“சென்னை காவல் ஆணையர் அலுவலகத்தில் நேரில் ஆஜரான பிக்பாஸ் முத்துக்குமரன்” - வஹிதா பேகம் விவகாரத்தில் அதிரடி திருப்பம்!

சென்னை:

 பிக் பாஸ் தமிழ் சீசன் 8-ன் வெற்றியாளர் முத்துக்குமரன் மீது இன்ஸ்டாகிராம் பிரபலமான வஹிதா பேகம் முன்வைத்த பகீர் குற்றச்சாட்டுகள் சமூக வலைதளங்களில் பெரும் பரபரப்பை ஏற்படுத்தியுள்ள நிலையில், முத்துக்குமரன் இன்று சென்னை காவல் ஆணையர் அலுவலகத்திற்கு நேரில் வந்து புகார் அளித்துள்ளார். பொதுவெளியில் நடந்து வந்த இந்த விவாதம், தற்போது சட்டப் போராட்டமாக மாறியுள்ளது.

காவல் ஆணையர் அலுவலகத்தில் முத்துக்குமரன்:

திருமணம் செய்துகொள்வதாக ஆசை வார்த்தை கூறி, தன்னை ஏமாற்றிவிட்டதாக வஹிதா பேகம் வெளியிட்ட வீடியோ மற்றும் அடுத்தடுத்து வெளியான ஆடியோக்கள் இணையத்தில் பெரும் புயலைக் கிளப்பின. இந்நிலையில், தன் மீதான இந்தக் கடுமையான குற்றச்சாட்டுகளுக்கு முற்றுப்புள்ளி வைக்கும் வகையிலும், தனக்கு எதிராகத் திட்டமிட்டுச் செயல்படுபவர்கள் மீது சட்டரீதியான நடவடிக்கை எடுக்கக் கோரியும் முத்துக்குமரன் சென்னை வேப்பேரியில் உள்ள காவல் ஆணையர் அலுவலகத்திற்கு இன்று நேரில் வந்தார்.

சைபர் கிரைம் போலீசாரிடம் புகார்?

சமீபத்தில் முத்துக்குமரனுக்கு எதிராகப் பாதிக்கப்பட்ட பெண்ணுடையது என இணையத்தில் ஒரு ஆடியோ வெளியானது. ஆனால், அந்த ஆடியோ 'செயற்கை நுண்ணறிவு' தொழில்நுட்பம் மூலம் போலியாக உருவாக்கப்பட்ட குரலாக இருக்கலாம் எனப் பல நெட்டிசன்கள் தீவிரமாகச் சந்தேகம் எழுப்பியிருந்தனர்.

இந்தச் சூழலில், அந்தப் போலி ஆடியோக்கள் குறித்தும், தன் நற்பெயரைக் களங்கப்படுத்தும் வகையில் சமூக வலைதளங்களில் அவதூறு பரப்பி, மன உளைச்சல் ஏற்படுத்துபவர்கள் மீதும் நடவடிக்கை எடுக்குமாறு அவர் காவல் ஆணையர் அலுவலகத்தின் சைபர் கிரைம்  பிரிவில் புகார் அளித்திருப்பதாகக் கூறப்படுகிறது.

செய்தியாளர்களின் கேள்வியும்.. முத்துக்குமரனின் ரியாக்‌ஷனும்:

புகார் அளிக்க காவல் ஆணையர் அலுவலகத்திற்கு வந்த முத்துக்குமரனைக் கண்டதும் அங்கிருந்த செய்தியாளர்கள் மற்றும் ஒளிப்பதிவாளர்கள் அவரை சூழ்ந்துகொண்டு அடுக்கடுக்கான கேள்விகளை எழுப்பினர். "வஹிதா பேகத்தின் குற்றச்சாட்டு உண்மையா? அந்த ஆடியோவில் இருப்பது உங்களது குரல்தானா?" என செய்தியாளர்கள் படம்பிடித்துக் கேட்டபோது, கேள்விகளுக்கு வெளிப்படையாக எந்தப் பதிலும் கூறாமல், ஒரு சிறு புன்னகையுடன் கைகூப்பி வணக்கம் வைத்துவிட்டு அவர் வேகமாக அலுவலகத்திற்குள் சென்றார். பத்திரிகையாளர்களிடம் எதுவும் பேசாமல் அவர் தவிர்த்த விதம் பலரது கவனத்தையும் ஈர்த்தது.

சர்ச்சையின் பின்னணி சுருக்கம்:

சில நாட்களுக்கு முன் வஹிதா பேகம் வெளியிட்ட வீடியோவில், முத்துக்குமரன் தன்னை அன்பாகப் பேசி நெருங்கிப் பழகியதாகவும், பாலியல் ரீதியாக அத்துமீறிவிட்டு அடுத்த நாளே தன்னிடம் உறவை முறித்துக்கொண்டதாகவும் கண்ணீருடன் பகிரங்கமாகக் குற்றஞ்சாட்டியிருந்தார். மேலும், அவர் மாத்திரைகளை விழுங்கித் தற்கொலைக்கும் முயன்றார். ஆரம்பத்தில் இதற்கு விளக்கமளித்த முத்துக்குமரன், "அவர் ஏற்கனவே சில மன அழுத்தங்களில் இருந்தார். நான் அவரிடமே இதுகுறித்துக் கேட்கிறேன்" எனத் தெரிவித்திருந்தார்.

அடுத்தக்கட்ட நகர்வு என்ன?

முத்துக்குமரன் தற்போது அதிகாரப்பூர்வமாக காவல் ஆணையரிடம் புகார் அளித்திருப்பதால், இந்த விவகாரம் காவல்துறை விசாரணையின் கீழ் வந்துள்ளது. காவல் துறையினர் இது தொடர்பாக வஹிதா பேகத்திற்கு சம்மன் அனுப்பி விசாரணை நடத்துவார்களா? இணையத்தில் உலாவும் ஆடியோக்களின் உண்மைத்தன்மை தடயவியல் சோதனை மூலம் நிரூபிக்கப்படுமா? என்ற எதிர்பார்ப்பு அதிகரித்துள்ளது.

"பொறுத்தது போதும், இனி சட்டப்படி சந்திப்போம்" என முத்துக்குமரன் எடுத்துள்ள இந்த அதிரடி முடிவு, பிக்பாஸ் ரசிகர்கள் மத்தியிலும் இணையவாசிகளிடையேயும் பெரும் விவாதப்பொருளாக மாறியுள்ளது.