மத்திய அமைச்சரவை விரிவாக்கம்: மத்திய அமைச்சராக பதவி ஏற்றார் எல்.முருகன்..!

7 July 2021, 10:27 pm
Quick Share

பிரதமர் மோடி தலைமையிலான மத்திய அமைச்சரவை விரிவாக்கத்தில், தமிழக பாஜக தலைவர் எல்.முருகன் மத்திய அமைச்சராக பதவியேற்றுக்கொண்டார்.

பிரதமர் நரேந்திர மோடி தலைமையிலான மத்திய அமைச்சரவை, இன்று விரிவாக்கம் செய்யப்பட்டது. கடந்த 2019-ம் ஆண்டுக்கு பிறகு கிட்டத்தட்ட இரண்டு ஆண்டுகளுக்கு பிறகு மத்திய அமைச்சரவை விரிவாக்கம் செய்யப்பட்டுள்ளது. புதிய அமைச்சரவையில், 43 பேர் மத்திய அமைச்சர்களாக பதவி ஏற்றுள்ளனர். மோடி 2.o அமைச்சரவையில், இளம் மற்றும் மூத்தத் தலைவர்களுக்கு வாய்ப்பு அளிக்கப்பட்டுள்ளது. தமிழகத்தைச் சேர்ந்த எல்.முருகனுக்கும் மத்திய அமைச்சரவையில் இடமளிக்கப்பட்டுள்ளது.

இந்நிலையில், புதிய அமைச்சர்களின் பதவியேற்பு விழா குடியரசுத் தலைவர் மாளிகையில் நடைபெற்றது. இதில், பிரதமர் நரேந்திர மோடி, மத்திய உள்துறை அமைச்சர் அமித் ஷா, குடியரசுத் துணைத் தலைவர் வெங்கையா நாயுடு உள்ளிட்டோர் பங்கேற்றனர். புதிய மத்திய அமைச்சர்களுக்கு குடியரசுத் தலைவர் ராம்நாத் கோவிந்த் பதவிப் பிரமாணம் செய்து வைத்தார்.இந்நிலையில், புதிதாக மத்திய அமைச்சர்களாக பதவி ஏற்றவர்களில், ஜோதிராதித்ய சிந்தியா, கிரண் ரிஜிஜூ, நாரயண் டடு ரானே, சர்பானந்த சோனவால், விரேந்திர குமார், ராமச்சந்திரா பிரசாத் சிங், அஷ்வினி வைஸ்நவ், ராஜ்குமார் சிங், ஹர்தீப் சிங் புரி, புபேந்தர் யாதவ், கிஷான் ரெட்டி உள்ளிட்ட 15 பேருக்கு கேபினட் அந்தஸ்து வழங்கப்பட்டுள்ளது.

தமிழகத்தைச் சேர்ந்த எல். முருகன், பன்கஜ் சவுத்ரி, அனுபிரியா சிங் படேல், சத்யபால் சிங் பகேல், ராஜீவ் சந்திரசேகர், அஜய் பட், ஜான் பர்லா, பாரதி பிரவின் பவார் உள்ளிட்டோருக்கு மத்திய இணை அமைச்சர் பொறுப்பு வழங்கப்பட்டுள்ளது.புதிய அமைச்சர்களையும் சேர்த்து, பிரதமர் நரேந்திர மோடி அமைச்சரவையில் தற்போதுள்ள மத்திய அமைச்சர்களின் எண்ணிக்கை 77 ஆக அதிகரித்துள்ளது. ராஜினாமா செய்த ரவிசங்கர் பிரசாத், பிரகாஷ் ஜாவடேகர், ஹர்ஷ் வர்தன் உள்ளிட்டோருக்கு ஆளுநர் பதவி வழங்க பிரதமர் மோடி முடிவு செய்துள்ளதாகவும் தகவல்கள் வெளியாகியுள்ளன. இது குறித்த அறிவிப்பும் வரும் நாட்களில் வெளியாகலாம் என எதிர்பார்க்கப்படுகிறது.

Views: - 139

0

0