ளனர். நிலைமை இப்படி இருக்க, மீண்டும் அவர்களுக்கு அரசு செலவில் கார் எதற்கு என அவர் கேள்வி எழுப்பியுள்ளார்.

பொருளாதார நெருக்கடியில் ஊதாரித்தனம் தேவையா?

ஆண்டுக்கு சுமார் 1 லட்சத்து 76 ஆயிரம் கோடி ரூபாய் கடனை நம்பி அரசு இயங்கிக் கொண்டிருக்கும் இந்தச் சூழ்நிலையில், எம்.எல்.ஏ-க்களுக்கு மாதம் தலா ஒரு லட்சம் ரூபாய் வழங்குவது எந்த வகையில் நியாயம்? இது தேவையற்ற ஊதாரித்தனம் என்று அவர் சாடியுள்ளார்.

மறைமுகக் கையூட்டா?

 அனைத்துக் கட்சி உறுப்பினர்களுக்கும் வாகனம் மற்றும் சலுகைகள் வழங்கினால், இனி எந்தக் கட்சி உறுப்பினராவது அரசை எதிர்த்துக் கேள்வி கேட்பாரா? அரசை விமர்சிக்காமல் இருப்பதற்காக வழங்கப்படும் மறைமுகக் கையூட்டா இது? என்றும் சீமான் விமர்சித்துள்ளார்.

நிதி எங்கிருந்து வந்தது?

ஆட்சிக்கு வந்தவுடன் நிதி நிலைமை குறித்து வெள்ளை அறிக்கை வெளியிட்டு, மக்கள் நலத்திட்டங்களுக்குப் பணம் இல்லை என்று கூறிய அரசுக்கு, இப்போது எம்.எல்.ஏ-க்களுக்குக் கார் வழங்க மட்டும் எங்கிருந்து பணம் வந்தது? என அடுக்கடுக்கான கேள்விகளை அவர் முன்வைத்துள்ளார்.

முதலமைச்சர் அறிவிப்பின் பின்னணி:

முன்னதாக, எம்.எல்.ஏ-க்கள் தங்கள் தொகுதிப் பணிகளை எவ்விதத் தடையுமின்றிச் சிறப்பாகச் செயல்படுத்துவதற்காக அரசு சார்பில் கார் வழங்கப்படும் என முதலமைச்சர் அறிவித்திருந்தார். மேலும், ஓட்டுநர் ஊதியம் மற்றும் எரிபொருளுக்காக மாதம் மொத்தம் ரூ. 1 லட்சம் வழங்கப்படும் எனத் தெரிவிக்கப்பட்டது.

பல புதிய எம்.எல்.ஏ-க்கள் எளிய பின்னணியில் இருந்து வந்திருப்பதால், தொகுதிப் பணிகளைத் திறம்படச் செய்ய இந்தச் சலுகைகள் உதவும் என்பதே அரசின் விளக்கமாக இருந்தது. எனினும், அரசின் கடன் சுமையைக் கருத்தில் கொண்டு, இந்த முடிவை மறுபரிசீலனை செய்ய வேண்டும் என்ற கோரிக்கை அரசியல் தளத்தில் வலுவாக எழுந்துள்ளது.