“டி.என்.பி.எல் 2026: மதுரையை வீழ்த்தி 3-வது முறையாக சாம்பியன் பட்டம் வென்றது கோவை கிங்ஸ்” - இறுதிப்போட்டி முழு விவரம்!

தமிழ்நாடு பிரீமியர் லீக்(2026) தொடரின் மாபெரும் இறுதிப்போட்டியில் மதுரை பாந்தர்ஸ் அணியை 84 ரன்கள் வித்தியாசத்தில் வீழ்த்தி, விடா கோவை கிங்ஸ் அணி சாம்பியன் பட்டத்தைத் தட்டிச் சென்றது. சென்னை சேப்பாக்கம் எம்.ஏ. சிதம்பரம் மைதானத்தில் நேற்று (ஆகஸ்ட் 28) நடைபெற்ற இந்தப் போட்டியில் கோவை அணி பேட்டிங் மற்றும் பந்துவீச்சு என இரண்டிலும் அபாரமான ஆட்டத்தை வெளிப்படுத்தி 3-வது முறையாக மகுடம் சூடியுள்ளது.

அசத்திய கோவை சித்தார்த் - சச்சின் அபாரக் கூட்டணி :

இறுதிப்போட்டியில் டாஸ் வென்ற கோவை கிங்ஸ் அணியின் கேப்டன் ஷாருக்கான் முதலில் பேட்டிங்கைத் தேர்வு செய்தார். தொடக்க வீரர்கள் சற்று தடுமாறினாலும், 3-வது விக்கெட்டுக்கு இணைந்த ஆந்த்ரே சித்தார்த் மற்றும் பி. சச்சின் ஜோடி அதிரடியாக விளையாடி அணியின் ஸ்கோரை உயர்த்தியது.

ஆந்த்ரே சித்தார்த் அதிரடி:

 தொடக்கம் முதலே அதிரடி காட்டிய ஆந்த்ரே சித்தார்த் 47 பந்துகளில் 7 பவுண்டரிகள் மற்றும் 5 சிக்ஸர்களுடன் 82 ரன்களைக் குவித்து அசத்தினார்.

சச்சின் நிதானம்:

அவருக்கு உறுதுணையாக ஆடிய சச்சின் 33 பந்துகளில் 39 ரன்கள் எடுத்தார். இந்த ஜோடி 3-வது விக்கெட்டுக்கு 117 ரன்களைக் குவித்தது.

20 ஓவர்கள் முடிவில் கோவை கிங்ஸ் அணி 7 விக்கெட்டுகளை இழந்து 182 ரன்கள் என்ற வலுவான ஸ்கோரைப் பதிவு செய்தது. மதுரை அணி தரப்பில் சரவணன் அதிகபட்சமாக 4 விக்கெட்டுகளைக் கைப்பற்றினார்.

சரிந்த மதுரை - கோவை பந்துவீச்சாளர்களின் ஆதிக்கம்:

183 ரன்கள் என்ற கடினமான இலக்கைத் துரத்திய மதுரை பாந்தர்ஸ் அணிக்கு ஆரம்பமே அதிர்ச்சியாக அமைந்தது. தொடக்க வீரர்களான ராம்குமார் மற்றும் சித்தார்த் மகாதேவன் ஆகியோர் ரன் ஏதும் எடுக்காமல் ஆட்டமிழந்தனர்.

சதுர்வேத் போராட்டம்:

நெருக்கடியான நிலையில் விளையாடிய சதுர்வேத் மட்டும் சற்று தாக்குப்பிடித்து 28 பந்துகளில் 2 பவுண்டரிகள், 3 சிக்ஸர்களுடன் 40 ரன்கள் எடுத்தார்.

சுருண்ட விக்கெட்டுகள்:

 கேப்டன் அனிருத் 24 ரன்கள் எடுத்து ஆட்டமிழந்த பிறகு, பின்வரிசை வீரர்கள் அனைவரும் ஒற்றை இலக்க ரன்களில் ஆட்டமிழந்து ஏமாற்றம் அளித்தனர்.

இறுதியாக மதுரை அணி 14.2 ஓவர்களில் வெறும் 98 ரன்களுக்கு அனைத்து விக்கெட்டுகளையும் இழந்து 'ஆல் அவுட்' ஆனது. கோவை அணியின் சார்பில் சிறப்பாகப் பந்துவீசிய மணிமாறன் சித்தார்த் மற்றும் கேப்டன் ஷாருக்கான் தலா 3 விக்கெட்டுகளையும், தீபன் லிங்கேஷ் 2 விக்கெட்டுகளையும் வீழ்த்தி வெற்றியை உறுதி செய்தனர்.

பரிசு விவரம் மற்றும் சாதனைகள் - 3-வது முறையாக கோப்பை:

இந்த வெற்றியின் மூலம் கோவை கிங்ஸ் அணி 2022, 2023 ஆகிய ஆண்டுகளைத் தொடர்ந்து தற்போது 2026-ஆம் ஆண்டிலும் கோப்பையை வென்று, 3-வது முறையாக டி.என்.பி.எல் சாம்பியன் ஆகியுள்ளது.

பரிசுத்தொகை:

சாம்பியன் பட்டம் வென்ற கோவை கிங்ஸ் அணிக்கு ரூ. 20 லட்சமும், 2-வது இடம் பிடித்த மதுரை பாந்தர்ஸ் அணிக்கு ரூ. 10 லட்சமும் பரிசாக வழங்கப்பட்டது.