“ரூ.1,020 கோடி ஒப்பந்தப்புள்ளி முறைகேடு” முன்னாள் அமைச்சர் கே.என். நேரு மீது 14 பிரிவுகளில் வழக்குப்பதிவு - லஞ்ச ஒழிப்புத்துறை அதிரடி!

சென்னை:

 முந்தைய திமுக ஆட்சியின் போது, நகராட்சி நிர்வாகம் மற்றும் குடிநீர் வழங்கல் துறையில் அரசு ஒப்பந்தங்களை வழங்கியதில் சுமார் ரூ.1,020 கோடி அளவுக்கு முறைகேடுகள் நடந்திருப்பதாக லஞ்ச ஒழிப்பு மற்றும் கண்காணிப்பு இயக்ககம் அதிரடி நடவடிக்கையை மேற்கொண்டுள்ளது. முன்னாள் அமைச்சர் கே.என். நேரு, அவரது சகோதரர்கள் மற்றும் அரசு அதிகாரிகள் என மொத்தம் 13 பேர் மீது 14 சட்டப் பிரிவுகளின் கீழ் முதல் தகவல் அறிக்கை பதிவு செய்யப்பட்டுள்ளது தமிழக அரசியலில் பெரும் பரபரப்பை ஏற்படுத்தியுள்ளது.

அமலாக்கத்துறை அளித்த அறிக்கை:

 2021 முதல் 2025 வரையிலான காலக்கட்டத்தில், நகராட்சி நிர்வாகத் துறையில் பல்வேறு திட்டங்களுக்கான அரசு ஒப்பந்தங்கள் வழங்கப்பட்டதில் பெருமளவு ஊழல் நடந்துள்ளதாக அமலாக்கத்துறை (ED) சந்தேகித்தது. இது குறித்து விரிவான விசாரணைகளை மேற்கொண்ட அமலாக்கத்துறை, 2025 டிசம்பர் 3-ஆம் தேதி மாநில அரசுக்கும், லஞ்ச ஒழிப்புத் துறைக்கும் 258 பக்கங்கள் கொண்ட ஒரு விரிவான அறிக்கையை அனுப்பியது. இந்த அறிக்கையின் அடிப்படையிலும், தமிழக அரசின் ஒப்புதலுடனும் லஞ்ச ஒழிப்புத்துறையின் சிறப்புப் புலனாய்வுக் குழு கடந்த செப்டம்பர் 4-ஆம் தேதி இந்த வழக்கை முதல் தகவல் அறிக்கையாகப் பதிவு செய்துள்ளது.

குற்றம் சாட்டப்பட்டவர்கள் யார்?

 இந்த வழக்கில் முன்னாள் நகராட்சி நிர்வாகத்துறை அமைச்சர் கே.என். நேரு முதன்மைக் குற்றவாளியாகச் சேர்க்கப்பட்டுள்ளார். இவருடன் நேருவின் சகோதரர்கள் கே.என். மணிவண்ணன் மற்றும் என். ரவிச்சந்திரன், நெருங்கிய கூட்டாளியான கவி பிரசாத், வி.ஆர் நீர் உள்கட்டமைப்பு நிறுவன ஒப்பந்ததாரர் ஆர். வேலுமணி மற்றும் அடையாளம் காணப்படாத சில அரசு அதிகாரிகள், தனியார் ஒப்பந்ததாரர்கள் என மொத்தம் 13 பேர் மீது வழக்கு பதியப்பட்டுள்ளது.

எஃப்.ஐ.ஆரில் உள்ள முக்கியக் குற்றச்சாட்டுகள்:

10 சதவீத 'கட்சி நிதி' வசூல்:

அரசு ஒப்பந்தங்களைப் பெறும் ஒப்பந்ததாரர்களிடம் இருந்து, திட்ட மதிப்பில் 7.5 விழுக்காடு முதல் 10 விழுக்காடு வரையிலான தொகையைக் "கட்சி நிதி" என்ற பெயரில் லஞ்சமாக வசூலித்துள்ளதாக முதல் தகவல் அறிக்கையில் வெளிப்படையாகக் குறிப்பிடப்பட்டுள்ளது.

முன்கூட்டியே முடிவு செய்யப்பட்ட ஒப்பந்தங்கள்:

 கே.என். நேருவின் நெருங்கிய கூட்டாளியான கவி பிரசாத், நகராட்சி நிர்வாகத் துறையின் மூத்த ஐ.ஏ.எஸ் அதிகாரிகள் மற்றும் இதர அதிகாரிகளுடன் தொடர்பில் இருந்து, ஒப்பந்தப்புள்ளி அறிவிப்புகள் அதிகாரப்பூர்வமாக வெளியாகும் முன்பே, எந்த ஒப்பந்ததாரருக்கு அந்தப் பணியை வழங்குவது என முன்கூட்டியே முடிவு செய்துள்ளனர்.

சிக்கிய முக்கிய டிஜிட்டல் ஆதாரங்கள்:

லஞ்ச ஒழிப்புத்துறை வசமாகியுள்ள வாட்ஸ்அப் வழி தகவல் பரிமாற்றங்களில் 10 விழுக்காடு தரகுத் தொகை கணக்கிடப்பட்ட விவரங்கள் சிக்கியுள்ளன. குறிப்பாக ரூ.55.15 லட்சம், ரூ.155.79 லட்சம் எனத் தரகுத் தொகைகள் துல்லியமாகக் கணக்கிடப்பட்டு வசூலிக்கப்பட்டதற்கான குறுஞ்செய்திகள் ஆதாரமாகச் சேர்க்கப்பட்டுள்ளன. மேலும், நேருவின் சகோதரர் மணிவண்ணனின் அலைபேசியில் இருந்து சிக்கிய புகைப்படம் ஒன்றில், ரூ.11.98 கோடி வசூலிக்கப்பட்டதும், ரூ.11.66 கோடி விநியோகிக்கப்பட்டதும் கையால் எழுதப்பட்ட கணக்காக உள்ளது. அரசு ஒப்பந்தங்களுக்கு ஈடாக ரூ.1 கோடி முதல் ரூ.5 கோடி வரை பல கட்டங்களாக ரொக்கப் பரிமாற்றங்கள் நடந்ததற்கான சான்றுகளும் கைப்பற்றப்பட்டுள்ளன.

30 இடங்களில் அதிரடி சோதனை:

குற்றச்சதி, ஏமாற்றுதல், நம்பிக்கை மோசடி ஆகிய குற்றங்களுக்காக இந்தியத் தண்டனைச் சட்டம், புதிய பாரதிய நியாய சட்டம்  மற்றும் ஊழல் தடுப்புச் சட்டத்தின் 6 பிரிவுகள் என மொத்தம் 14 சட்டப் பிரிவுகளின் கீழ் கடுமையான வழக்குகள் பதிவு செய்யப்பட்டுள்ளன.

இந்த வழக்கு பதிவானதைத் தொடர்ந்து, செப்டம்பர் 6-ஆம் தேதி சென்னை, திருச்சி, கோயம்புத்தூர், திருப்பூர் மற்றும் ஈரோடு ஆகிய 5 நகரங்களில் உள்ள 30 இடங்களில் லஞ்ச ஒழிப்புத்துறையினர் ஒரே நேரத்தில் சோதனையில் ஈடுபட்டனர். இதில் 241 முக்கிய ஆவணங்கள் மற்றும் மின்னணு ஆதாரங்கள் கைப்பற்றப்பட்டுள்ளதாக லஞ்ச ஒழிப்புத்துறை அதிகாரப்பூர்வமாக அறிவித்துள்ளது.

அரசியல் தலைவர்களின் எதிர்வினை:

கே.என். நேரு மறுப்பு:

 தன் மீதான இந்தக் குற்றச்சாட்டுகளை முற்றிலுமாக மறுத்துள்ள நேரு, "ஒப்பந்தப்புள்ளிகள் தொடர்பாக நான் யாரிடமும் பேசவில்லை. இது பழிவாங்கும் நடவடிக்கை. வழக்கைச் சட்டப்படி எதிர்கொண்டு நான் குற்றமற்றவன் என்பதை நிரூபிப்பேன்" என்று தெரிவித்தார்.

திமுக கண்டனம்:

திமுக தலைவரும் தற்போதைய எதிர்க்கட்சித் தலைவருமான மு.க. ஸ்டாலின், சட்டமன்றக் கூட்டத்தொடர் நடைபெறும் நேரத்தில் ஆளுங்கட்சி இது போன்ற சோதனைகளை நடத்துவது அரசியல் பழிவாங்கும் நோக்கம் கொண்டது எனக் கண்டனம் தெரிவித்துள்ளார்.

ரூ.1,020 கோடி மதிப்பிலான இந்த விவகாரம் தமிழக அரசியலில் பெரும் அதிர்வலைகளை ஏற்படுத்தியுள்ளது.