“கரூர் கேங்கின் தலைவர் யார்?” சட்டப்பேரவையில் அனல் பறந்த விவாதம்!

சென்னை:

 தமிழக சட்டப்பேரவையில் இன்று அமலாக்கத்துறை  அறிக்கையை மேற்கோள் காட்டிப் பேசிய முதலமைச்சர் விஜய், முந்தைய திமுக ஆட்சியில் "அறிவியல் பூர்வமான ஊழல்" நடந்திருப்பதாகக் கடுமையாக விமர்சித்தார்.

கரூர் கேங் மற்றும் அதன் தலைவர் யார்?

முன்னாள் அமைச்சர் செந்தில் பாலாஜி தனது அதிகாரத்தைத் தவறாகப் பயன்படுத்தியதாகவும், இதில் அவரது சகோதரர் அசோக் குமாரின் தலையீடு இருந்ததாகவும் அமலாக்கத்துறை அறிக்கையைச் சுட்டிக்காட்டி முதல்வர் குற்றம் சாட்டினார்.

டாஸ்மாக் பார் உரிமையாளர்கள் மற்றும் அரசு ஒப்பந்ததாரர்களிடம் இருந்து "கரூர் கேங்" கட்சி நிதி என்ற பெயரில் பணம் வசூலித்ததாகக் குறிப்பிட்ட முதல்வர், "இவ்வளவு பெரிய கூட்டமைப்பை அமைத்துச் செயல்பட்ட அந்த கரூர் கேங்கின் உண்மையான தலைவர் யார்? என்பதை அறிய தமிழக மக்களும், சட்டப்பேரவையும் மிகவும் ஆர்வமாக உள்ளது" என ஆவேசமாகக் கேள்வி எழுப்பினார்.

நேரடிப் பயனாளிகள்:

 கேள்வியை எழுப்பிய கையோடு, இ.டி அறிக்கையின் 'க்ளைமாக்ஸ்' என ஒரு பகுதியைப் படித்த முதல்வர் விஜய், இந்த வசூல் பணத்தின் நேரடிப் பயனாளிகளாக அப்போதைய முதல்வர் மு.க. ஸ்டாலின் மற்றும் அப்போதைய துணை முதல்வர் உதயநிதி ஸ்டாலின் ஆகியோர் இருந்ததாக அமலாக்கத்துறை அறிக்கையிலேயே வெளிப்படையாகக் கூறப்பட்டுள்ளதாகத் தெரிவித்தார்.

இ.எம்.ஐ முறையில் லஞ்சம் :

முதலமைச்சர் தனது உரையில் முன்வைத்த மிக முக்கியமான குற்றச்சாட்டுகள்:

ஒப்பந்தங்களில் கமிஷன்:

நகராட்சி நிர்வாகம் மற்றும் குடிநீர் வழங்கல் துறை (ஒப்பந்ததாரர்களிடம் இருந்து மொத்த ஒப்பந்தத் தொகையில் 7.5% முதல் 10% வரை "கட்சி நிதி" என்ற பெயரில் லஞ்சம் வசூலிக்கப்பட்டுள்ளது.

தவணை முறை வசூல்:

இந்த லஞ்சப் பணத்தை ஒரே தவணையாக வாங்காமல், வங்கிக் கடனுக்கு 'இ.எம்.ஐ' செலுத்துவது போல் ஒப்பந்ததாரர்களிடம் இருந்து தவணை முறையில் வசூலித்துள்ளனர். இ.டி அறிக்கையில் உள்ள புருஷோத்தம் என்பவரின் வாக்குமூலத்தைச் சுட்டிக்காட்டிய முதல்வர், அவரிடம் ரூ.29 லட்சம் இவ்வாறு தவணை முறையில் வசூலிக்கப்பட்டதாகக் கூறினார்.

சர்க்காரியா கமிஷனும் வீராணம் திட்டமும்:

திமுகவின் இந்த ஊழல் வரலாறு இன்று நேற்றல்ல, நீண்ட காலமாகத் தொடர்வது எனக் கூறிய முதலமைச்சர் விஜய், அதற்கான உதாரணமாக வரலாற்றுச் சிறப்புமிக்க சர்க்காரியா கமிஷன் அறிக்கையையும் பேரவையில் நினைவுகூர்ந்தார். அந்த அறிக்கையின் ஒரு அத்தியாயத்தில், வீராணம் குடிநீர் திட்டத்திற்காக ரூ.16 கோடி மதிப்பிலான டெண்டருக்கு 2.5% தொகையை தயாநிதி மாறன் "கட்சி நிதியாகக்" கேட்டார் என்ற தகவல் இருப்பதைச் சுட்டிக்காட்டினார்.

எதிர்கட்சிகளின் கடும் எதிர்ப்பு:

முதலமைச்சரின் இந்த நேரடிக் குற்றச்சாட்டுகளால் சட்டப்பேரவையில் பெரும் அமளி ஏற்பட்டது. திமுக சட்டமன்ற உறுப்பினர்கள் சபாநாயகர் ஜே.சி.டி. பிரபாகரின் இருக்கையை முற்றுகையிட்டு முழக்கங்களை எழுப்பினர்.

மேலும், மனிதநேய மக்கள் கட்சித் தலைவர் ஜவாஹிருல்லா இதுகுறித்துக் கூறுகையில், "முதல்வர் காவல்துறை மானியக் கோரிக்கைக்கான துறைசார்ந்த பதிலுரையை வழங்காமல், அப்பட்டமான அரசியல் காழ்ப்புணர்ச்சியை வெளிப்படுத்தியுள்ளார்" எனக் கண்டனம் தெரிவித்தார்.