“பிரணாப் முகர்ஜியின் உடல்நிலை தொடர்ந்து கவலைக்கிடம்” – ராணுவ மருத்துவமனை தகவல்..!

19 August 2020, 3:46 pm
Quick Share

முன்னாள் குடியரசுத் தலைவர் பிரணாப் முகர்ஜியின் உடல்நிலை தொடர்ந்து கவலைக்கிடமாக உள்ளது என ராணுவ மருத்துவமனை வட்டாரங்கள் தகவல் அளித்துள்ளன.

குடியரசு முன்னாள் தலைவர் பிரணாப் முகர்ஜி மூளையில் ஏற்பட்ட கட்டியின் அறுவை சிகிச்சைக்காக டெல்லியில் உள்ள ராணுவ ஆராய்சி மருத்துவமனையில் அனுமதிக்கப்பட்டிருந்தார்.

அங்கு அவருக்கு எடுக்கப்பட்ட பரிசோதனையில் கொரோனா தொற்று இருப்பது உறுதி செய்யப்பட்டது. அறுவை சிகிச்சை வெற்றிகரமாக முடிந்த நிலையில் கொரோனா தொற்றால் அவரின் உடல்நிலை மோசமானது.

இந்தநிலையில் கடந்த 10 நாட்களாக அவருக்கு தீவிர சிகிச்சை அளிக்கப்பட்டு வருகிறது. ஆனால், அவரின் உடல்நிலையில் முன்னேற்றம் ஏதும் ஏற்படவில்லை என மருத்துவமனை நிர்வாகம் ஏற்கனவே அறிவித்திருந்தது.

இந்த சூழலில் அவர் கோமா நிலைக்கு சென்றுள்ளதால் சிகிச்சை அளிப்பதில் மேலும் சிறமம் ஏற்பட்டுள்ளதாக மருத்துவமனை நிர்வாகம் தகவல் அளித்துள்ளது. மேலும், அவரின் உடல்நிலை தொடர்ந்து கவலைக்கிடமாகவே உள்ளது எனவும் மருத்துவமனை தொடர்ந்து அறிக்கை வெளியிட்டு வந்தது.

இந்தநிலையில், இன்று காலை பிரணாப் முகர்ஜியின் மகன் அபிஜித் முகர்ஜி டுவிட்டரில் பதிவு ஒன்றை வெளியிட்டிருந்தார். அதில், “தந்தை பிரணாப் முகர்ஜி உடல்நிலை சீராக உள்ளது. தந்தையின் உடல் உறுப்புகள் சீராக இயங்குகிறது. அவரது உடல்நிலையில் முன்னேற்றம் காணப்படுகிறது” என்று தெரிவித்திருந்தார்.

ஆனால் இன்று பிற்பகலுக்கு பிறகு மருத்துவமனை வட்டாரங்கள் தரப்பில் பல்வேறு தகவல்கள் வெளியாகி வருகிறது. பிரணாப் முகர்ஜிக்கு தொடர்ந்து வென்டிலேட்டர் மூலம் சிகிச்சை அளிக்கப்பட்டு வருவதாகவும், ஆனால் அவரின் உடல்நிலையில் முன்னேற்றம் ஏற்படவில்லை எனவும் கூறப்படுகிறது. இதன் காரணமாக அரசியல் கட்சி தலைவர்கள், அவரது உறவினர்கள் மத்தியில் சோகம் நிலவியுள்ளது.

Views: - 1

0

0