“தமிழ்நாடு அரசின் அண்ணன் சீர் திட்டம்”மணப்பெண்களுக்கு 8 கிராம் தங்க நாணயம், பட்டுப்புடவை வழங்க ரூ.812 கோடி ஒதுக்கீடு!

சென்னை:

தமிழ்நாட்டில் பொருளாதாரத்தில் பின்தங்கிய குடும்பங்களைச் சேர்ந்த திருமணமாகும் பெண்களுக்கு 8 கிராம் தங்க நாணயம் மற்றும் ஒரு பட்டுப்புடவை வழங்கும் 'அண்ணன் சீர் திட்டத்தை' செயல்படுத்துவதற்கான அதிகாரப்பூர்வ அரசாணையைத் தமிழ்நாடு அரசு வெளியிட்டுள்ளது. இத்திட்டத்தின் முதற்கட்ட செயல்பாட்டிற்காக ரூ.812 கோடி நிதி ஒதுக்கீடு செய்யப்பட்டுள்ளதாகச் சமூக நலத்துறை அமைச்சர் ஜெகதீஸ்வரி தெரிவித்துள்ளார்.

முதலமைச்சர் விஜய் தலைமையிலான தமிழக வெற்றிக் கழக அரசின் முக்கிய தேர்தல் வாக்குறுதிகளில் ஒன்றான இத்திட்டம், சட்டசபையில் நிதியமைச்சர் மரிய வில்சன் அறிவித்ததைத் தொடர்ந்து தற்போது நிர்வாக அனுமதி பெற்று நடைமுறைக்கு வந்துள்ளது.

திட்டத்தின் சிறப்பம்சங்கள் மற்றும் தகுதிகள்

வருமான வரம்பு:

ஆண்டு வருமானம் ரூ.2.5 லட்சத்திற்குள் உள்ள ஏழைக் குடும்பங்களைச் சேர்ந்த திருமணமாகும் பெண்கள் மட்டுமே இத்திட்டத்தின் கீழ் பயன்பெறத் தகுதியானவர்கள்.

வழங்கப்படும் சீர்:

தகுதியுடைய மணப்பெண்களுக்கு அரசின் சார்பில் 8 கிராம் (ஒரு சவரன்) எடையுள்ள தங்க நாணயம் மற்றும் ஒரு பட்டுப்புடவை 'அண்ணன் சீராக' வழங்கப்படும்.

எப்போது முதல் பொருந்தும்?

 இத்திட்டம் அரசாணை வெளியிடப்பட்ட நாளான அக்டோபர் 5, 2026 முதல் நடைபெறும் திருமணங்களுக்குச் செல்லுபடியாகும் என அறிவிக்கப்பட்டுள்ளது.

அரசின் விளக்கம்:

 "தமிழர் மரபில் திருமணத்தின் போது அண்ணன் வழங்கும் 'சீர்' என்பது வெறும் பொருள் அல்ல; அது அன்பு, பாசம், பாதுகாப்பு மற்றும் பொறுப்பின் அடையாளமாகக் கருதப்படுகிறது. ஏழைக் குடும்பங்களுக்குத் திருமணச் செலவு பெரும் சுமையாக உள்ள நிலையில், அதைச் சற்று குறைத்து பெண்களின் சுயமரியாதையைக் காக்கவே இந்தத் திட்டம் கொண்டுவரப்பட்டுள்ளது," எனத் தமிழக அரசின் அரசாணையில் சுட்டிக்காட்டப்பட்டுள்ளது.