“தமிழ்நாட்டில் ஆக. 23-ஆம் தேதி ஈஷா கிராமோத்சவ மண்டல அளவிலான போட்டிகள்” - செப்டம்பர் 6-ல் ஆதியோகி முன்பு மாபெரும் இறுதிப்போட்டி!

சத்குருவின் ஈஷா அவுட்ரீச் அமைப்பால் ஆண்டுதோறும் நடத்தப்படும் பாரதத்தின் மாபெரும் கிராமப்புற விளையாட்டுத் திருவிழாவான 'ஈஷா கிராமோத்சவம்', இந்த ஆண்டு பல வடமாநிலங்களுக்கும் விரிவுபடுத்தப்பட்டு பிரம்மாண்டமாக நடைபெற்று வருகிறது. இதன் ஒரு பகுதியாக, தமிழ்நாட்டில் உள்ள 6 முக்கிய இடங்களில் வரும் ஆகஸ்ட் 23-ஆம் தேதி மண்டல அளவிலான விளையாட்டுப் போட்டிகள் நடைபெறவுள்ளன.

போட்டிகளின் சிறப்பம்சங்கள்:

யாருக்கான போட்டிகள்?

 இப்போட்டிகளில் கிராமப்புறங்களைச் சேர்ந்த விவசாயிகள், மீனவர்கள் மற்றும் தினசரி கூலித் தொழிலாளர்கள் மட்டுமே பங்கேற்க முடியும். தொழில்முறை விளையாட்டு வீரர்களுக்கோ அல்லது நகரங்களைச் சேர்ந்தவர்களுக்கோ இதில் அனுமதியில்லை. உழைக்கும் கிராமப்புற மக்களின் உடல் மற்றும் மனநலனை மேம்படுத்தி, அவர்களைக் கொண்டாட்ட மனநிலைக்குக் கொண்டு வருவதே இதன் நோக்கமாகும்.

விளையாட்டுகள்:

ஆண்களுக்கு வாலிபால் (கைப்பந்து) மற்றும் பெண்களுக்கு த்ரோபால் (எறிபந்து) போட்டிகள் நடத்தப்படுகின்றன.

10 மாநிலங்களுக்கு விரிவடைந்த கிராமோத்சவம்:

இதுவரை தென்னிந்தியாவில் மட்டுமே நடைபெற்று வந்த இந்த விளையாட்டுத் திருவிழா, இந்த ஆண்டு உத்தரப் பிரதேசம், ஹரியானா, இமாச்சலப் பிரதேசம், ஒடிசா மற்றும் மகாராஷ்டிரா ஆகிய 5 வட மாநிலங்களுக்கும் புதிதாக விரிவாக்கம் செய்யப்பட்டுள்ளது. தமிழ்நாடு, கேரளா, கர்நாடகா, தெலங்கானா, ஆந்திரா மற்றும் புதுச்சேரி ஆகியவற்றுடன் சேர்த்து மொத்தம் 10 மாநிலங்கள் மற்றும் 1 யூனியன் பிரதேசத்தில் இந்த ஆண்டு போட்டிகள் விறுவிறுப்பாக நடைபெற்று வருகின்றன. மேலும், இந்த ஆண்டு சுமார் ரூ. 1 கோடிக்கும் அதிகமான பரிசுத்தொகை வழங்கப்பட உள்ளது.

பிரம்மாண்ட இறுதிப்போட்டி:

தமிழ்நாட்டில் 70-க்கும் மேற்பட்ட இடங்களில் முதற்கட்ட கிளஸ்டர் அளவிலான போட்டிகள் நிறைவடைந்த நிலையில், மண்டல அளவிலான போட்டிகள் ஆகஸ்ட் 23 அன்று நடைபெறுகின்றன.

இந்த மண்டல அளவிலான போட்டிகளில் வெற்றி பெறும் அணிகள் பங்கேற்கும் மாபெரும் இறுதிப்போட்டி, வரும் செப்டம்பர் 6-ஆம் தேதி கோவையில் உள்ள ஆதியோகி வளாகத்தில் நடைபெறவுள்ளது.

கிராமப்புற இளைஞர்கள் வறுமை மற்றும் போதைப் பழக்கங்களுக்கு அடிமையாவதைத் தடுத்து, விளையாட்டின் மூலம் அவர்களுக்குப் புதிய வாழ்வாதார உத்வேகத்தை அளிக்கும் வகையில் இந்த ஈஷா கிராமோத்சவம் தொடர்ந்து செயல்பட்டு வருகிறது.