“சிவகங்கை ரவுடி சுள்ளான் மதன் கொலை வழக்கு” - ஸ்கெட்ச் போட்ட முக்கிய குற்றவாளி மிதுன் மாணிக்கம் கைது!

சிவகங்கை:

சிவகங்கை மாவட்டம் மேலமங்கலத்தில் பிரபல ரவுடி சுள்ளான் மதன் படுகொலை செய்யப்பட்ட வழக்கில், மூளையாகச் செயல்பட்டுத் தலைமறைவாக இருந்த முக்கிய குற்றவாளியான மிதுன் மாணிக்கத்தைக் காவல்துறையினர் அதிரடியாகக் கைது செய்துள்ளனர். சமூக வலைத்தளங்களில் விடுக்கப்பட்ட பகிரங்க மிரட்டல் மற்றும் பழிக்குப் பழியாக நடந்த இந்தச் சம்பவம் அப்பகுதியில் பெரும் அதிர்வலைகளை ஏற்படுத்தியுள்ளது.

பழிக்குப் பழி - கொலையின் பின்னணி:

கடந்த ஆண்டு சிவகங்கை பேருந்து நிலையத்தில் ராஜேஷ் என்ற இளைஞர் இரவோடு இரவாக வெட்டிக் கொலை செய்யப்பட்டார். இந்த வழக்கில் சுள்ளான் மதனின் நெருங்கிய நண்பரான அருண் பாண்டியன் முக்கிய குற்றவாளியாகக் கைதாகி ராமநாதபுரம் சிறையில் உள்ளார். கொல்லப்பட்ட ராஜேஷின் நெருங்கிய நண்பரான மிதுன் மாணிக்கம், தனது நண்பனின் மரணத்திற்குப் பழி தீர்ப்பேன் எனச் சமூக வலைத்தளமான இன்ஸ்டாகிராமில் பகிரங்கமாகப் பதிவிட்டிருந்தார்.

இதற்கு சுள்ளான் மதன் தரப்பிலிருந்தும் பதிலடி தரப்பட, இரு தரப்புக்கும் இடையே "சுள்ளான் BLOODS VS ராஜேஷ் பயலுகடா" என்ற பெயரில் சமூக வலைத்தளங்களில் கடும் வார்த்தைப் போர் நீடித்து வந்தது. மிதுன் மாணிக்கத்தின் குடும்பத்தினரை அவதூறாகப் பேசி சுள்ளான் மதன் வீடியோ வெளியிட்டதாகவும் கூறப்படுகிறது. இந்த முன்விரோதத்தின் உச்சக்கட்டமாகவே சுள்ளான் மதன் தீர்த்துக்கட்டப்பட்டுள்ளார்.

நண்பர்களை விலைக்கு வாங்கிய மிதுன் மாணிக்கம்:

சுள்ளான் மதனை நேரடியாக நெருங்க முடியாது என்பதை அறிந்த மிதுன் மாணிக்கம், மதனின் கூட்டாளிகளான மூன்று பேரை முதலில் பேரம் பேசித் தன் பக்கம் இழுத்துள்ளார்.

சமீபத்தில் சிறையிலிருந்து ஜாமீனில் வெளியே வந்த சுள்ளான் மதன், மேலமங்கலத்தில் நடைபெறும் மஞ்சுவிரட்டுப் போட்டியைப் பார்க்கச் செல்வதை இந்த உள்ளூர் உளவாளிகள் மூலம் மிதுன் மாணிக்கம் துல்லியமாகத் தெரிந்துகொண்டார்.

அங்கு 4 இருசக்கர வாகனங்களில் பயங்கர ஆயுதங்களுடன் வந்த மிதுன் மாணிக்கத்தின் கும்பல் சுள்ளான் மதனைச் சுற்றி வளைத்தது.

அங்கிருந்து தப்பியோடிய மதனை விடாமல் விரட்டிச் சென்ற கும்பல், கரும்புத் தோட்டத்திற்குள் வைத்து சரமாரியாக வெட்டிக் கொலை செய்துவிட்டுத் தப்பியோடியது.

காவல்துறையின் அதிரடி நடவடிக்கைகள்:

சுமார் 20-க்கும் மேற்பட்ட கொலை, கொள்ளை வழக்குகளில் தொடர்புடைய சுள்ளான் மதன் படுகொலை செய்யப்பட்ட சம்பவம் சிவகங்கையில் பெரும் பரபரப்பை ஏற்படுத்தியது. கொலையாளிகளைப் பிடிக்க 6 தனிப்படைகள் அமைக்கப்பட்டன.

தொடர் கைதுகள்:

சம்பவம் நடந்த 12 மணி நேரத்திற்குள் கொலையாளிகளுக்கு உதவிய பிரதீப் (28), பாலமுருகன் (19), பாபு (23) ஆகிய 3 பேரை போலீசார் முதலில் கைது செய்தனர். அதனைத் தொடர்ந்து சந்தோஷ், ஜெய மாணிக்கராஜ், முத்து சூர்யா, விக்னேஷ் என மேலும் 4 பேர் கைதாகினர்.

முக்கிய குற்றவாளி கைது:

தலைமறைவாக இருந்த நிலையில், இந்த முழு கொலைச் சதிக்கும் மூளையாகச் செயல்பட்ட முக்கிய குற்றவாளியான மிதுன் மாணிக்கம் தற்போது காவல்துறையினரின் வலையில் சிக்கியுள்ளார்.

சமூக வலைத்தள கணக்குகள் முடக்கம்:

 சுள்ளான் மதன் கொலைக்குப் பழிவாங்குவோம் என மீண்டும் சமூக வலைத்தளங்களில் ஆயுதங்களுடன் வீடியோ பதிவிட்டுச் சவால் விட்ட 20-க்கும் மேற்பட்ட இன்ஸ்டாகிராம் மற்றும் பேஸ்புக் கணக்குகளை முடக்கி சைபர் க்ரைம் போலீசார் அதிரடி நடவடிக்கை எடுத்துள்ளனர்.

ரவுடியிசத்தை 'ஹீரோயிசம்' போல் சித்தரித்து சமூக வலைத்தளங்களில் ரீல்ஸ் போடும் இளைஞர்கள் மீது கடுமையான குண்டர் சட்டத்தின் கீழ் நடவடிக்கை எடுக்கப்படும் என காவல்துறையினர் எச்சரித்துள்ளனர்.