“அகில இந்திய வானொலி வளாகத்திற்குள் அத்துமீறி நுழைந்த விவகாரம்” - ராகுல் காந்தி, பிரியங்கா காந்தி மீது வழக்குப்பதிவு!

புதுடெல்லி:

வாக்காளர் பட்டியல் சிறப்பு திருத்தம்  விவகாரத்தைக் கண்டித்து தேர்தல் ஆணையம் நோக்கிப் பேரணியாகச் சென்ற நிலையில், அரசுக்குச் சொந்தமான அகில இந்திய வானொலி (ஆகாஷ்வாணி பவன்) வளாகத்திற்குள் அத்துமீறி நுழைந்து தர்ணாவில் ஈடுபட்டதாக காங்கிரஸ் நாடாளுமன்ற உறுப்பினர் ராகுல் காந்தி, பொதுச்செயலாளர் பிரியங்கா காந்தி ஆகியோர் மீது டெல்லி காவல்துறை இன்று முதல் தகவல் அறிக்கையை பதிவு செய்துள்ளது.

பேரணியின் பின்னணி:

வாக்காளர் பட்டியல் சிறப்புத் திருத்தப் பணியில்  பெரும் முறைகேடுகள் நடந்திருப்பதாகக் குற்றம் சாட்டிய 'இந்தியா' கூட்டணிக் கட்சிகளின் நாடாளுமன்ற உறுப்பினர்கள், தலைமைத் தேர்தல் ஆணையர் ஞானேஷ் குமாரை உடனடியாகப் பதவி நீக்கம் செய்ய வலியுறுத்தி நேற்று (அக். 6) நாடாளுமன்றத்தில் இருந்து தேர்தல் ஆணைய அலுவலகத்தை நோக்கி மாபெரும் கண்டனப் பேரணியை நடத்தினர்.

தடுப்புகளைத் தாண்டி அத்துமீறிய நுழைவு:

இந்தப் பேரணியை நிதி ஆயோக் மற்றும் ஆகாஷ்வாணி பவன் அருகே பலத்த இரும்புத் தடுப்புகளை அமைத்து டெல்லி காவல்துறையினர் தடுத்து நிறுத்தினர். அப்போது காவலர்களுக்கும் எதிர்க்கட்சி நாடாளுமன்ற உறுப்பினர்களுக்கும் இடையே தள்ளுமுள்ளு ஏற்பட்டது. அந்தத் தள்ளுமுள்ளுக்கிடையே, காங்கிரஸ் தலைவர் ராகுல் காந்தி தடுப்புகளின் மீது ஏறி, அருகிலிருந்த அகில இந்திய வானொலி (ஆகாஷ்வாணி பவன்) அலுவலகத்தின் வரவேற்பறை நுழைவுவாயில் வழியாகத் தனது பாதுகாப்புக் காவலர்களுடன் உள்ளே நுழைந்தார். காவல் வாகனத்தில் வைக்கப்பட்டிருந்த பிரியங்கா காந்தியும் வாகனத்திலிருந்து இறங்கி அவருடன் இணைந்து கொண்டார்.

9 மணி நேர உள்ளிருப்புப் போராட்டம்:

காவல்துறையினரின் அறிவுறுத்தலை மீறி வானொலி நிலைய வளாகத்திற்குள் நுழைந்த இருவரும், அங்கிருந்த ஒரு மரத்தடியில் அமர்ந்து உள்ளிருப்புப் போராட்டத்தைத் தொடங்கினர். "தேர்தல் ஆணையர்களை நேரடியாகச் சந்திக்கும் வரை இங்கிருந்து நகரப் போவதில்லை" என அவர்கள் திட்டவட்டமாகத் தெரிவித்தனர். கே.சி.வேணுகோபால், பவன் கேரா உள்ளிட்ட பிற காங்கிரஸ் நிர்வாகிகளும் இப்போராட்டத்தில் இணைந்துகொண்டனர். உணவு, தேநீர் என அனைத்தும் அங்கேயே வரவழைக்கப்பட்டு, சுமார் 9 மணி நேரத்திற்கும் மேலாக அந்த வளாகத்திற்குள்ளேயே போராட்டம் நீடித்தது.

கைதும், வழக்குப்பதிவும்:

இரவு வரை சமரசம் எட்டப்படாததால், அந்த வளாகத்தை விட்டு வெளியேறுமாறு காவல்துறையினர் பலமுறை விடுத்த கோரிக்கையை ராகுல் காந்தி ஏற்க மறுத்தார். இதனையடுத்து, இரவு 7 மணியளவில் டெல்லி காவல்துறையினர் ராகுல் காந்தி, பிரியங்கா காந்தி உள்ளிட்ட 250-க்கும் மேற்பட்டோரைக் கைது செய்து கிங்ஸ்வே முகாமிற்கு அழைத்துச் சென்றனர். பின்னர் இரவு 10 மணியளவில் அவர்கள் அனைவரும் விடுவிக்கப்பட்டனர்.

இந்த நிலையில், அரசுக்குச் சொந்தமான அகில இந்திய வானொலி பாதுகாப்பு வளாகத்திற்குள் அனுமதியின்றி அத்துமீறி நுழைந்தது மற்றும் சட்டவிரோதமாகப் போராட்டத்தில் ஈடுபட்டது ஆகிய குற்றச்சாட்டுகளின் கீழ் ராகுல் காந்தி, பிரியங்கா காந்தி மற்றும் காங்கிரஸ் நிர்வாகிகள் மீது டெல்லி காவல்துறை இன்று குற்ற வழக்கு பதிவு செய்து அதிரடி நடவடிக்கையை மேற்கொண்டுள்ளது.