“சென்னை ஈஞ்சம்பாக்கத்தில் ஜெம் நிறுவனத்தின் நிலங்கள் விற்பனை” - வெளியானது வீரமணியின் ஆவணங்கள்!

சென்னை:

பாலியல் வழக்கில் சிக்கித் தொடர் விசாரணைகளை எதிர்கொண்டு வரும் 'ஜெம் கிரானைட்ஸ்' உரிமையாளர் வீரமணி, சென்னை ஈஞ்சம்பாக்கத்தில் உள்ள தனது நிறுவனத்திற்குச் சொந்தமான இரண்டு மதிப்புமிக்க நிலங்களை விற்றதற்கான ஆவணங்கள் தற்போது வெளியாகி பெரும் பரபரப்பை ஏற்படுத்தியுள்ளன.

விசாரணை வளையத்தில் வீரமணி:

சிறுமிகளுக்குப் பாலியல் தொல்லை அளித்ததாகப் பதிவு செய்யப்பட்ட வழக்கில் ஜெம் கிரானைட்ஸ் வீரமணி மீதான விசாரணை தீவிரமடைந்துள்ளது. இந்த வழக்கில் ஆரம்பத்தில் ஆதாரங்கள் இல்லை என முந்தைய ஆட்சியில் மூடி மறைக்கப்பட்டதாகக் குற்றச்சாட்டுகள் எழுந்த நிலையில், தற்போதைய அரசு சிறப்புப் படையை அமைத்து தீவிர விசாரணை மேற்கொண்டு வருகிறது. அவருக்கு உடந்தையாக இருந்த பலரும் அடுத்தடுத்துக் கைது செய்யப்பட்டு வருகின்றனர்.

ஈஞ்சம்பாக்கம் நிலம் விற்பனை:

இந்தச் சூழ்நிலையில், வழக்கு விசாரணை தீவிரமடைவதற்கு முன்பாகவே, கடந்த பிப்ரவரி மாதம் சென்னை ஈஞ்சம்பாக்கத்தில் உள்ள 'ஜெம்' நிறுவனத்திற்குச் சொந்தமான இரண்டு நிலங்களை வீரமணி விற்பனை செய்துள்ளார். இதற்கான பத்திரப் பதிவு மற்றும் நில விற்பனை ஆவணங்கள் தற்போது வெளியே கசிந்துள்ளன. பல கோடி ரூபாய் மதிப்பிலான இந்த நிலங்கள் அவசர அவசரமாக விற்கப்பட்டதா என்ற சந்தேகம் எழுந்துள்ளது.

பணப் பரிமாற்றத்தின் பின்னணி என்ன? தீவிரமாகும் விசாரணை:

தன் மீதான பிடி இறுகுவதை அறிந்தே வீரமணி தனது சொத்துக்களை விற்றுப் பணமாக மாற்றினாரா? என்ற கோணத்தில் போலீசார் விசாரணையைத் முடுக்கிவிட்டுள்ளனர். இந்த நில விற்பனை மூலம் கிடைத்த கோடிக்கணக்கான ரூபாய் பணம் எங்குப் பரிமாற்றம் செய்யப்பட்டது? வழக்கிலிருந்து தப்பிக்க இடைத்தரகர்கள் மூலமாக யாருக்கேனும் லஞ்சமாகக் கொடுக்கப்பட்டதா? அல்லது வேறு கணக்குகளுக்கு மாற்றப்பட்டதா? எனப் பல கேள்விகள் எழுந்துள்ளன.

அடுத்தகட்ட நடவடிக்கை:

ஏற்கனவே வீரமணி விவகாரத்தில் பல அதிர்ச்சியூட்டும் தகவல்கள் வெளியாகி வரும் நிலையில், தற்போது வெளியாகியுள்ள இந்த நில விற்பனை ஆவணங்கள் வழக்கில் புதிய திருப்பத்தை ஏற்படுத்தியுள்ளன. நிலத்தை வாங்கியவர்கள் யார்? என்பது குறித்தும், இந்தப் பணப் பரிவர்த்தனைகள் குறித்தும் விசாரணை அதிகாரிகள் முழுமையாக ஆய்வு செய்து வருகின்றனர். தேவைப்பட்டால் இந்தப் பணப் பரிமாற்றம் தொடர்பாக வருமான வரித்துறை அல்லது அமலாக்கத்துறையின் விசாரணையும் பாய வாய்ப்புள்ளதாக அரசியல் வட்டாரங்களில் கூறப்படுகிறது.