"கர்ப்பிணிகளுக்குக் காய்ச்சல் அறிகுறிகள் இருந்தால் கூடுதல் கவனம் தேவை" – பொது சுகாதாரத்துறை அதிரடி அறிவுறுத்தல்!

தமிழகத்தில் டெங்கு மற்றும் வைரஸ் காய்ச்சல் பரவல் அதிகரித்து வரும் சூழலில், கர்ப்பிணிப் பெண்களுக்குக் காய்ச்சல் அறிகுறிகள் கண்டறியப்பட்டால் அவர்களுக்குக் கூடுதல் கவனத்துடன் சிகிச்சை அளிக்க வேண்டும் எனப் பொது சுகாதாரத்துறை முக்கிய உத்தரவு பிறப்பித்துள்ளது.

பருவமழை மற்றும் தட்பவெப்ப நிலை மாற்றங்களால் மாநிலத்தின் பல்வேறு பகுதிகளில் காய்ச்சல் பாதிப்புகள் தொடர்ந்து பதிவாகி வரும் நிலையில், சுகாதாரத்துறை இந்த எச்சரிக்கையை விடுத்துள்ளது.

பொது சுகாதாரத்துறையின் முக்கிய அறிவுறுத்தல்கள்:

அனைத்து மாவட்ட சுகாதார இயக்குநர்கள் மற்றும் மருத்துவ அலுவலர்களுக்கும் பொது சுகாதாரத்துறை விடுத்துள்ள சுற்றறிக்கையி

 

ன் முக்கிய அம்சங்கள்:

டெங்கு மற்றும் வைரஸ் பரவல் எச்சரிக்கை:

மாநிலம் முழுவதும் தற்போது டெங்கு மற்றும் பல்வேறு வைரஸ் தொற்றுகளின் பரவல் பரவலாகக் காணப்படுகிறது. இதனைக் கருத்தில் கொண்டு அரசு மற்றும் ஆரம்பச் சுகாதார நிலையங்களில் முன்னெச்சரிக்கை மற்றும் தடுப்பு நடவடிக்கைகள் தீவிரப்படுத்தப்பட வேண்டும்.

கர்ப்பிணிகளுக்கு முன்னுரிமை மற்றும் தனி கவனம்:

மருத்துவமனைகளுக்கு வரும் கர்ப்பிணிப் பெண்களுக்குச் சளி, காய்ச்சல் போன்ற அறிகுறிகள் தென்பட்டால், அதனைச் சாதாரணமாக எண்ணக் கூடாது. உடனடியாக உரியப் பரிசோதனைகளை மேற்கொண்டு, எவ்விதத் தாமதமும் இன்றி அவர்களுக்குக் கூடுதல் கவனத்துடன் மருத்துவச் சிகிச்சைகளை வழங்க வேண்டும்.

அதிகாரிகளுக்குத் திட்டவட்டமான உத்தரவு:

கர்ப்பிணிப் பெண்களின் உடல்நிலையைக் கண்காணிப்பதில் எவ்வித சுணக்கமும் இருக்கக் கூடாது எனவும், இந்த நடைமுறைகளைத் தவறாமல் பின்பற்றுமாறு அனைத்து மாவட்ட சுகாதாரப் பொறுப்பாளர்களுக்கும் திட்டவட்டமாக அறிவுறுத்தப்பட்டுள்ளது.

சுகாதாரக் கட்டமைப்பு தீவிரம்:

முன்னதாக,மு.க.ஸ்டாலின் அவர்களும் வைரஸ் காய்ச்சல் காரணமாக ஓய்வெடுத்து வரும் நிலையில், மாநிலம் முழுவதும் காய்ச்சல் தடுப்பு நடவடிக்கைகளைச் சுகாதாரத்துறை தீவிரப்படுத்தியுள்ளது. கொசுக்கள் உற்பத்தியைத் தடுப்பது மற்றும் காய்ச்சல் பாதிப்புகளில் இருந்து பொதுமக்களைப் பாதுகாப்பது குறித்த விழிப்புணர்வும் முடுக்கிவிடப்பட்டுள்ளது.