“மெட்டா நிறுவனத்தின் புதிய புரட்சி” - உங்கள் வேலைகளைத் தானாகவே செய்து முடிக்கும் ஏஐ ஏஜென்ட் 'மியூஸ்' அறிமுகம்!

கலிபோர்னியா:

 தற்போதைய செயற்கை நுண்ணறிவு  தொழில்நுட்பத்தில் அடுத்தகட்ட பாய்ச்சலாக, பயனர்களின் அன்றாட வேலைகளைத் தானாகவே செய்து முடிக்கும் திறன் கொண்ட 'மியூஸ்' என்ற புதிய தனிப்பட்ட ஏஐ ஏஜென்டை மெட்டா நிறுவனம் அதிகாரப்பூர்வமாக அறிமுகப்படுத்தியுள்ளது.

கேள்விகளுக்குப் பதில் அளிக்கும் சாதாரண சாட்பாட்களைப் போல இல்லாமல், நாம் கட்டளையிட்டால் நமக்காக இமெயில் அனுப்புவது, பயண டிக்கெட்டுகளை முன்பதிவு செய்வது மற்றும் ஆன்லைன் ஷாப்பிங் செய்வது போன்ற பல பணிகளை இந்த 'மியூஸ்' தானாகவே செயல்படுத்துகிறது.

'பர்சனல் சூப்பர் இன்டெலிஜென்ஸ்' - மார்க் ஜூக்கர்பெர்க் பெருமிதம்:

இந்த புதிய ஏஐ குறித்து எக்ஸ் தளத்தில் பதிவிட்டுள்ள மெட்டா நிறுவனத்தின் சிஇஓ மார்க் ஜூக்கர்பெர்க், "உங்கள் இலக்குகளைப் புரிந்துகொண்டு உங்களுக்காக 24/7 வேலை செய்யும் தனிப்பட்ட உதவியாளரான மியூஸ்-ஐ அறிமுகப்படுத்துகிறோம்" என்று தெரிவித்துள்ளார். இந்தத் தொழில்நுட்பத்தை மனிதர்களின் வேலைகளை எளிதாக்கும் 'பர்சனல் சூப்பர் இன்டெலிஜென்ஸ்' என்று அவர் வர்ணித்துள்ளார்.

மியூஸ்  ஏஐ-யின் முக்கிய சிறப்பம்சங்கள்

சுயச்சார்புச் செயல்பாடு:

 சாதாரண சாட்பாட்களுக்கு நாம் தொடர்ந்து கட்டளைகளைக் கொடுத்துக்கொண்டே இருக்க வேண்டும். ஆனால் மியூஸ்-க்கு ஒருமுறை கட்டளையிட்டுவிட்டால், அது பின்னணியில் (Background) சுயமாக இயங்கி அந்த வேலையை முழுமையாக முடித்துவிடும்.

பயன்பாடுகள்:

 ஒரு குறிப்பிட்ட தேதியில் விமான டிக்கெட் புக் செய்வது, கேலண்டரை நிர்வகிப்பது, ஆன்லைனில் பொருட்களை வாங்குவது, வங்கி பரிவர்த்தனைகள் செய்வது மற்றும் ஸ்மார்ட் ஹோம் சாதனங்களைக் கட்டுப்படுத்துவது எனப் பல்வேறு வேலைகளை இது செய்கிறது.

எப்படிப் பயன்படுத்துவது?

 இந்த ஏஐ-யை மியூஸ் என்ற பிரத்யேக ஆப் மூலமாகவோ அல்லது வாட்ஸ்அப் மூலமாகவோ பயனர்கள் நேரடியாகப் பயன்படுத்தலாம்.

பாதுகாப்பு மற்றும் தனிவுரிமை:

பயனர்களின் தனிப்பட்ட தகவல்கள், வங்கி விவரங்கள் மற்றும் பாஸ்வேர்டுகளை ஒரு ஏஐ கையாளுவதால் இதில் தனிவுரிமை சார்ந்த பல்வேறு கேள்விகள் எழுந்தன. இதற்கு மெட்டா நிறுவனம் தரப்பில் அளிக்கப்பட்ட விளக்கங்கள்:

பிரத்யேக மெய்நிகர் கணினி:

 ஒவ்வொரு பயனரின் மியூஸ் ஏஐ-யும் 'மியூஸ் செக்யூர் விஎம்' என்ற தனிமைப்படுத்தப்பட்ட, பாதுகாப்பான கிளவுட் கம்ப்யூட்டரில் இயங்குகிறது. இதனால் பயனர்களின் தரவுகள் வெளியே கசிவதற்கான வாய்ப்பில்லை.

அனுமதி கட்டுப்பாடு:

மியூஸ் ஏஐ எந்தெந்த ஆப்களைப் பயன்படுத்தலாம் என்பதற்கான முழு கட்டுப்பாடும் பயனர்களிடமே இருக்கும். பயனர்கள் விரும்பினால் எப்போது வேண்டுமானாலும் அந்த அனுமதியை ரத்து செய்யலாம்.

பாஸ்வேர்ட் பாதுகாப்பு:

மெட்டாவின் ஏஐ பிரிவுத் தலைவர் அலெக்சாண்டர் வாங் கூறுகையில், "இந்த ஏஐ உங்கள் பாஸ்வேர்டுகளையோ அல்லது வங்கி அட்டை விவரங்களையோ நேரடியாகப் பார்க்க முடியாது" என்று உறுதியளித்துள்ளார். அத்துடன், எந்தவொரு முக்கியப் பரிவர்த்தனைக்கும் முன்பு பயனரின் இறுதி ஒப்புதலை ஏஐ கேட்கும் வகையிலும் வடிவமைக்கப்பட்டுள்ளது.

ஆப்பிள் நிறுவனம் தனது ஐபோன்களுக்காக மேம்படுத்தப்பட்ட சிரி ஏஐ-யை வெளியிட உள்ள நிலையில், அதற்குப் போட்டியாக மெட்டா நிறுவனம் இந்த 'மியூஸ்' ஏஐ-யை களமிறக்கியுள்ளது தொழில்நுட்ப உலகில் பெரும் அதிர்வலைகளை ஏற்படுத்தியுள்ளது. முதற்கட்டமாக அமெரிக்காவில் அறிமுகப்படுத்தப்பட்டுள்ள இது, விரைவில் இந்தியாவிலும் அறிமுகமாகும் என எதிர்பார்க்கப்படுகிறது.