மேகதாது அணை விவகாரம்: தமிழக அரசின் மேல்முறையீட்டை சந்திக்க தயார்: கர்நாடக முதலமைச்சர் பசவராஜ் பேட்டி..!

Author: kavin kumar
11 August 2021, 11:31 pm
Quick Share

மேகதாது அணை விவகாரத்தில் தமிழக அரசின் மேல் முறையீட்டு மனுவை சந்திக்கத் தயாராக இருப்பதாக கர்நாடக மாநில முதலமைச்சர் பசவராஜ் பொம்மை தெரிவித்துள்ளார்.

கர்நாடக மாநிலத்தில், காவிரி ஆற்றின் குறுக்கே மேகதாது என்ற இடத்தில் அணை கட்ட கர்நாடக மாநில பா.ஜ.க. அரசு முடிவு செய்துள்ளது. மேலும், இதற்கானப் பணிகளையும் தொடங்கி உள்ளது. இந்த திட்டத்தால், தமிழக விவசாயிகள் கடுமையாக பாதிக்கப்படுவார்கள் என்பதால், மேகதாது அணையை கர்நாடக மாநில அரசு கட்டக் கூடாது என தமிழக அரசு எதிர்ப்புத் தெரிவித்து வருகிறது. மேகதாதுவில் அணை கட்டப்படுகிறதா என்பதை ஆய்வு செய்ய அமைக்கப்பட்ட குழு கலைக்கப்பட்டதை எதிர்த்து, தமிழக அரசு உச்சநீதிமன்றத்தில் மேல்முறையீடு செய்துள்ளது. இந்த வழக்கு விரைவில் விசாரணைக்கு வரும் என எதிர்பார்க்கப்படுகிறது.

இந்நிலையில், கர்நாடக மாநிலம் பெங்களூரில், பா.ஜ.க.வைச் சேர்ந்த அம்மாநில முதலமைச்சர் பசவராஜ் பொம்மை செய்தியாளர்களிடம் கூறியதாவது:- மேகதாது அணை கட்ட தமிழக அரசு எதிர்ப்பு தெரிவித்து உச்சநீதிமன்றத்தில் மேல்முறையீட்டு மனுவை தாக்கல் செய்துள்ளது. அது குறித்து கர்நாடக மாநில அரசுக்கு கவலை இல்லை. தமிழகத்தின் மேல்முறையீட்டு மனுவை உச்சநீதிமன்றத்தில் சந்திக்க தயாராக உள்ளோம்.மேகதாது அணை திட்டம் என்பது முழுக்க முழுக்க குடிநீருக்கான திட்டம். ஏற்கனவே ஆந்திர மாநிலத்தில் குடிநீர் திட்டத்திற்கு தொடர்பான வழக்கில் உச்சநீதிமன்றம் குடிநீர் திட்டத்திற்கு எந்த அனுமதியும் பெற தேவையில்லை என தெரிவித்துள்ளது. இதை நான் மத்திய நீர்வளத் துறை அமைச்சரிடம் எடுத்து வைத்துள்ளேன் .மேற்கொண்ட தீர்ப்பின் ஆவணங்களை திரட்டி தன்னை நேரில் சந்திக்க அவர் உத்தரவு பிறப்பித்துள்ளார். விரைவில் மேற்கொண்ட வழக்கின் ஆவணங்களுடன் அவரை சந்தித்து அணை கட்ட அனுமதி கோர உள்ளேன்.இவ்வாறு அவர் கூறினார்.

Views: - 237

0

0