“கடும் நிதி நெருக்கடி - திமுகவின் 59 எம்எல்ஏ-க்களுக்கு அரசு கார் வேண்டாம்” - சட்டப்பேரவையில் உதயநிதி அறிவிப்பு!

சென்னை:

தமிழ்நாடு அரசு கடுமையான நிதி நெருக்கடியில் சிக்கியுள்ளதைக் கருத்தில் கொண்டு, திமுகவைச் சேர்ந்த 59 சட்டமன்ற உறுப்பினர்களும் அரசு வழங்கும் புதிய காரைப் பெற்றுக்கொள்ள மாட்டார்கள் என்று எதிர்க்கட்சித் தலைவர் உதயநிதி ஸ்டாலின் சட்டப்பேரவையில் இன்று அறிவித்துள்ளார்.

திமுகவின் முடிவு - உதயநிதி ஸ்டாலின் உரை:

சட்டப்பேரவையில் இன்று நடைபெற்ற விவாதத்தின் போது பேசிய எதிர்க்கட்சித் தலைவர் உதயநிதி ஸ்டாலின், மாநிலத்தின் நிதி நிலைமையைக் கருத்தில் கொண்டு முக்கிய அறிவிப்பு ஒன்றை வெளியிட்டார்.

கார் வேண்டாம்:

"தமிழ்நாடு அரசு ஏற்கனவே கடும் நிதி நெருக்கடியில் இருப்பதாக முதலமைச்சர் தொடர்ந்து கூறி வருகிறார். தற்போதைய சூழ்நிலையைக் கருத்தில் கொண்டு, திமுக தலைவர் மு.க. ஸ்டாலின் அவர்களின் அறிவுறுத்தலின் பேரில், திமுகவைச் சேர்ந்த 59 எம்எல்ஏ-க்களும் அரசிடமிருந்து வாகனங்களைப் பெற வேண்டாம் என ஒருமனதாக முடிவெடுத்துள்ளோம்" என்று அவர் தெரிவித்தார்.

யாருக்கு கார் தேவை?

 "மேலும், அரசுக்கு ஏற்படும் தேவையற்ற செலவுகளைக் குறைக்கும் நோக்கில், அனைத்து எம்எல்ஏ-க்களுக்கும் கார் வழங்குவதைத் தவிர்க்க வேண்டும். அதற்குப் பதிலாக, தேர்தல் வேட்புமனுவில் எம்எல்ஏ-க்கள் குறிப்பிட்டுள்ள சொத்து விவரங்களின் அடிப்படையில், பொருளாதாரத்தில் உண்மையிலேயே நலிவடைந்துள்ள உறுப்பினர்களுக்கு மட்டுமே அரசு வாகனங்கள் வழங்கப்பட வேண்டும்" என்று அவர் வலியுறுத்தினார்.

அமைச்சர் ஆதவ் அர்ஜுனாவின் பதிலடி:

எதிர்க்கட்சித் தலைவரின் இந்தக் கருத்துக்குப் பதிலளித்துப் பேசிய அமைச்சர் ஆதவ் அர்ஜுனா, வாகன ஒதுக்கீட்டில் அரசின் நிலைப்பாட்டை விளக்கினார்:

பின்தங்கிய எம்எல்ஏ-க்களுக்கு முன்னுரிமை:

"சட்டப்பேரவையில் புதிதாகத் தேர்ந்தெடுக்கப்பட்டவர்கள் மட்டுமின்றி, பொருளாதார ரீதியாக மிகவும் பின்தங்கிய ஏழ்மையான உறுப்பினர்களும் கணிசமாக இருக்கின்றனர். ஒரு சில எம்எல்ஏ-க்கள் இன்னமும் பேருந்துகளிலும், ரயில்களிலும்தான் பேரவைக்கு வந்து செல்கின்றனர். அவர்களுக்குக் கட்டாயம் வாகன வசதி செய்து தரப்படும்."

நாங்களும் கார் கேட்கப் போவதில்லை:

"முதலமைச்சரைப் பொறுத்தவரையில், அவையில் உள்ள அனைத்து உறுப்பினர்களும் சமமே. அதேசமயம், வசதி படைத்தவர்களுக்கு அரசு வாகனம் அவசியமில்லை. நான் உட்பட எங்கள் ஆளுங்கட்சியில் உள்ள பலரிடம் சொந்தமாக வாகனங்கள் உள்ளன. ஆகையால் நாங்களும் அரசிடம் இருந்து கார் வேண்டும் எனக் கேட்கப் போவதில்லை" என்று அவர் திட்டவட்டமாகத் தெரிவித்தார்.

அரசு பங்களா சர்ச்சை:

எம்எல்ஏ-க்களுக்கு கார் வழங்கும் விவாதத்தின் ஊடே, எதிர்க்கட்சித் தலைவருக்கு அரசு பங்களா ஒதுக்கப்பட்ட விவகாரமும் விவாதப் பொருளானது. "சொந்தமாக 3 வீடுகள் வைத்திருக்கும் எதிர்க்கட்சித் தலைவர் உதயநிதிக்கு எதற்காக அரசு பங்களா?" என அமைச்சர் ஆதவ் அர்ஜுனா சரமாரியாகக் கேள்வியெழுப்பியது அவையில் சலசலப்பை ஏற்படுத்தியது.