"சவுதி அரேபியா மீது ஹவுதி கிளர்ச்சியாளர்கள் ஏவுகணைத் தாக்குதல்" - பெண்கள், குழந்தைகள் உட்பட 73 பேர் படுகாயம்!

ரியாத்:

சவுதி அரேபியாவின் முக்கிய நகரங்களை குறிவைத்து ஏமன் நாட்டைச் சேர்ந்த ஹவுதி கிளர்ச்சியாளர்கள் இன்று (செப்டம்பர் 8) பலத்த ஏவுகணை மற்றும் ட்ரோன் தாக்குதல்களை நடத்தியுள்ளனர். இந்தத் தாக்குதல்களில் பொதுமக்கள் பலரும் படுகாயமடைந்துள்ளதால் எல்லையில் பெரும் பதற்றம் நிலவுகிறது.

தாக்குதலுக்கு உள்ளான நகரங்கள்:

ஹவுதி கிளர்ச்சியாளர்கள் சவுதி அரேபியாவின் தெற்குப் பகுதிகளில் உள்ள அப்ஹா,கமிஸ் முஷித்,ஜசன் மற்றும் நிஜ்ரன்  ஆகிய முக்கிய நகரங்களில் உள்ள பொருளாதார மையங்கள் மற்றும் பொதுமக்கள் வசிக்கும் பகுதிகளை குறிவைத்துத் தாக்குதல் நடத்தியுள்ளனர்.

'கிங் காலித்' விமானப் படைத்தளம் மற்றும் சவுதி அராம்கோ எண்ணெய் நிறுவனத்தின் சில மையங்கள் மீதும் டஜன் கணக்கான பாலிஸ்டிக் ஏவுகணைகள் மற்றும் ஆளில்லா ட்ரோன்களை வீசி அவர்கள் தாக்குதல் நடத்தியுள்ளனர்.

பாதிப்புகள் மற்றும் சேத விவரங்கள்:

சவுதி தலைமையிலான கூட்டுப் படைகளின்  செய்தித் தொடர்பாளர் மேஜர் ஜெனரல் துருக்கி அல்-மால்கி இந்தத் தாக்குதல் குறித்த அதிகாரப்பூர்வ தகவல்களை வெளியிட்டுள்ளார்.

காயமடைந்தவர்கள்:

இந்தத் தாக்குதல்களில் பெண்கள் மற்றும் குழந்தைகள் உட்பட சுமார் 73 பொதுமக்கள் படுகாயமடைந்துள்ளனர்.

பொருளாதாரத் தாக்கம்:

சவுதி அரேபியாவின் எரிசக்தித் துறை அமைச்சகம் வெளியிட்டுள்ள தகவலின்படி, தாக்குதலால் சில மையங்களில் தீ விபத்து ஏற்பட்டுள்ளது. இதனால் அங்கு நடைபெறும் சில முக்கிய செயல்பாடுகள் தற்காலிகமாக நிறுத்தி வைக்கப்பட்டுள்ளன.

கண்டனம்:

வளைகுடா நாடுகள், எகிப்து மற்றும் ஜோர்டான் உள்ளிட்ட நாடுகள் இந்தத் தாக்குதலைக் கடுமையாகக் கண்டித்துள்ளன.

சவுதி அரேபியாவின் எச்சரிக்கை:

ஹவுதி கிளர்ச்சியாளர்களின் இந்தச் செயலுக்கு சவுதி அரசு கடும் கண்டனம் தெரிவித்துள்ளது.

"பொதுமக்கள் மற்றும் பொருளாதார மையங்களைக் குறிவைத்து ஹவுதி கிளர்ச்சியாளர்கள் நடத்தியுள்ள இந்தத் தாக்குதல் சர்வதேசச் சட்டங்களுக்கு எதிரான ஒரு கொடூரமான செயல். இது சவுதியின் இறையாண்மை மீதான நேரடி அச்சுறுத்தல். இந்த பயங்கரவாதச் செயல்களுக்குப் படைகள் தகுந்த பதிலடி கொடுக்கும்," என மேஜர் ஜெனரல் துருக்கி அல்-மால்கி திட்டவட்டமாக எச்சரித்துள்ளார்.

ஹவுதி கிளர்ச்சியாளர்களின் தரப்பு என்ன?

இந்தத் தாக்குதலுக்குப் பொறுப்பேற்றுள்ள ஹவுதி கிளர்ச்சியாளர்கள், இது ஒரு 'பதிலடித் தாக்குதல்' எனத் தெரிவித்துள்ளனர்.

சமீபத்தில் ஏமனின் வடக்குப் பகுதியில் உள்ள ஜாஃப் (Jawf) மாகாணத்தில் உள்ள அல்-ஹஸ்ம் சிறைச்சாலையின் மீது சவுதி கூட்டுப் படைகள் நடத்திய வான்வழித் தாக்குதலில் ஒரு குழந்தை உட்படப் பலரும் கொல்லப்பட்டனர். அந்தத் தாக்குதல்களுக்கும், எல்லையில் சவுதி ராணுவம் தொடர்ந்து நடத்தி வரும் நடவடிக்கைகளுக்கும் பதிலடியாகவே சவுதி நகரங்கள் மீது தற்போது தாக்குதல் நடத்தியதாக ஹவுதி கிளர்ச்சியாளர்கள் கூறியுள்ளனர்.

ஏமன் உள்நாட்டுப் போரின் நீட்சியாக, இரு தரப்பிற்கும் இடையே மீண்டும் மோதல்கள் தீவிரமடைந்துள்ளதால் செங்கடல் மற்றும் வளைகுடா பிராந்தியங்களில் பாதுகாப்பற்ற சூழல் நிலவுகிறது.