வார்டு உறுப்பினராக பதவியேற்ற பெண்… மேடையிலேயே அலேக்காகத் தூக்கிய போலீஸார் : இதுதான் காரணமா..? அதிர்ச்சியில் ஆதரவாளர்கள்..!!!

Author: Babu Lakshmanan
21 October 2021, 3:48 pm
Chennai arrest - updatenews360
Quick Share

சென்னை : தாம்பரம் அருகே ஊராட்சி வார்டு உறுப்பினராக பதவியேற்ற பிரபல ரவுடியின் மனைவி, பதவியேற்பு நிகழ்ச்சியின் போது மேடையிலேயே கைது செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.

தாம்பரம் அடுத்த நெடுங்குன்றம் பகுதியை சேர்ந்தவர் பிரபல ரவுடி சூர்யா (34). இவர் மீது பீர்க்கன்காரணை, ஓட்டேரி, சேலையூர், மணிமங்கலம், கூடுவாஞ்சேரி உட்பட பல்வேறு காவல் நிலையங்களில் கொலை, கொலை முயற்சி உட்பட 50க்கும் மேற்பட்ட வழக்குகள் உள்ளது. இவருக்கு விஜயலட்சுமி (32) என்ற மனைவி மற்றும் கோகுல் என்ற மகன், யுவஸ்ரீ என்ற மகள் உள்ளனர்.

இந்நிலையில் நடந்து முடிந்த உள்ளாட்சி தேர்தலில் செங்கல்பட்டு மாவட்டம், காட்டாங்கொளத்தூர் ஒன்றியத்திற்கு உட்பட்ட நெடுங்குன்றம் ஊராட்சியில் 9வது வார்டு உறுப்பினர் பதவிக்கு விஜயலட்சுமி சுயேட்சையாக போட்டியிட்டு வார்டு உறுப்பினராக தேர்ந்தெடுக்கப்பட்டார்.

இந்நிலையில், நேற்று தேர்தலில் வெற்றி பெற்ற நபர்கள் பதவி ஏற்கும் நிகழ்ச்சி நடைபெற்றது. இதில் நெடுங்குன்றம் பகுதியில் நடைபெற்ற பதவி ஏற்பு விழாவில் விஜயலட்சுமி கலந்துகொண்டு பதவியேற்றார். பின்னர் மேடையிலிருந்து விஜயலட்சுமி கீழே இறங்கிய போது, அங்கு வந்த ஓட்டேரி காவல் நிலைய போலீசார் அவரை கைது செய்து காவல் நிலையம் அழைத்து சென்றனர்.

அப்பொழுது, அங்கு கூடியிருந்த விஜயலட்சுமியின் ஆதரவாளர்கள் காவல்துறையினரை சூழ்ந்து கொண்டு எதற்காக வார்டு உறுப்பினரை அழைத்துச் செல்கிறீர்கள்..? யாருடைய தூண்டுதல் பேரில் கைதுக் செய்கிறீர்கள் என்று கேள்வி கேட்டு போராட்டத்தில் ஈடுபட்டனர். இதனால் அப்பகுதியில் பெரும் பரபரப்பு ஏற்பட்டது.

இதுகுறித்து விஜயலட்சுமி தரப்பில் விசாரித்தபோது அவர்கள் கூறுகையில், “ஜனநாயக முறையில் மக்களின் ஆதரவோடு தேர்தலில் போட்டியிட்டு ஒருமனதாக தேர்ந்தெடுக்கப்பட்ட உறுப்பினரை, கணவரின் பெயரை சொல்லி காழ்ப்புணர்ச்சி காரணமாக கைது செய்வது ஏற்றுக்கொள்ள முடியாத ஒரு அராஜக செயலாகும். இதற்கு காவல்துறை தகுந்த பதிலளிக்க வேண்டும், என்று கூறினர்.

இது தொடர்பாக காவல்துறையினர் தரப்பில் விசாரித்தபோது, “கடந்த ஆகஸ்ட் மாதம் விஜயலட்சுமி கஞ்சா விற்பனை செய்ததாகவும், அந்த புகாரின் பேரில் அவரை கைது செய்ததாகவும் தெரிவித்தனர். மேலும், தனது கணவர் பாஜகவில் சேர்ந்ததால் ஆளும் திமுக அரசு காழ்ப்புணர்ச்சியோடு, தன்மீது பொய் புகார் கூறி கைது செய்துள்ளது என்று விஜயலட்சுமி தரப்பில் கூறப்படுகிறது.

Views: - 315

1

0