ராமர் கோவில் விவகாரத்தில் திமுக அமைதியாக இருப்பது குறுகிய மனப்பான்மை : அர்ஜூன் சம்பத் தாக்கு!!

5 August 2020, 11:18 am
Cbe Arjun sampath - Updatenews360
Quick Share

கோவை : அயோத்தியில் ராமர் கோவில் கட்டும் நிகழ்வுக்கு திமுக வரவேற்பு தெரிவிக்காமல் இருப்பது அவர்களது குறுகிய மனப்பான்மையை காட்டுவதாக இந்து மக்கள் கட்சி தலைவர் அர்ஜுன் சம்பத் தெரிவித்துள்ளார்.

அயோத்தியில் ராமர் கோயில் கட்டுவதற்கான அடிக்கல் நாட்டு விழா இன்று நடைபெறுகிறது. தொடர்ந்து கோவையில் இந்து மக்கள் கட்சி சார்பில் பல்வேறு இடங்களில் இனிப்புகள் வழங்கி ராம ஜெபம் கூறப்பட்டு வருகிறது.

இந்த நிகழ்ச்சியில் இந்து மக்கள் கட்சி தலைவர் அர்ஜூன் சம்பத் செய்தியாளர்களிடம் கூறியதாவது: அயோத்தியில் ராமர் கோவில் கட்டுவதற்காக பலபேர் சிறைச்சாலை சென்றுள்ளோம், பல துன்பங்களை அனுபவித்துள்ளோம்.

இதற்கெல்லாம் ஒரு முற்றுப் புள்ளியாக இன்றைய நிகழ்ச்சி உள்ளது. இந்தியாவில்தான் இந்த மாதிரி அமைதியான முறையில் கோவில் கட்டும் பணி நடக்கிறது. உலகமே இதை கவனிக்கிறது. நமது சுய மரியாதை நிலைநாட்டப்பட்டுள்ளது.

இதே இஸ்லாமியர்களுக்கு எதிரானது அல்ல. இது இடதுசாரிகள் செய்த தவறான பிரச்சாரம். இஸ்லாமியர்கள் தரப்பில் இன்று நடைபெறும் விழாவில் கலந்து கொள்கின்றனர். யாரும் ராமர் கோவில் கட்டுவதற்கு எதிர்ப்பு தெரிவிப்பதில்லை. அரசியலுக்காக சிலர் இதுபோல செய்கின்றனர்.

இதுதான் உண்மையான சமூக நல்லிணக்கம். காந்தி சொன்னதை போல் ராமராஜ்யம் என்கிற நல்லாட்சி வரும். இந்து மக்கள் கட்சி சார்பில் தமிழகம் முழுவதும் ராம நாம ஜெபம் செய்து, மக்களுக்கு இனிப்புகளை வழங்கி கொண்டாடி வருகிறோம்

புதிய கல்விக் கொள்கைக்கு அனைத்து மாநிலங்களும் ஆதரவு தெரிவித்து வரும் நிலையில் மும்மொழிக் கொள்கையை தமிழக அரசு எதிர்க்கிறது. இதுவே மறைந்த முன்னாள் முதலமைச்சர் ஜெயலலிதா இருந்திருந்தால் இந்த கல்விக் கொள்கையை ஏற்று இருப்பார்.

எம்ஜிஆர் பொருளாதார அடிப்படையில் இட ஒதுக்கீடு வேண்டும் கூறியவர். எனவே பொருளாதார அடிப்படையில் இட ஒதுக்கீடு கொடுக்க வேண்டும். ஸ்டாலினின் அட்டக்கத்தி அரசியலுக்கு தமிழக அரசு பயப்பட வேண்டியதில்லை.

அய்யோத்தியில் ராமர் கோவில் கட்டும் நிகழ்வுக்கு காங்கிரஸ் வரவேற்பு தெரிவித்துள்ளது. ராமன் இந்த நாட்டின் அடையாளம். அயோத்தியில் ராமர் கோவில் கட்டவேண்டும் என்பது காங்கிரசின் விருப்பம். ஆனால் திமுக ஒரு கோடி இந்துக்களை கையில் வைத்திருக்கிறேன் என்று கூறிக்கொண்டு நாடு முழுவதும் இருக்கும் அனைத்து கட்சிகளும் இதே வரவேற்றும் ஸ்டாலின் இது குறித்து எதுவும் பேசவில்லை.

உலகமே மகிழ்ச்சியாக இருக்கும் இந்த நேரத்தில் திமுக வாய்மூடி மவுனம் சாதிக்கிறது. ராமர் கோவில் கட்டும் நிகழ்வை திமுக வரவேற்க வேண்டும். இது திமுக.,வின் குறுகிய மனப்பான்மையை காட்டுகிறது. இவ்வாறு அர்ஜூன் சம்பத் கூறினார்.