“இந்தியாவின் 'டீப் டெக்' மற்றும் செயற்கை நுண்ணறிவு நிறுவனங்களுக்கு ரூ.1 லட்சம் கோடி” - 'ஆர்.டி.ஐ' புதுமை நிதி:

இந்தியாவின் தொழில்நுட்பத் துறை மற்றும் ஆராய்ச்சி ஈடுபாட்டை உலகத் தரத்திற்கு உயர்த்தும் நோக்கில், 'ஆராய்ச்சி, மேம்பாடு மற்றும் புதுமை திட்டம்'என்ற பெயரில் ரூ.1 லட்சம் கோடி மதிப்பிலான மாபெரும் நிதியத் தொகுப்பை இந்திய அரசு அறிவித்துள்ளது.

திட்டத்தின் முக்கிய நோக்கங்கள்

தனியார் துறை ஊக்கம்:

 மேம்பட்ட ஆராய்ச்சி மற்றும் மேம்பாட்டு திட்டங்களில் தனியார் நிறுவனங்கள் மற்றும் தொடக்க நிலை நிறுவனங்களின் பங்களிப்பை அதிகரிப்பதே இதன் முக்கிய நோக்கமாகும்.

டீப்-டெக் மற்றும் புதிய தொழில்நுட்பங்கள்:

 செயற்கை நுண்ணறிவு, குவாண்டம் தொழில்நுட்பம், ரோபோடிக்ஸ்,விண்வெளி, உயிரி தொழில்நுட்பம், செமிகண்டக்டர்கள் மற்றும் சுத்தமான எரிசக்தி  போன்ற எதிர்காலத் தொழில்நுட்பங்களுக்கு இந்த நிதி முன்னுரிமை அளிக்கும்.

நிதியுதவி எவ்வாறு வழங்கப்படும்?

வழக்கமான மானியங்களாகவோ  அல்லது குறுகிய காலக் கடன்களாகவோ இந்த நிதி வழங்கப்பட மாட்டாது.

நீண்ட காலக் கடன்கள்:

 குறைந்த வட்டி அல்லது வட்டி இல்லாத நீண்ட காலக் கடன்களாக நிதி வழங்கப்படும்.

அடமானம் தேவையில்லை:

வணிக வங்கிகளைப் போலக் கடுமையான நிபந்தனைகள் இன்றி, பிணையம் இல்லாத கடன்களாக  இத்திட்டம் செயல்படுத்தப்படுகிறது. சில குறிப்பிட்ட ஸ்டார்ட்அப் நிறுவனங்களுக்குப் பங்கு மூலதனமாகவும் உதவி வழங்கப்படும்.

திட்டச் செலவு:

தகுதிபெறும் நிறுவனங்களுக்கு அவற்றின் மொத்தத் திட்டச் செலவில் 50% வரை நிதியுதவி வழங்கப்படும்.

யார் நிர்வகிக்கிறார்கள்?

இந்த 1 லட்சம் கோடி ரூபாய் நிதியானது, மத்திய அறிவியல் மற்றும் தொழில்நுட்ப அமைச்சகத்தின் கீழ் இயங்கும் அனுசந்தன் தேசிய ஆராய்ச்சி அறக்கட்டளையில்  ஒரு சிறப்பு நிதியமாக நிர்வகிக்கப்படும்.

நேரடி விண்ணப்பம் இல்லை:

ஸ்டார்ட்அப் நிறுவனங்கள் நேரடியாக அரசிடமோ அல்லது அனுசந்தன் தேசிய ஆராய்ச்சி அறக்கட்டளை இடமோ விண்ணப்பிக்க முடியாது.

இரண்டாம் நிலை நிதி மேலாளர்கள்:

இந்த நிதியானது, 'இரண்டாம் நிலை நிதி மேலாளர்கள்  எனப்படும் அங்கீகரிக்கப்பட்ட அமைப்புகள் (உதாரணமாக: தொழில்நுட்ப மேம்பாட்டு வாரியம் மூலமாக மட்டுமே நிறுவனங்களுக்கு வழங்கப்படும்.

தகுதிக்கான நிபந்தனைகள்:

இந்த நிதியைப் பெற ஒரு ஸ்டார்ட்அப் அல்லது நிறுவனம், தங்களது தொழில்நுட்பத்தை வெறும் யோசனை  அளவில் வைத்திருக்கக் கூடாது. சர்வதேச அளவீடின் அடிப்படையில், அந்தத் தொழில்நுட்பம் குறைந்தபட்சம் டி.ஆர்.எல்-4 நிலை  அதாவது, ஆய்வகச் சூழலில் பரிசோதிக்கப்பட்டு உறுதிப்படுத்தப்பட்ட நிலை எட்டியிருக்க வேண்டும்.

தற்போதைய நிலை மற்றும் சர்ச்சை:

முதல் கட்டமாக 124 விண்ணப்பங்கள் பெறப்பட்டு, அதில் 51 விண்ணப்பங்கள் பரிசீலிக்கப்பட்டு 22 நிறுவனங்கள் தேர்வு செய்யப்பட்டுள்ளன. இருப்பினும், தேர்வு செய்யப்பட்ட 22 நிறுவனங்களில் 15 நிறுவனங்கள், தேர்வுக் குழுவில் உள்ள உறுப்பினர்களுடன் முதலீட்டுத் தொடர்புகளைக் கொண்டிருப்பதாக சமீபத்தில் ஊடகங்களில் செய்திகள் வெளியாகியுள்ளன. இது, தேர்வு முறையில் வெளிப்படைத்தன்மை குறித்த சில கேள்விகளை எழுப்பியுள்ளது.

ஆயினும், இந்தியாவின் தொழில்நுட்ப இறையாண்மையையும், 'ஆத்மநிர்பார் பாரத்' மற்றும் 'விக்சித் பாரத் 2047' ஆகிய தொலைநோக்குத் திட்டங்களையும் அடைவதற்கு இந்த 1 லட்சம் கோடி ரூபாய் ஆர்.டி.ஐ நிதி ஒரு மிகப்பெரிய மைல்கல்லாகப் பார்க்கப்படுகிறது.