தவெக கொடிக்கம்பம் விழுந்து நொறுங்கிய கார்.. விஜய் சொன்ன பதில்!

தமிழக வெற்றிக் கழகத்தின் (த.வெ.க.) இரண்டாவது மாநாடு நாளை மதுரையில் நடைபெற உள்ளது. இதற்கான ஏற்பாடுகள் மாநாட்டு திடலில் தீவிரமாக நடைபெற்று வருகின்றன.

இதன் ஒரு பகுதியாக, இன்று மதுரை மாநாட்டு திடலில் த.வெ.க.வின் 100 அடி உயர கொடிக்கம்பத்தை நிறுவுவதற்கான பணிகள் மேற்கொள்ளப்பட்டன. இதற்காக, கிரேன் மூலம் கொடிக்கம்பத்தை நிறுவும் பணி நடைபெற்று வந்தபோது, எதிர்பாராத விதமாக கிரேனின் பெல்ட் திடீரென அறுந்தது.

இதனால், கொடிக்கம்பம் சாய்ந்து விழுந்து விபத்துக்குள்ளானது. இந்த விபத்தில், அருகில் நிறுத்தப்பட்டிருந்த ஒரு இன்னோவா கார் மீது கொடிக்கம்பம் விழுந்ததால், அந்த கார் சுக்கு நூறாக நொறுங்கி முற்றிலும் சேதமடைந்தது.அதிர்ஷ்டவசமாக, இந்த விபத்தில் யாருக்கும் உயிர் சேதம் ஏற்படவில்லை என தகவல்கள் தெரிவிக்கின்றன.

இருப்பினும், இந்த எதிர்பாராத விபத்தால் மாநாட்டு திடலில் பெரும் பரபரப்பு ஏற்பட்டது. உள்ளூர் காவல்துறையினர் மற்றும் மாநாட்டு ஏற்பாட்டாளர்கள் உடனடியாக சம்பவ இடத்திற்கு விரைந்து நிலைமையை கட்டுக்குள் கொண்டு வந்தனர்.

இந்நிலையில், சேதமடைந்த இன்னோவா காருக்கு பதிலாக புதிய கார் வாங்கித் தரப்படும் என த.வெ.க. சார்பில் உறுதி அளிக்கப்பட்டுள்ளதாக தகவல்கள் வெளியாகியுள்ளன.

முன்னதாக கார் சுக்குநூறாக உடைந்ததும், உரிமையாளர் கண்ணீர் விட்டு கதறி அழுத வீடியோ இணையத்தில் வைரலானது.

இந்த விபத்து மாநாட்டு பணிகளில் தற்காலிக பாதிப்பை ஏற்படுத்தியிருந்தாலும், மாநாட்டு ஏற்பாடுகள் தொடர்ந்து விறுவிறுப்பாக நடைபெற்று வருவதாக த.வெ.க. நிர்வாகிகள் தெரிவித்துள்ளனர்.