பிஎம் கேர்ஸ் நிதியை பேரிடர் மேலாண்மை நிதிக்கு மாற்ற முடியாது..! உச்சநீதிமன்றம் திட்டவட்டம்..!

18 August 2020, 11:47 am
Supreme_Court_UpdateNews360
Quick Share

கொரோனா தொற்றுநோய்க்கான பிஎம் கேர்ஸ் நிதியை தேசிய பேரிடர் மேலாண்மை நிதிக்கு நேரடியாக மாற்றுவதற்கு உத்தரவிட உச்ச நீதிமன்றம் இன்று மறுத்துவிட்டது. மனுவை தள்ளுபடி செய்யும் போது, புதிய தேசிய பேரிடர் நிவாரணத் திட்டம் தேவையில்லை என்று உச்ச நீதிமன்றம் கூறியது. மேலும் பி.எம். கேர்ஸ் ஃபண்ட் சேகரித்த நிதி முற்றிலும் வேறுபட்டது என்றும் இவை தொண்டு அறக்கட்டளைகளின் நிதி என்றும் உச்ச நீதிமன்றம் தெரிவித்துள்ளது.

தேசிய பேரிடர் மேலாண்மை நிதிக்கு எப்போதும் தன்னார்வ பங்களிப்பை வழங்க முடியும், ஆனால் பிஎம் கேர்ஸ் கொரோனாவுக்கான சிறப்பு நிதி என உச்சநீதிமன்றம் தனது தீர்ப்பில் தெரிவித்துள்ளது.

உச்சநீதிமன்றம் மேலும், “கொரோனாவை சமாளிக்க 2019 நவம்பரில் உருவாக்கப்பட்ட தேசிய பேரிடர் மேலாண்மை திட்டம் போதுமானது. புதிய செயல் திட்டத்தை உருவாக்கவோ அல்லது குறைந்தபட்ச பாதுகாப்பு தரங்களை பிரிக்கவோ தேவையில்லை.” எனத் தெரிவித்துள்ளது.

முன்னதாக பேரழிவு மேலாண்மைச் சட்டத்தின் 46’வது பிரிவின் கீழ் உருவாக்கப்பட்ட ஒரு சட்டரீதியான நிதியான தேசிய பேரிடர் மேலாண்மை நிதிக்கு (என்.டி.ஆர்.எஃப்) பிரதமர் கேர்ஸ் நிதிக்கு இன்றுவரை அளித்த அனைத்து பங்களிப்புகளையும்மாற்ற வேண்டும் என்று கோரி ஒரு தன்னார்வ தொண்டு நிறுவனம் தாக்கல் செய்த மனுவை உச்ச நீதிமன்றம் ஏற்று விசாரணை செய்தது.

இந்த மனு தொடர்பான விசாரணை ஏற்கனவே நிறைவடைந்த நிலையில், உச்சநீதிமன்றம் தனது தீர்ப்பை தேதி குறிப்பிடாமல் ஒத்திவைத்திருந்தது குறிப்பிடத்தக்கது.

வக்கீல் பிரசாந்த் பூஷண் மூலம் தன்னார்வ தொண்டு நிறுவனமான பொது நல வழக்கு மையம் (சிபிஐஎல்) தாக்கல் செய்த மனுவில், கொரோனா நிவாரணத்திற்காக அமைக்கப்பட்ட பி.எம் கேர்ஸ் நிதிக்கு அளித்த அனைத்து பங்களிப்புகளையும் என்.டி.ஆர்.எஃப். நிதிக்கு மாற்ற வேண்டும் எனக் கூறியிருந்தது.