“அன்று எம்ஜிஆர்... இன்று முதலமைச்சர் விஜய்” - சமூக வலைதளங்களில் வைரலாகும் தவெக ஆதரவாளர்களின் பதிவுகள்!

தமிழகத்தின் முன்னாள் முதலமைச்சர் எம்.ஜி.ஆரின் அரசியல் பாதையையும், தற்போதைய முதலமைச்சர் விஜய்யின் மக்கள் செல்வாக்கையும் ஒப்பிட்டுத் தமிழக வெற்றிக் கழகத்தின் (தவெக) ஆதரவாளர்களால் பகிரப்படும் புகைப்படங்களும் பதிவுகளும் இணையத்தில் பெருமளவில் வைரலாகி வருகின்றன.

செல்லும் வழியெல்லாம் பொழியும் அன்பு மழை:

மக்கள் மத்தியில் எம்.ஜி.ஆர் பெற்ற மாபெரும் வரவேற்பைப் போலவே, தற்போதைய முதலமைச்சரான விஜய் செல்லும் வழிகளிலெல்லாம் பொதுமக்களும் தொண்டர்களும் திரண்டு வந்து வாழ்த்து தெரிவிக்கும் தருணங்களைச் சுட்டி இந்த ஒப்பீடுகள் செய்யப்படுகின்றன. கடந்த 2026 சட்டமன்றத் தேர்தலில் தவெகவின் வரலாற்றுச் சிறப்புமிக்க வெற்றியைத் தொடர்ந்து, மக்கள் மத்தியில் அவரது புகழ் தொடர்ந்து உயர்ந்து வருவதை இந்தத் தருணங்கள் காட்டுவதாகக் கட்சித் தொண்டர்கள் சமூக வலைதளங்களில் பதிவிட்டு வருகின்றனர்.

மக்கள் செல்வாக்கு:

திரைப்படத் துறையில் உச்சத்தில் இருந்துவிட்டு, நேரடியாக மக்கள் சேவைக்காக அரசியல் களத்திற்கு வந்து மிகப்பெரிய வெற்றியை ஈட்டியதில் எம்.ஜி.ஆரின் வழியை விஜய் பின்பற்றுவதாக ரசிகர்கள் மற்றும் அரசியல் பார்வையாளர்கள் கருதுகின்றனர்.

சமூக வலைதளப் பதிவுகள்:

 எக்ஸ், இன்ஸ்டாகிராம் மற்றும் வாட்ஸ்அப் குழுக்களில் எம்.ஜி.ஆர் காலத்தில் மக்கள் காட்டிய அன்பையும், தற்போதைய முதலமைச்சர் விஜய்க்கு பொதுமக்கள் வழங்கும் வரவேற்பையும் அருகருகே வைத்து "அன்று... இன்று..." என்ற வாசகத்துடன் புகைப்படங்களை இணைத்து பகிர்ந்து வருகின்றனர்.

அரசியல் பயணம்:

 எம்.ஜி.ஆர் எப்போதுமே ஏழை எளிய மக்களின் உற்ற தோழனாகத் திகழ்ந்ததைப் போலவே, தற்போதைய அரசின் திட்டங்களும் அடிமட்டக் குடிமக்களைச் சென்றடைவதை இலக்காகக் கொண்டுள்ளதாகத் தவெக ஆதரவாளர்கள் பெருமிதம் தெரிவிக்கின்றனர்.

அரசியல் களத்தின் பார்வை:

தவெக கட்சித் தொடங்கிய குறுகிய காலத்திலேயே ஆட்சியைப் பிடித்து முதலமைச்சராகப் பொறுப்பேற்றுள்ள விஜய்யை, எம்.ஜி.ஆருடன் ஒப்பிட்டுப் பேசுவது தமிழக அரசியல் களத்தில் தொடர்ந்து விவாதிக்கப்பட்டு வரும் ஒரு முக்கியப் பேசுபொருளாக உள்ளது. எனினும், "எம்.ஜி.ஆர் எப்போதுமே எம்.ஜி.ஆர் தான்; நான் அவர் காட்டிய மக்கள் நலப் பாதையில் பணியாற்ற வந்தவன்" என்று விஜய் ஏற்கனவே தனது மேடைகளில் தெளிவாகக் குறிப்பிட்டிருந்தது குறிப்பிடத்தக்கது.