“மது அருந்துபவர்களுக்கு மட்டுமல்ல... இனி மது குடிக்காதவர்களும் டாஸ்மாக் பார் போகலாம்” - அதிரடி மாற்றங்களுக்குத் தயாராகும் தமிழக அரசு!

சென்னை:

தமிழ்நாட்டில் உள்ள டாஸ்மாக் பார்கள் இனி மது அருந்துபவர்களுக்கான இடமாக மட்டும் இல்லாமல், மது குடிக்காதவர்களும் சென்று தேநீர், காபி மற்றும் சிற்றுண்டிகளை உட்கொள்ளும் வகையில் முற்றிலும் புதிய தோற்றத்திற்கு மாற உள்ளன. இதற்கான புதிய டெண்டர் மற்றும் திருத்தப்பட்ட விதிகளின் வரைவை டாஸ்மாக் நிர்வாகம் விரைவில் வெளியிட உள்ளது.

முக்கிய மாற்றங்கள் என்னென்ன - மது குடிக்காதவர்களுக்கும் அனுமதி:

டாஸ்மாக் பார்கள் இனி மதுப்பிரியர்களுக்கான இடமாக மட்டும் செயல்படாது. மது அருந்தாத பொதுமக்களும் பார்களுக்குச் சென்று தேநீர், காபி மற்றும் பழச்சாறுகள் அருந்தும் வகையில் புதிய வசதிகள் அறிமுகப்படுத்தப்பட உள்ளன.

அதிகாரப்பூர்வ சமையலறைகள்:

இதுவரை பார்களில் உணவு சமைக்க அதிகாரப்பூர்வ அனுமதி இல்லாத நிலையில், புதிய விதிகளின்படி பார்களிலேயே பிரத்யேகமாக உணவு சமைக்க சமையலறைகள் அமைக்கப்பட உள்ளன. இந்த சமையலறைகள் வாடிக்கையாளர்கள் அமரும் இடத்தில் இருந்து தனியாகப் பிரிக்கப்பட்டிருக்க வேண்டும் எனவும், உணவுப் பாதுகாப்பு மற்றும் தர நிர்ணயச் சட்டத்தின்படி சுகாதாரமாகப் பராமரிக்கப்பட வேண்டும் எனவும் அறிவுறுத்தப்பட்டுள்ளது. இதன் மூலம் வாடிக்கையாளர்களுக்குச் சுடச்சுட தரமான சிற்றுண்டிகள் கிடைக்க வழிவகை செய்யப்பட்டுள்ளது.

கான்கிரீட் கட்டிடங்கள் மட்டுமே:

பார்களின் உள்கட்டமைப்பை மேம்படுத்தும் நோக்கில், இனி டாஸ்மாக் பார்கள் முறையான கான்கிரீட் கட்டிடங்களில் மட்டுமே செயல்பட வேண்டும். தகர சீட்டுகள், அஸ்பெஸ்டாஸ், மரம், மூங்கில், தார்பாய்கள் அல்லது ஓலைகளால் வேயப்பட்ட தற்காலிகக் கொட்டகைகளில் பார்களை நடத்த அனுமதி இல்லை.

புதிய டெண்டர் மற்றும் உரிமக் கட்டணம்:

பார்களின் உரிமக் காலம் 2 ஆண்டுகளில் இருந்து 3 ஆண்டுகளாக அதிகரிக்கப்பட உள்ளது. மேலும், நிலையான உரிமக் கட்டணத்திற்குப் பதிலாக, மாதாந்திர விற்பனையின் அடிப்படையில் மாறும் உரிமக் கட்டண முறை அமல்படுத்தப்பட உள்ளது.

100 மீட்டர் தூர விதி:

முன்பு மதுக்கடையின் உள்ளேயோ அல்லது ஒட்டியோ மட்டுமே பார் அமைக்க அனுமதி இருந்தது. ஆனால், புதிய விதிமுறைகளின்படி டாஸ்மாக் கடைகளில் இருந்து 100 மீட்டர் சுற்றளவுக்குள் பார்களை அமைக்க அனுமதி வழங்கப்பட்டுள்ளது.

எதிர்பார்ப்பும் எதிர்ப்பும்:

இந்த புதிய நடைமுறைகளின் மூலம் டாஸ்மாக் பார்கள் தூய்மையான மற்றும் பாதுகாப்பான சிற்றுண்டி மையங்களாகவும் செயல்படும் என எதிர்பார்க்கப்படுகிறது. அதே சமயம், கடைகளில் இருந்து 100 மீட்டர் தள்ளி பார்கள் அமைக்கப்படுவது பொதுமக்களுக்கு அசௌகரியத்தை ஏற்படுத்தக்கூடும் எனச் சில தரப்பினரிடையே கவலைகளும் எழுந்துள்ளன.