EN
புல்லட் ரயில் பாதை திட்டத்திற்கு சுற்றுச்சூழல் அனுமதி வழங்கப்பட்டது..! வேகமெடுக்கும் மோடியின் கனவுத் திட்டம்..!
2 December 2020, 8:54 am
508 கி.மீ நீளமுள்ள அகமதாபாத்-மும்பை அதிவேக புல்லட் ரயில்பாதை திட்டத்திற்கு குஜராத் மற்றும் மகாராஷ்டிராவில் தேவையான அனைத்து வனவிலங்குகள், வனவியல் மற்றும் கடலோர ஒழுங்குமுறை மண்டல அனுமதிகளை இந்திய ரயில்வே பெற்றுள்ளது என்று ரயில்வே அதிகாரிகள் தெரிவித்தனர்.
வீடியோ கான்பெரன்ஸ் முறையில் நடந்த பத்திரிகையாளர் சந்திப்பில் உரையாற்றிய ரயில்வே வாரியத் தலைவரும் தலைமை நிர்வாக அதிகாரியுமான வி.கே.யாதவ், “குஜராத் மற்றும் மகாராஷ்டிரா மாநிலத்தில் தேவையான வனவிலங்கு, வனவியல் மற்றும் கடலோர ஒழுங்குமுறை மண்டல அனுமதிகள் பெறப்பட்டுள்ளன.” எனத் தெரிவித்தார்.
1,651 பயன்பாடுகளில் 1,070 பயன்பாடுகள் புல்லட் ரயில்பாதை திட்டத்தில் சுற்றுச்சூழல் பாதுகாப்பிற்காக மாற்றப்பட்டுள்ளன என்று அவர் கூறினார்.
புல்லட் ரயில் திட்டத்திற்கு தேவையான நிலத்தில் இதுவரை 67 சதவீதம் ரயில்வேக்கு கிடைத்துள்ளது என்று யாதவ் மேலும் தெரிவித்தார். குஜராத்தில் 956 ஹெக்டேரில் 825 ஹெக்டேர் கையகப்படுத்தப்பட்டுள்ளது. இது 86 சதவீதமாகும்.
மகாராஷ்டிராவில், 432 ஹெக்டேர் நிலத்தில் 97 ஹெக்டேர் நிலம் கையகப்படுத்தப்பட்டுள்ளது. இது தேவையான மொத்த நிலத்தில் 22 சதவீதம் மட்டுமேயாகும். தாத்ரா மற்றும் நகர் ஹவேலியில் எட்டு ஹெக்டேர் நிலத்தில் ஏழு ஹெக்டேர் கையகப்படுத்தப்பட்டுள்ளது என்று யாதவ் கூறினார்.
325 கி.மீ நீளமுள்ள வையாடக்ட் மற்றும் ஐந்து நிலையங்களை உள்ளடக்கிய லட்சிய திட்டத்திற்காக குஜராத்தில் 32,000 கோடி ரூபாய் மதிப்புள்ள டெண்டர்களை ரயில்வே வெளியிட்டுள்ளது என்று யாதவ் மேலும் தெரிவித்தார்.
பிரதமர் நரேந்திர மோடியும், அப்போதைய ஜப்பானின் பிரதமர் ஷின்சோ அபேவும் செப்டம்பர் 14, 2017 அன்று லட்சிய திட்டமான 1.08 லட்சம் கோடி புல்லட் ரயில் திட்டத்திற்கு அடிக்கல் நாட்டினர்.
லட்சிய திட்டத்தை நிறைவு செய்வதற்கான ஆரம்ப காலக்கெடு டிசம்பர் 2023 ஆகும். புல்லட் ரயில்கள் மணிக்கு 350 கி.மீ வேகத்தில் இயங்கும். இது 508 கி.மீ பயண தூரத்தை இரண்டு மணி நேரத்தில் கடக்கும் என்று எதிர்பார்க்கப்படுகிறது. ஒப்பிடுகையில், தற்போது இந்த பாதையில் செல்லும் ரயில்கள் இந்த தூரத்தை கடக்க ஏழு மணிநேரம் ஆகும். அதே நேரத்தில் விமானங்கள் மூலம் ஒரு மணி நேரத்தில் அடைந்துவிடலாம்.
0
0