“முதல்வரை சந்திக்கும் நடிகை” -  தவெக-வில் இணைகிறாரா ‘அம்மா’ சங்க முன்னாள் தலைவி ஸ்வேதா மேனன்!

 

மலையாள திரையுலகின் பிரபல நடிகையும், கேரள நடிகர் சங்கமான ‘அம்மா’வின் முன்னாள் தலைவியுமான ஸ்வேதா மேனன், முதலமைச்சர் விஜயை விரைவில் நேரில் சந்திக்க உள்ளதாக வெளியாகியுள்ள தகவல் அரசியல் மற்றும் திரையுலக வட்டாரங்களில் பெரும் பரபரப்பை ஏற்படுத்தியுள்ளது. அவர் தமிழக வெற்றி கழகத்தில் (தவெக) இணையவுள்ளதாகவும் செய்திகள் தெரிவிக்கின்றன.

பாஜகவில் இணையவில்லை தவெக-வில் ஐக்கியம்?

சமீப காலமாக நடிகை ஸ்வேதா மேனன் பாரதிய ஜனதா கட்சியில் இணையப் போவதாக சமூக வலைதளங்களில் வதந்திகள் பரவி வந்தன. ஆனால், அவர் பாஜகவில் இணையப்போவதில்லை என்றும், அதற்கு பதிலாக தமிழக வெற்றி கழகத்தில்  இணையவே அதிக வாய்ப்புகள் இருப்பதாகவும் கேரள ஊடகங்கள் செய்தி வெளியிட்டுள்ளன. முன்னதாக கேரள பாஜக தலைவர் எஸ்.சுரேஷ், "ஸ்வேதா மேனன் மோடியின் ஆதரவாளர் என்றாலும், அவர் பாஜக கட்சியைச் சேர்ந்தவர் அல்ல" என்று விளக்கம் அளித்திருந்தது குறிப்பிடத்தக்கது.

முதலமைச்சர் விஜயுடன் நேரில் சந்திப்பு:

இதன் தொடர்ச்சியாக, அடுத்த வாரம் முதலமைச்சர் விஜயை நேரில் சந்தித்துப் பேச ஸ்வேதா மேனன் திட்டமிட்டுள்ளார். இந்த முக்கிய சந்திப்பிற்கான ஏற்பாடுகளை தவெக-வின் கேரள மாநில ஒருங்கிணைப்பாளர் சதீஷ் தோணக்கல் மேற்கொண்டு வருவதாகவும், இதற்கான முறையான அனுமதி கோரப்பட்டுள்ளதாகவும் நம்பத்தகுந்த வட்டாரங்கள் தெரிவிக்கின்றன.

தவெக கேரள மாநிலத் தலைவர் பதவி வழங்கப்படுகிறதா?

இந்த சந்திப்பு சுமூகமாக முடியும் பட்சத்தில், ஸ்வேதா மேனன் அதிகாரப்பூர்வமாக தன்னை தவெக-வில் இணைத்துக் கொள்வார் என எதிர்பார்க்கப்படுகிறது. மேலும், அரசியல் களத்தில் தீவிரம் காட்டி வரும் அவருக்கு, தமிழக வெற்றி கழகத்தின் கேரள மாநிலத் தலைவர் பதவியோ அல்லது வேறு முக்கிய பொறுப்புகளோ வழங்கப்படலாம் என்று அரசியல் நோக்கர்கள் கருதுகின்றனர்.

யார் இந்த ஸ்வேதா மேனன்?

திரைத்துறையில் பல ஆண்டுகளாக முக்கிய கதாபாத்திரங்களில் நடித்து வரும் ஸ்வேதா மேனன், கடந்த 2025-ஆம் ஆண்டு ஆகஸ்ட் மாதம் 31 ஆண்டுகால மலையாள நடிகர் சங்கமான ‘அம்மா’ வின் வரலாற்றில் முதல் பெண் தலைவராகத் தேர்ந்தெடுக்கப்பட்டு சாதனை படைத்தார். ஆனால், சங்கத்தின் உள்விவகாரங்கள், நிதி மேலாண்மை குறித்த சர்ச்சைகள் மற்றும் நம்பிக்கையில்லா தீர்மானம் போன்ற காரணங்களால், கடந்த ஜூன் 2026-ல் தனது தலைவர் பதவியை ராஜினாமா செய்தார்.

சினிமா சங்க அரசியலில் இருந்து விலகி, தற்போது நேரடி அரசியலில் களமிறங்க அவர் ஆயத்தமாகி வருவதும், அதற்காக முதலமைச்சர் விஜயை சந்திக்க திட்டமிட்டுள்ளதும் கேரள மற்றும் தமிழக அரசியல் களத்தில் பலத்த எதிர்பார்ப்பை உருவாக்கியுள்ளது.